Jude 1

Romani Baltic (Библия - Пэ Балтитко Романи чиб (Романэс) 2019)

Jump to:

1Юдастыр, Исусо́скирэ Христосо́скирэ писхаристыр, Яково́скирэ пшалэстыр, манушэ́нгэ, савэ́ ячнэ́ дро́га Дэвлэ́скэ Дадэ́скэ, и савэ́н Ёв прикхардя, и савэ́н зракхця́ Ису́со Христо́со:

2мэк тангипэ́н, и рама́нё (миро), и пшалы́тко паты́в тэ явэ́л дыно́ бут буты́р тумэ́нгэ.

3Дро́га мирэ́! Мэ камдём хачкирдэ́ илэ́са тэ чхинав тумэ́нгэ пал амаро́ кхэтано зракхибэ́н, мэ гиндём, со трэиндя́ тэ чхинав тумэ́нгэ, соб (кай) тэ подрикирав тумэн тэ тэрдён пал патяибэ́н, саво́ е́кхвар и ваш сарэ́нгэ Дэвэ́л дыя́ свэнтонэ́ манушэ́нгэ.

4Пал-дова́ со вари-савэ́ мануша́ чораханэ́с попынэ машки́р тумэ́ндэ, савэ́ ґара́ сыс отдынэ́ пэ сэ́ндо. Ёнэ исын бидэвлыткарья, ёнэ пиририскирдэ Дэвлэ́скиро бахтякирибэ́н дро вольныма тэ кэрэ́н, со камэ́на, и ёнэ на приґалёна Екхэ Рас-Барэс, амарэ́ Рас-Дэвлэ́с, Исусо́с Христосо́с.

5Мэ кама́м тэ ракира́в, соб (кай) тумэ́ тэ рипирэ́н, мэк тумэ́ е́кхвар джиндлэ́ саро́ дава́, со Рай Дэвэ́л зракхця́ манушэ́н Египто́скирэ пхувья́тыр, а коригэды́р (позжэ) одолэ́н, савэ́ на патяндынэ́, Ёв мулякирдя́.

6И Янголэн, савэ́ на зракхнэ́ пэ́скиро англатуно́ право дрэ паты́в, а ячкирдэ́ пэ́скиро штэ́то тэ дживэ́н, Ёв ракхэ́ла лэн дро калыпэ́н дрэ вечна састыра́ пэ баро́ Дывэ́с, ке́ли лэн явэ́ла Ёв пхарэ́с тэ сэндякирэ́л;

7адя́кэ сыр Содо́мо и Гомо́ра и пашатунэ́ форицы, савэ́ адя́кэ-паць, сыр одолэ́ Янго́лы отдынэ́ пэс пэ блэ́ндо и ваш тырдыпэ́н кэ яви́р манушы́тко лоч: далэ́ фо́рья сыс схачкирдэ́ вечнонэ яга́са сыр приме́ро (сыкаибэ́н) тумэ́нгэ.

8Нэ адя́кэ-паць явэ́ла кадалэ́ манушэ́нца, савэ́ дыкхэ́на сунэ́ и магирэна пэ́скири лоч; ёнэ на приґалёна Дэвлэ́скиро право и калякирэна зорья, со исын дро Болыбна́скиро Раё.

9Нэ Михаило Архангело выракирдя налачхэскэ, ке́ли ёнэ ракирэ́нас екх екхэ́са пал Мойза́скирэ маса́, Михаило на сыс муршкано́ тэ калякирэл налачхэ́с, нэ пхэндя́: “Мэк Дэвэ́л тэ припхэнэл Ту́кэ.”

10А кадалэ́ мануша́ калякирэна дова́, со ёнэ на джинэ́на, и дова́, со ёнэ ґалёна фэ́ни сыр билавэнгирэ мурдала́; дро дова́ ёнэ поддэнапэ грэхоскэ.

11Бида лэ́нгэ! Пал-дова́ со ёнэ гинэ́ Каиноскирэ дромэ́са и пал барвалыпэ́н ёнэ кокорэ́ отдынэ́ пэс грэхоскэ, сыр Валамо и ёнэ мэрэ́на дро бу́нто, сыр Кареё.

12Кадалэ́ мануша́ сы́рбы макхэна тумарэ́ дэвлыканэ свэ́нки: ёнэ свэнкинэна тумэ́нца би дара́киро и чалякирэна фэ́ни кокорэ́ пэс. Ёнэ исын сы́рбы о́блоки бипанескирэ, савэ́ балва́л традэ́ла. Ёнэ исын сы́рбы восенякирэ кашта́ бибарьякирдэскирэ, савэ́н выкошнэ и, савэ́ мулынэ дуй мо́лы;

13ёнэ исын сы́рбы морёскирэ (дэрьявэ́скирэ) холямэ́ валны (вэлны), учхакирдэ пенаса пэ́скирэ ладжаипнытконэ рэндэ́ндыр (делэндыр); ёнэ исын сы́рбы чэргэня́, савэ́ на джинэ́на дром, савэ́нгэ исын ракхно калыпэ́н (цямлыпэ́н) пэ ве́ки.

14И Енохо, эфта́то Адамостыр, ангилпхэндя пал лэ́ндэ: ґа́да, Рай Дэвэ́л джа́ла тысёнцэнгирэ дэшытконэнца Пэ́скирэ свэнтонэндыр,

15тэ кэрэ́л сэ́ндо пэ сарэ́ манушэ́ндэ и тэ бангякирэл сарэ́н надэвлытконэн машки́р лэ́ндэ пал лэ́нгирэ надэвлытка рэ́нды, савэ́ ёнэ кэрдэ́ и пал сарэ́ пхарэ́ налачхэ́ лава́, савэ́ кадалэ́ бидэвлыткарья-грэхи́тка мануша́ ракирдэ́ проти Дэвлэ́стэ.

16Ёнэ исын холямэ́ ракирибнарья, савэ́ рикирэ́на холы́ пэ сарэ́ндэ, ёнэ кэрэ́на пир пэ́скиро грэхи́тко тырдыпэ́н; ёнэ явэ́на вучэ́с тэ марэ́н пэс лавэ́нца, ёнэ явэ́на гудлэс тэ дивинэнпэ пэ манушэ́ндэ ваш пэ́скири льго́та.

17Нэ тумэ́, дро́га мирэ́, рипирэ́н лава́, савэ́ ґарэдыр ракирдэ́ Апо́столы амарэ́ Ра́скирэ – Дэвлэ́скирэ, Исусо́скирэ Христосо́скирэ,

18со ёнэ пхэндлэ́ тумэ́нгэ: “Явэ́на мануша́ дро палатуно́ часо, со явэ́на тэ санпэ холямэс тумэ́ндыр, савэ́ явэ́на пир пэ́скиро грэхи́тко тырдыпэ́н.”

19Адалэ́ исын мануша́, савэ́ кэрэ́на групы машки́р манушэ́ндэ проти екх екхэ́стэ, ёнэ кэрэ́на пир пэ́скири годы́, лэ́ндэ нанэ Ду́хо (Фа́но).

20Нэ тумэ́, мирэ́ дро́га, барьён дро пэ́скиро свэ́нто патяибэ́н, мангэ́нпэ Дэвлэ́скэ Свэнтонэ́ Духо́са,

21ракхэ́н пэс дро Дэвлэ́скири ла́ска, ужакирэн амарэ́ Ра́скиро – Дэвлэ́скиро тангипэ́н тэ дэл тумэ́нгэ ве́чно джиибэ́н.

22Тангинэн манушэ́н, савэ́ кунинэнапэ дро патяибэ́н,

23нэ зракхэн явирэ́н дара́са, ке́ли тумэ́ лэ́на тэ вытырдэн лэн сыр лэн сы́рбы ягатыр, нэ ладжан (брыдинэн) лэ́нгирэ урибнастыр, саво́ исын магирдо́ лочаса (плотяса).

24И какана́ Екхэ́скэ, Лэ́скэ, Кон могинэ́ла тэ зракхэ́л тумэн, соб (кай) тумэ́ тэ на пэрэ́н дро грэ́хо, и кон могинэ́ла тэ чхувэ́л тумэн анги́л Пэ́скири сла́ва бидошэнгирэнца и дрэ бари ра́дыма,

25Екхэ́скэ Дэвлэ́скэ, амарэ́ Зракхибнарискэ пир Христосо́стэ, амарэ́ Ра́скэ-Дэвлэ́скэ тэ явэ́л сла́ва, барипэ́н, зоралыпэ́н и право ададывэ́с и пэ сарэ́ ве́ки. Ами́нь.

Jump to: