Zechariah 9

Romani Baltic (Библия - Пэ Балтитко Романи чиб (Романэс) 2019)

← Chapter 8 Jump to: Chapter 10 →

1Ангилпхэныбэ́н Ра́скирэ-Дэвлэ́скиро пэ пхув Хадрах, пэ Дама́ско ёв адя́кэ-паць (тэж) ячэ́лапэ; пал-дова́ со якх Ра́скирэ-Дэвлэ́скири исын пэ сарэ́ манушэ́ндэ, сыр и пэ сарэ́ Израилёскирэ, –

2И пэ Емафо, саво́ исын пашы́л лэ́стэ, пэ Ти́ро и Сидоно, пал-дова́ со ёв исын древа́н годо́.

3И кэрдя́ пэ́скэ Ти́ро вучарды́ (башня), скэдыя́ руп, сыр пра́хо, и сувнака́й, сыр мэл яври́ пэ га́са.

4Акэ, Рай Дэвэ́л кэрэ́ла лэс чорорэса и хасякирэ́ла зор лэ́скири дро мо́рё (дэрья́в), а кокоро́ ёв явэ́ла хасякирдо яга́са.

5Сыр дыкхэ́ла ла да Аскалоно и лэ́ла тэ дарэл, и Газа адя́кэ-паць лэ́ла тэ тринскирэлпэ, и Экроно; пал-дова́ со на выкэрлапэ э наде́я лэ́скири: на явэ́ла кра́ли дрэ Газа, нэ Аскалоно ячэ́ла би манушэ́нгиро.

6“Чужо нацыя лэ́ла тэ дживэ́л кэ Азото, и Мэ хасякира́ва пхутькирдэ́ Филистимлянэн.

7Мэ вытырдава рат лэ́скирэ мо́стыр и джунгалыпэ́н лэ́скирэ дандэндыр, и ёв пэрэла тэл зор Дэвлэ́скэ амарэскэ, и явэ́ла сыр барэнгиро дрэ Юда, нэ Екроно явэ́ла, сыр Евусеё.

8И Мэ чхува́ва лод (ста́но) пашы́л Кхэр Миро муял халадэ́ндэ, муял одолэ́ндэ, со псирэ́н англэ и палэ, и на явэ́ла буты́р ада́й тэ псирэ́л вэ́рго; пал-дова́ со акана́ Мирэ́ якхэ́нца Мэ ла́ва тэ дыкха́в пэ дава́.

9Ра́дынпэ зоралэ́с бахтятыр, Сионо́скири чхай, дэ го́дла радыма́тыр, Ерусалимо́скири чхай: акэ, кра́ли тыро́ явэ́ла кэ ту, чачипна́скиро и зракхибнаскиро, ковлэ́-илытко, уклисто пэ ослицатэ и пэ тэрнэ́ ослостэ, савэскири дай псирдя́ тэло ґа́мо.

10Тэ́ньци Мэ хасякира́ва марибны́тка вурдэна́ дро Ефре́мо и грэн дро Ерусалимо, Мэ хасякира́ва марибны́тко лу́ко; и Ёв пхэнэ́ла пал рама́нё манушэ́нгэ, и Лэ́скиро кралипэ́н явэ́ла морёстыр (дэрьявэстыр) кэ мо́рё (дэрья́в), и рэка́тыр (лэня́тыр) кэ/жы́ко пхувья́киро яго́ро (кэ ко́нцо).

11Акана́ пал ту́тэ – ваш рат мирэ́ пхэныбнаскиро заветостыр Мэ мэкава пэ во́ля тырэ́ стардэ манушэ́н далэ́ хорипнастыр, дро саво́ нанэ пани́.

12Рисён кэ тва́рдыма (диз) тумэ́, стардэ мануша́лэ, савэ́ндэ исын ишчо (инкэ́) наде́я! Дова́, пал со акана́ ракира́ва, Мэ отплэскирава ту́кэ (дуй мо́лы).

13Пал-дова́ со Мэ сыр лу́ко надтырдава Пэ́скэ Юдас и пхэрдякирава лу́ко Ефремоса, и ґазда́ва чхавэ́н тырэ́н, Сио́нэ, пэ чхупнар΄яндэ, Иония, и Мэ кэра́ва ту́тыр марибны́тко курта́ла зоралэ́-манушэскири.

14И явэ́ла упра́л лэ́ндэ Рай Дэвэ́л, и сыр блискавица вурняла яври́ марибны́тко буст (стрела) Лэ́скири, и загриминэла Рай Дэвэ́л дро ро́го (труба) и сыкадёла машки́р паш-дывэсы́тко (южно) рискирибнаскири балва́л.

15Рай Дэвэ́л янголэ́нгирэ-болыбна́скиро, лэ́ла тэ затэрдёл пал лэ́ндэ, и ёнэ лэ́на тэ хасякирэ́н и тэ штакирэн бара́, савэ́ чхурдэнпэ, ёнэ лэ́на тэ пьен и тэ дэн го́дла сы́рбы моля́тыр (виностыр) и пхэрдёна тахтая́ (чашы) ваш свэ́нта дыибэна́, сыр алтарёскирэ вэ́нглы.

16И зракхэ́ла лэн Рай Дэвэ́л, лэ́нгиро Дэвэ́л дро дова́ дывэ́с, сыр бакрэ́н Пэ́скирэ ґуртостыр; пал-дова́ со сыр куч бара́ пэ крали́тко стадык (коро́на), ёнэ явэ́на тэ зяинэн пэ Лэ́скири пхув.

17О, сыр баро́ исын Лэ́скиро лачхипэ́н и саво́ исын шукарипэ́н, гожыма Лэ́скири! Маро роспхандэла чиб тэрнэ́ манушэ́нгэ, и мол (вино) – тырнэ джувленгэ!

← Chapter 8 Jump to: Chapter 10 →