Hosea 14

Romani Baltic (Библия - Пэ Балтитко Романи чиб (Романэс) 2019)

← Chapter 13 Jump to:

1[13.16-ю.о.] Мануша́ Самариятыр явэ́на бангэ́ палдова́, со ёнэ кэрдэ́ бу́нто проти лэ́нгирэ Дэвлэ́стэ. Ёнэ пэрэ́на куртала́тыр, лэ́нгирэ бияты явэ́на росчингирдэ (пэкадэ) пэ котэра́, и лэ́нгирэ пхарэ́ джувлятыр отлэна тыкнэмасэн.’

2О Израиле! Рисёв палэ кэ Рай Дэвэ́л, тыро́ Дэвэ́л, пал-дова́ со ту обштадянпэ ґэрьяса пал пэ́скиро чорипэ́н.

3Лэн пэ́са мангипнытка лава́ и рисён палэ кэ Рай Дэвэ́л, ракирэ́н Лэ́скэ: “Отмэк амэ́нгэ саро́ чорипэ́н и прилэ́ амэн ласкаса, соб (кай) амэ́нгэ тэ янас свэ́нта дыибэна́ амарэ́ уштэндыр.”

4Асуро (Асирия) буты́р на явэ́ла тэ ракхэ́л амэн, амэ на ява́са тэ традас уклистэ́, и амэ на ява́са буты́р тэ ракирас пэ буты́ амарэ́ вастэнгири: ‘Тумэ́ сан амарэ́ дэвэла́’; пал-дова́ со и пироты (бидадэнгирэ чхаворэ́) латхэ́на ла́ска Ту́тэ.”

5Мэ састякирава лэн далэ́стыр, со ёнэ отпынэ (дуринэ) Ма́ндыр, Мэ сыкава́ва ла́ска лэ́нгэ илэ́стыр; пал-дова́ со Мири́ холы́ рисия́ криг лэ́ндыр.

6Мэ ява́ва сы́рбы пахлын (роса) ваш Израилё и ёв явэ́ла тэ лулудёл сыр лилия, и ёв мэкэ́ла пэ́скирэ ко́рни (рукха́) сы́рбы дрэвы пэ Лива́но.

7Лэ́скирэ рандя́ (вэ́тки) розбуглёна (розмэкэнапэ), и лэ́скири шук (гожыма) явэ́ла сы́рбы маслинитко кашт и лэ́скиро лачхэ́ – сунгакиро кхандыпэн (парфуны) явэ́ла сы́рбы кедрэндыр пэ Лива́но.

8Ёнэ, савэ́ явэ́на тэ дживэ́н тэл Мири́ зэр (засенка), рисёна и ёнэ явэ́на тэ отджидён сы́рбы гив, и явэ́на тэ барьён сы́рбы винаграды́тко кашт. Ёнэ явэ́на лачхэ́с тэ пахнисон сы́рбы мол (вино) Ливаностыр.”

9Ефре́мо пхэнэ́ла: ‘Со ма́нгэ ишчо (инкэ́) трэй идолэндыр?’ Мэ отпхэнава лэ́скэ: ‘Мэ ява́ва тэ шунав, и тэ дыкха́в пал ту́тэ? Мэ ява́ва сыр кипарисо, саво́ розмэкця, Рай Дэвэ́л, патря (листы). Ма́ндыр явэ́на ту́тэ баритка (пло́ды).’

10Кон исын годо́, соб (кай) ёв тэ ґалёл сарэ́ далэ́ лава́? Кон исын барэ́-годя́киро, соб (кай) ёв тэ джинэ́л дава́ саро́? Пал-дова́ со Ра́скирэ-Дэвлэ́скирэ дрома́ исын чачунэ́, и чачипнаскирэ мануша́ псирэ́на пир лэ́ндэ, нэ чорипэ́н-кэрибнаскирэ обштавэнапэ пир лэ́ндэ.

← Chapter 13 Jump to: