bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Romani
/
Romani Baltic (Библия - Пэ Балтитко Романи чиб (Романэс) 2019)
/
2 Corinthians 8
2 Corinthians 8
Romani Baltic (Библия - Пэ Балтитко Романи чиб (Романэс) 2019)
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 9 →
1
Мэ кама́м, соб (кай) тумэ́ тэ джинэ́н, пшала́лэ, пал Дэвлэ́скиро бахталыпэ́н, со дыно́ кхангирья́кирэ скэдыибнэнгэ дрэ Македония,
2
сыр ёнэ прогинэ́ зорало́ пропатякирибэн пхарэ́ пиридживибна́са, нэ ёнэ сыс древа́н ра́да, со ке́ли ёнэ отдынэ́ саро́ сарэ́ илэ́стыр, хоць ёнэ исын древа́н чорорэ́,
3
палдава́ мэ совлахава, со ёнэ дынэ́ ада́кицы, кицы́ могиндлэ́, и буты́р далэ́стыр, ёнэ ишчо (инкэ́) дынэ́ пир пэ́скири во́ля,
4
и ёнэ древа́н мангнэ́ амэн, соб (кай) амэ тэ прилас лэ́нгири паш тэ помогинэн (тэ подэн васт) свэнтонэнгэ тэ кэрэ́н Дэвлэ́скири буты́.
5
Нэ ёнэ кэрдэ́ фэды́р, сыр амэ ужакирдям лачхипэ́н; ёнэ анги́л отдынэ́ пэс Ра́скэ-Дэвлэ́скэ, а коригэды́р амэ́нгэ пир Дэвлэ́скири во́ля.
6
Палдава́ амэ мангдям Титос, саво́ лыя́ тэ кэрэ́л дая́ буты́, соб (кай) ёв адя́кэ-паць тэ кончынэл дава́ лачхо́ рэ́ндо тэ помогинэн явирэ́нгэ машки́р тумэ́ндэ;
7
и соб (кай) тумэ́, сыр тумэ́ сан лачхэ́ и барвалэ́ пир тала́но (дарованиё): дро патяибэ́н, дро лав, дро джиныбэ́н и дро кажно илэ́скиро хачкирибэ́н и дрэ ла́ска и паты́в, савэ́ исын кэ амэ тумэ́ндыр, адя́кэ-паць тэ явэ́н лачхэ́ и пир дава́ лачхо́ рэ́ндо тэ ден васт явирэ́нгэ.
8
Мэ на ракира́ва дава́ сыр припхэныбэ́н, нэ пир илэ́скиро хачкирибэ́н кэ дава́ рэ́ндо, саво́ исын явирэ манушэ́ндэ, мэ пропатякирава, савэ́ чачунэ́ исын тумарэ́ ла́ска и паты́в.
9
Тумэ́ джинэ́на бахталыпэ́н амарэ́ Ра́стыр-Дэвлэ́стыр, саво́ исын Исусо́скиро Христосо́скиро, Саво́ сыс барвало́, нэ яця́ чороро́, соб (кай) тумэ́ тэ явэ́н барвалэ́ Лэ́скирэ чорорипнастыр.
10
И мэ думинава, со фэды́р ваш тумэ́нгэ тэ кончынэн дава́, со тумэ́ лынэ́ тэ кэрэ́н бэрш палэ, пал-дова́ со тумэ́ са́нас пэ́рва на фэ́ни со пир буты́, нэ адя́кэ-паць и пир тырдыпэ́н тэ дэн васт.
11
Какана́ кончынэн дая́ буты́: соб (кай) тумэ́ адя́кэ-паць сыр тумэ́ са́нас скэдынэ́ тэ лэн тэ кэрэ́н дова́, адя́кэ-паць тумэ́ и тэ кончынэн дава́ рэ́ндо, дыкхи́ пир дова́, со исын тумэ́ндэ.
12
Ко́ли исын дасави́ мы́сля пэ годы́ тэ дэл, Дэвэ́л прилэ́ла тумаро́ да́ро пир дова́, со исын тумэ́нгэ, а на пир дова́, со нанэ тумэ́ндэ.
13
Палдава́ со дава́ исын на пир чачипэ́н, ко́ли дава́ кэрлапэ адя́кэ, соб (кай) лэ́нгэ тэ явэ́л локхэды́р, а тумэ́нгэ пхарэдыр, нэ соб (кай) тэ явэ́л сарэ́нгэ роўня,
14
соб (кай) какана́ тумари́ паш миштыпна́стыр тэ дэл васт лэ́нгэ, конэ́стэ какана́ нанэ, а коригэды́р, соб (кай) лэ́нгири паш миштыпна́стыр тэ дэл васт тумэ́нгэ ваш дова́, соб (кай) тэ явэ́л сарэ́нгэ шэра́ (ра́внэс).
15
Сыр исын чхиндло́: “Одолэ́стэ, кон скэдыя́ бут, на явэ́ла нисо́ лишнё; и кодолэстэ, кон скэдыя́ на́бут, на явэ́ла на ухтылэл (на явэ́ла на́доси).”
16
Амэ парикираса Дэвлэ́скэ пал дова́, со Ёв дыя́ дасаво илэ́скиро хачкирибэ́н Титоскэ тэ дэл васт тумэ́нгэ.
17
Пал-дова́ со ёв на фэ́ни прилыя́ кэ ило́ амаро́ мангипэ́н (просьба), нэ ишчо (инкэ́) буты́р пир пэ́скиро илэ́скиро хачкирибэ́н, ёв гия́ кэ тумэ́ кокоро́ пэ́стыр;
18
нэ амэ бичхадям лэ́са пшалэ́с, савэ́с шарэна пал дова́, сыр ёв роспхэнэ́ла бахталы́ зан,
19
и на екх пал дова́, а адя́кэ-паць и пал дава́, со кхангирья́кирэ скэдыибэна выкэдынэ́ лэс тэ джал кхэтанэ́ амэ́нца пир дава́ лачхо́ рэ́ндо, саво́ амэ кэра́са ваш Ра́скирэ-Дэвлэ́скири сла́ва; и, соб (кай) тэ сыкавас амаро́ хачкирибэ́н тэ дас васт;
20
и амэ камаса тэ на пэрас тэл вари-конэ́скиро выракирибэн пал дасаво барвало́ да́ро, со амэ скэдыям;
21
пал-дова́ со амэ кэра́са буты́, со исын зор, соб (кай) саро́ тэ явэ́л пир чачипэ́н на со екх анги́л Дэвлэ́стэ, нэ адя́кэ-паць и анги́л манушэ́ндэ.
22
И амэ бичхадям лэ́нца амарэ́ пшалэ́с, конэ́скиро илэ́скиро хачкирибэ́н амэ пропатякирасас дрэ бут рэ́нды, а какана́ ёв ишчо (инкэ́) зоралэды́р пир илэ́скиро хачкирибэ́н пал тумаро́ твардо патяибэ́н.
23
Ко́ли тэ пхэна́в пал Титостэ, адава́ исын миро мал, кон кэрэ́ла буты́ кхэтанэ́ ма́нца машки́р тумэ́ндэ; и ёнэ исын бичхадэ́ мануша́ кхангирьендыр, кон янэ́ла сла́ва Христосо́скэ.
24
Палдава́ сыкавэ́н пэ́скиро ило́ кэ ёнэ анги́л кхангирья́кирэ скэдыибэна сыр допхэныбэ́н, со амэ пир чачипэ́н шараса тумэн.
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 9 →
All chapters:
1
2
3
4
5
6
7
8
9
10
11
12
13