2 John 1

Romani Baltic (Библия - Пэ Балтитко Романи чиб (Романэс) 2019)

Jump to:

1Пхурэстыр, – Ранякэ, Савья Дэвэ́л выкэдыя́, и Ла́кирэ чхавэ́нгэ, савэ́ исын дро́га ма́нгэ чачунэ́с, нэ на со мэ екх, а сарэ́, савэ́ уджиндлэ́ чачипэ́н,

2пал дава́ чачипэ́н, саво́ исын дрэ амэ́ндэ и явэ́ла амэ́нца пэ ве́ки:

3мэк тэ явэ́л бахтякирибэ́н, тангипэ́н, и рама́нё тумэ́нца Дэвлэ́стыр Дадэ́стыр и Ра́стыр-Дэвлэ́стыр, Исусо́стыр Христосостыр дро чачипэ́н и ла́ска.

4Мэ со́мас древа́н радо, ке́ли Мэ латхём машки́р Тырэ́ чхавэ́ндэ кадасавэн, савэ́ дживэ́на дро чачипэ́н пир дава́, сыр Дэвэ́л Дад припхэндя́ амэ́нгэ.

5И какана́ Мэ древа́н манга́ва Тут, дро́го Ранори; ява́са тэ явас лачхэ́ екх кэ екх. Мэ чхина́ва дава́ на нэво́ припхэныбэ́н, а дава́ припхэныбэ́н сыс амэ́нгэ англыпна́стыр.

6Дая́ пшалы́тко паты́в значинэла дова́, соб (кай) амэ тэ джива́с адя́кэ, сыр Дэвэ́л припхэндя́ амэ́нгэ. Дава́ исын дова́-паць припхэныбэ́н, саво́ тумэ́ шундлэ́ англыпна́стыр, соб (кай) амэ тэ джива́с пир дава́ припхэныбэ́н.

7Пал-дова́ со бут хохаибнарья загинэ́ дро свэ́то, савэ́ на приґалёна, со Ису́со Христо́со явдя́ дро манушы́тко лоч. Кадасаво́ ману́ш исын хохаибнари и вэ́рго (врого) Христосо́скэ.

8Дыкхэ́н пал пэ́стэ, соб (кай) амэ тэ на нашавас дова́, ваш со амэ кэрдя́м буты́, а соб (кай) тумэ́ тэ дорэсэн пхэрды́ мазу́ри (награда) Ра́стыр-Дэвлэ́стыр.

9Кажно ману́ш, кон пириджала Христосо́скиро сыклякирибэ́н и на ячэ́лапэ дро дава́ сыклякирибэ́н, кадасавэ́ манушэ́стэ нанэ Дэвэ́л. Кон ячэ́лапэ дро Христосо́скиро сыклякирибэ́н, кадасавэ́ манушэ́стэ исын и Дад и Чхаво́.

10Ко́ли вари-кон явэ́ла кэ тумэ́ и на янэ́ла дова́, со Христо́со сыклякирдя́, тумэ́ тэ на прилэ́н лэс дро тумаро́ кхэр и тэ на дэн ‘добридим’ лэ́скэ.

11Пал-дова́ со, кон дэ́ла ‘добридим’ лэ́скэ, одова́ ману́ш исын пал екх лэ́са дрэ лэ́скирэ фуй рэ́нды.

12Ма́ндэ исын бут, со трэй тэ чхинав ту́кэ, нэ мэ на кама́м тэ кэра́в дава́, пэ папира чэрниласа. Амэ́ндэ исын наде́я тэ явав тумэ́нца тэ ракира́в муй кэ муй, соб (кай) амари́ ра́дыма тэ явэ́л пхэрды́.

13Чхаворэ́ тырэ́-пхэнякирэ, савья́ адя́кэ-паць Дэвэ́л выкэдыя́, пиридэна “паклоно” ту́кэ.

Jump to: