2 Peter 2

Romani Baltic (Библия - Пэ Балтитко Романи чиб (Романэс) 2019)

← Chapter 1 Jump to: Chapter 3 →

1Нэ сыр сыс хоханэ́ проро́ки машки́р манушэ́ндэ, адя́кэ-паць явэ́на и хоханэ́ сыклякирибнаскирэ машки́р тумэ́ндэ, савэ́ явэ́на чораханэ́с тэ ракирэ́н хасибны́тка сыклякирибэна пэ́скирэ кампаниендыр и на явэ́на тэ приґалён Рас-Дэвлэ́с, Саво́ выкиндя лэн, далэ́ ракирибнаса ёнэ янэ́на кокорэ́ пэ́скэ сы́гно хасибэ́н;

2и бут мануша́ джа́на пала́л пал лэ́ндэ пир на́гожа рэ́нды (де́лы), и пал кадалэ́ манушэ́ндэ дром, саво́ исын чачуно́, явэ́ла калякирдо.

3И кадалэ́ хоханэ́ сыклякирибнарья пал пэ́скири скэмпима явэ́на тэ барвалён тумэ́ндыр пэ́скирэ фрэнтонэ лавэ́нца, сэ́ндо ґара́ ужакирэ́ла лэн и лэ́нгиро хасибэ́н исын насуто.

4Пал-дова́ со ко́ли Дэвэ́л на потангиндя Янголэн, савэ́ кэрдэ́ грэ́хи, а отдыя́ лэн дро лю́но (адо), и бэшлякирдя лэн састырэнца дро цямлыпэ́н, кай ёнэ ужакирэ́на сэндоскиро дывэ́с;

5и Ёв на потангиндя (на пожалиндя) англатуно́ свэ́то, а зракхця́ охто́ (бидуе́нгиро дэш) манушэ́н и машки́р лэ́ндэ Ноёс, саво́ роспхэнэлас анги́л сарэ́нгэ чачипэ́н и Дэвэ́л яндя́ потопо пэ адалэ́ надэвлытконэ манушэ́ндэ;

6и Ёв сэндякирдя Содомо́скирэ и Гоморакирэ фо́рья кэ хасибэ́н, ке́ли хачкирдя́ лэн кэ пра́ска (пепло). Кадалэса Дэвэ́л сыкадя́ манушэ́нгэ, со явэ́ла надэвлытконэ манушэ́нца;

7и Ёв зракхця́ Лотос, саво́ сыс чачуно́ ману́ш и древа́н змэнчындло далэ́ нагожонэ рэндэ́ндыр, со кодолэ́ мануша́ кэрдэ́,

8пал-дова́ со кадава́ чачуно́ ману́ш, саво́ дыкхця́ саро́ и дживдя́ машки́р лэ́ндэ, мэнчындяпэ со дывэ́с пэ́скирэ чачунэ́ духо́са, ке́ли ёв дыкхця́ и шундя́ лэ́нгирэ рэ́нды, со сыс проти Зако́но.

9И екх Дэвэ́л джинэ́ла, сыр тэ зракхэ́л дэвлытконэ́ манушэ́н, ке́ли пропатякирэна лэн, и Ёв ракхэ́ла кадалэ́ начачунэ манушэ́н кэ / жы́ко сэндоскиро дывэ́с, соб (кай) тэ чхувэ́л ка́ра пэ лэ́ндэ;

10и дава́ буты́р сарэ́стыр чилавэ́ла одолэ́ манушэ́н, савэ́ джа́на пир на́лачхо лочакиро камибэн и пхагирэна Дэвлэ́скиро право. Кадасавэ́ хоханэ́ сыклякирибнаскирэ хасякирдэ́ ладж, ёнэ кэрэ́на, со исын пир годы́ лэ́нгэ и на дарэ́на тэ калякирэн ду́хи, савэ́ исын дро Болыбна́скиро Раё.

11А Янго́лы, савэ́ исын пэ бут зоралэды́р кадалэ́ духэ́ндыр и лэ́ндэ исын буты́р право, на ракирэ́на проти и на калякирэна далэ́ зорья анги́л Дэвлэ́стэ.

