Jonah 2

Romani Baltic (Библия - Пэ Балтитко Романи чиб (Романэс) 2019)

← Chapter 1 Jump to: Chapter 3 →

1Ѓа́да, о Рай Дэвэ́л выкэдыя́ барэ́ мачхэс (китос), соб (кай) ёв тэ накхавэл (тэ проглынинэл) Ёнас. И Ёна сыс дро пэр китоскиро трин дывэса́ и трин ратя.

2Тэ́ньци мангдя́пэ о Ёна Ра́скэ-Дэвлэ́скэ, лэ́скирэ Дэвлэ́скэ китоскирэ пэрэстыр.

3И пхэндя́ ёв: “Мэ дыём го́дла тэ помогинэл кэ Рай Дэвэ́л, сыр притасадэ ман, и Ёв отпхэндя́ ма́нгэ. Мэ дыём го́дла тэ помогинэл самонэ хорипнастыр тэл пхув, и Ту шундя́н мири́ зан (глос).

4Пал-дова́ со Ту чхурдыян ман дро хорипэ́н пэ са́мо морёскиро (дэрьявэ́скиро) ило́. И панинга́ обчхудэ ман трусця́л; и тырэ́ барэ́ панинга́, со кунинэнапэ, и валны прогинэ́ пирда́л ма́ндэ.”

5Тэ́ньци мэ пхэндём: “Ман вычхурдынэ Тырэ́ якхэ́ндыр, нэ мэ нэвэ́стыр ява́ва тэ дыкха́в пэ Тыри́ Свэ́нто Кхангири́.

6Паня́ обчхудэ трусця́л ман, аж кэ миро ди; бидугноскиро хорипэ́н (бездна) учхакирдя́ ман; морёскирэ (дэрьявэ́скирэ) чарья́ закхудэпэ трусця́л миро шэро́.

7Мэ догиём кэ бэргэнгиро дугно (дно): пхув пэ́скирэ штабэнца закэрдяпэ пал ма́ндэ; нэ Ту, Раё Дэ́вла, миро Дэ́вла, лыджиян джидэс миро ди яври́ люностыр (адостыр).

8Ке́ли миро ди замыя́ дро ма́ндэ, мэ пририпирдём Рас-Дэвлэ́с, и миро мангипэ́н гия́ упрэ́ кэ Ту, дрэ Тыри́ Свэ́нто Кхангири́.

9Кодолэ́, кон кэрэ́ла паты́в идолэ́нгэ, савэ́ нисо́ на мол, ячкирдэ́ Тут, Кон дэ́ла бахталыпэ́н.

10Нэ Мэ яна́ва свэ́нто дыибэ́н Ту́кэ мирэ́ заня́са тэ парикира́в ту́кэ; Мэ кэра́ва дова́, со Мэ совлахадём. Зракхибэ́н исын Ра́стыр-Дэвлэ́стыр.”

11И припхэндя́ Рай Дэвэ́л китоскэ, и ёв вычадыя Ёнас пэ шуки́ пхув.

← Chapter 1 Jump to: Chapter 3 →