Ephesians 5

Romani Baltic (Библия - Пэ Балтитко Романи чиб (Романэс) 2019)

← Chapter 4 Jump to: Chapter 6 →

1И палдава́ причхувэ́н зор тэ кэрэ́н, сыр Дэвэ́л кэрэ́ла, сыр чхавэ́, савэ́ исын Лэ́скэ древа́н дро́га,

2дживэ́н дрэ паты́в кэ яви́р мануша́, сыр и Христо́со сыкадя́ паты́в амэ́нгэ и отдыя́ Пэс пал амэ́ндэ, сыр гудло́ кхандыпэн и свэ́нто дыибэ́н, саво́ исын лачхо́ Дэвлэ́скэ.

3Нэ биладжаипэ́н, ци яви́р вари-саво́ магирипэ́н, ци бокхалыпэн, мэк кадалэскэ тэ на явэ́л штэ́то машки́р тумэ́ндэ, сыр исын машки́р свэнтонэ́ндэ;

4и адя́кэ-паць бэды́тка лава́ и чхучо́ ракирибэ́н и дылыно́ сабэн на джа́ла ваш тумэ́нгэ, фэды́р отдэ́н пэ́скиро часо тэ парикирэ́н Дэвлэ́скэ.

5Джинэ́н дова́, со ни екх биладжаипна́ри, ци магирдо́, ци бокхало́ кэ яви́р фуй рэ́нды (де́лы), саво́ исын сы́рбы идоло́скиро дына́ри (слуга), лэ́стэ на явэ́ла паш дро Христосо́скиро Дэвлэ́скиро кралипэ́н.

6Мэк нико́н тэ на хохавэ́л тумэн чхучэ́ (пустонэ) лавэ́нца, пал дава́ явэ́ла Дэвлэ́скири холы́ пэ чхавэ́ндэ, савэ́ на кандэ́на.

7На явэ́н кхэтанэ́ адасавэ́ манушэ́нца;

8Вари-ке́ли тумэ́ са́нас дро калыпэ́н (тёмныма), а какана́ тумэ́ сан дуд дрэ Растэ-Дэвлэ́стэ: дживэ́н сыр дудэ́скирэ (свэто́скирэ) чхавэ́,

9пал-дова́ со Духоскиро барьякирдо́ (пло́до) исын дро кажно лачхипэ́н, чачипэ́н и патяибэ́н,

10уджинэ́н, со трэй Дэвлэ́скэ;

11соб (кай) тэ на явэ́л тумэ́ндэ нисо́ кхэтанэ́ дрэ чхучэ́ калэ́ (тёмна) рэ́нды, нэ фэды́р сыкавэ́н банг,

12пал-дова́ со, со адасавэ́ мануша́ кэрэ́на чораханэ́с, ладжаво-исын тэ ракирас.

13Нэ саро́ дава́ явэ́ла дыцьло анги́л дуд (свэ́то), пал-дова́ со дуд сыкавэ́ла саро́, со исын дыцьло.

14Палдава́ исын пхэндло́: “Ушты́, кон исын суто́, и отджидёв, и явэ́ла тэ свэнцынэл ту́кэ Христо́со.”

15И палдава́ ракхэ́н лачхэ́с, дживэ́н на сыр бигодякирэ, нэ сыр годьварэ́ мануша́.

16Ракхэ́н часо (цы́ро), пал-дава́ со далэ́ дывэса́ исын хоханэ́.

17И на явэ́н дылынэ́, а фэды́р причхувэ́н зор тэ ґалён, со Дэвэ́л ужакирэ́ла амэ́ндыр.

18И на пьен кэ матыбэн мол, савья́тыр джа́ла на́лачхо джиибэ́н, нэ фэды́р пхэрдякирэн пэс Духо́са,

19сыклякирэ́н екх екхэ́с псалмэнца, бахталэ́ лавэ́нца и Дэвлытконэ́ гиленца, бага́н и славинэ́н Рас-Дэвлэ́с сарэ́ илэ́стыр,

20усады (сак) парикирэ́н пал саро́ Дэвлэ́скэ и Дадэ́скэ, ваш амарэ́ Ра́скирэ-Дэвлэ́скирэ, Исусо́скиро Христосо́скиро лав,

21кандэ́н екх екхэ́с пир дар анги́л Дэвлэ́стэ.

22Джувлялэ, кандэ́н пэскирэн ромэн сыр Рас-Дэвлэ́с,

23пал-дова́ со ром исын хула́й ромнякэ, сыр и Христо́со исын Кхангирья́киро хула́й. Ёв исын Зракхибнари ваш Кхангири́ пир маса́ дро ду́хо (фа́но).

24Нэ, сыр Кхангири́ кандэ́ла Христосо́с, адя́кэ-паць и ромненгэ трэй тэ кандэ́н дро саро́ пэ́скирэ ромэн.

25Мурша́лэ, сыкавэ́н паты́в пэ́скирэ ромне́нгэ адя́кэ, сыр Христо́со сыкадя́ паты́в Кхангирьякэ и отдыя́ Пэс пэ мэрибэ́н пал ла́тэ,

26соб (кай) тэ кэрэ́л Кхангири́ свэнтонаса, тэ выжужакирэл ла пане́са и Дэвлэ́скирэ лавэ́са,

27соб (кай) Лэ́скэ тэ чхувэ́л анги́л Пэ́стэ Кхангири́ дро славно гожыма, дрэ сави́ нанэ ни саво́ макхипэн, ни сави́ дош, а соб (кай) ёй тэ явэ́л свэ́нто и бидошэнгири.

28Адя́кэ-паць и рома́ исын бангэ́ тэ сыкавэ́н паты́в пэскирэн ромне́нгэ сыр пэ́скирэ масэ́нгэ: конэ́скэ исын дро́го пэ́скири ромны́, кодолэ́ манушэ́скэ исын дро́го кокоро́ ёв.

29Пал-дова́ со ниекхэскэ ние́кхвар на сыс джунгало́ (брытко) ваш пэ́скири лоч (плоть), нэ ёв чаравэла и татькирэла лэс сыр и Христо́со Кхангири́:

30пал-дова́ со амэ сам паша́ Лэ́скирэ масэ́ндыр; амэ сам Лэ́скирэ лоча́тыр и Лэ́скирэ кокалэндыр.

31“Палдава́ мэкэ́ла ману́ш пэ́скирэ дадэ́с и да, и явэ́ла тэ дживэ́л пэ́скирэ ромня́са, и ёнэ дуй явэ́на сы́рбы екх лоч.”

32Кадава́ гарадо́ чачипэ́н Свэнтонэ́ Чхиныбна́стыр исын баро́; мэ ракира́ва, со дава́ адя́кэ-паць отлыджалапэ кэ Христо́со, сыр и кэ Кхангири́.

33Нэ и адя́кэ-паць мэк кажно амэ́ндыр тэ сыкавэ́л паты́в пэ́скирэ ромня́кэ, сыр кокоро́ пэ́скэ; и мэк джувлы́ тэ дарэл пэ́скирэ ромэстыр.

← Chapter 4 Jump to: Chapter 6 →