12А кадалэ́ мануша́ исын сы́рбы бигодякирэ мурдала́, савэ́ на ракирэ́на, савэ́ бия́ндынэ, соб (кай) лэн тэ ухтылэ́н и тэ замарэ́н; ёнэ калякирэна дова́, со кокорэ́ на джинэ́на, и адя́кэ-паць сы́рбы мурдала́, ёнэ и хасёна,

13ёнэ явэ́на тэ пирилыджан пхарипэ́н пал начачипэ́н, пал дова́ со ёнэ дживэ́на пхэрдэ́с пир пэ́скиро на́лачхо камибэн со дывэ́с. Ёнэ исын замакхнэ и домагирдэ мануша́; ёнэ залэнапэ битукоскиро пэ́скирэ хохаибнаса, ке́ли свэнкинэна пал сками́нд тумэ́нца;

14а лэ́нгирэ якха́ исын пхэрдэ́ биладжаипнаса и ёнэ на пириячэна тэ кэрэ́н грэ́хи, а затэрдэна дрэ фэлы́ кэ грэ́хо манушэ́н, конэ́скиро ду́хо (фа́но) исын назорало дро пэ́скиро патяибэ́н, а лэ́нгиро ило́ исын присыклякирдо кэ скэмпима, и Дэвэ́л прокостя кадалэ́ чхавэ́н;

15ёнэ мэкнэ́ чачуно́ дром, ёнэ ячнэ́ хасибны́тка; ёнэ гинэ́ пала́л пир Валамоскиро, Васороскирэ-чхавэ́скиро дром, саво́ тырдыяпэ кэ ловэ́ пал дова́, со ёв кэрдя́ начачунэс,

16а лэ́скэ сыс выракирдо пал дова́, со ёв кэрдя́ на пир Зако́но, ке́ли ослица выпхэндя банг (пининдя) лэ́скэ манушытконэ́ заня́са, ёй и тэрдякирдя пророко́с дро лэ́скиро бигодякирибэн.

17Кадалэ́ мануша́ исын сы́рбы ґанынга́ бипанескирэ и сы́рбы миглы и о́блоки, савэ́ традэ́ла балва́л, Дэвэ́л ракхэ́ла штэ́то ваш лэ́нгэ дро кало́ цямлыпэ́н.

18Палдава́ со ёнэ пэ́скирэ вучэ́с-шардунэ лавэ́нца затэрдэна сы́рбы дрэ фэлы́ пир на́лачхо лочакиро камибэн и кэ на́гожа рэ́нды одолэ́ манушэ́н, савэ́ барэ́ пхарипнаса гинэ́ криг одолэ́ манушэ́ндыр, савэ́ дживэ́на дро грэ́хо;

19ёнэ дэ́на лав лэ́нгэ пал во́ля, а кокорэ́ ёнэ исын сы́рбы писха́рья хасибнытконэ присыкляибнаскэ, пал-дова́ со ману́ш исын писха́ри одолэ́скэ, кон чхудя́ лэс тэлэды́р.

20Пал-дова́ со, ко́ли одолэ́ мануша́, савэ́ вари-ке́ли гинэ́ магирипнастыр, саво́ кэрэ́лапэ дро свэ́то, пир дова́, со ёнэ уджиндлэ́ Рас-Дэвлэ́с и амарэ́ Зракхибнарис Исусо́с Христосо́с, нэвэ́стыр спхандэнапэ магирипнаса и поддэнапэ магирипнаскэ, то кадасавэ́ манушэ́нгэ какана́ явэ́ла фуеды́р, сыр сыс англэды́р.

21Пал-дова́ со лэ́нгэ явэ́лас фэды́р тэ на джинэ́н чачуно́ дром, сыр ёнэ уджиндлэ́ и рисинэ́ палэ свэнтонэ́ припхэныбнастыр, саво́ сыс дыно́ лэ́нгэ.

22Нэ лэ́нца кэрдя́пэ дова́, со сыр ракирэ́на мануша́: “Джукэл рисёла кэ пэ́скиро чадыпэн”, и “выморды балышны джа́ла нэвэ́стыр тэ катынэлпэ дрэ бла́та.”

← Chapter 1 Jump to: Chapter 3 →