3 John 1

Romani Baltic Latin (Biblija - Pe Baltitko Romani čib (Romanes) 2019)

Jump to:

1Phurestyr, miré drogoné Gajoske, kon isyn drógo mánge čačipnása.

2Drógo miro! Me mangavape Devléske, sob (kaj) te javél kófo (pol'za) pe saró, so tu kerésa, sob (kaj) te javes tu sastó, adiáke-pac' syr tyró dúho (fáno) barjola.

3Pal-dová so me drieván obradyndjompe, kiéli devlýtka pšála javné i dophendle pal tyró čačipén, syr tu i dživesa pir čačipén.

4Vaš mánge nane baredýr rádyma, syr te šunav, so miré čhavoré dživéna pir čačipén.

5Drógo miro! Tu kerésa patiaibnytkes saró, so kerésa vaš devlytkoné pšalénge i čužoné manušénge,

6savé dophenenas angíl khangirí pal tyrí pšalýtko patýv, kiéli tu bičhavesas len dro drom, syr trej i, syr isyn lačhó Devléske, tedy tu kerésa lačhés;

7pal-dová so jone giné pal Xristosóskiro lav, jone na lyné nisó Najudendyr.

8Paldavá aménge trej te prilas šukár adasavé manušén, sob (kaj) ame moginasas te kerás butý khetané vaš čačipén.

9Me čhindjom khangirjake, ne Diatriefo, savéske javdiá pe godý te javél léngire šeralesa, na priléla dová, so me čhináva.

10Paldavá, kiéli me javáva, me dáva léske te ripirel pal dová, so jov keréla, syr jov zlydžala pljotki pe aménde. Ne jov adiáke isyn ĥálko ke davá, so jov i kokoró na priléla devlytkoné pšalén, i adiáke-pac' keréla proti odolénde, kon kaméla te prilel i iščo (inké) jov tradéla javrí len khangirjátyr.

11Miro drógo! Na jav tu adasavó, sob (kaj) te kerés čoripén, a jav adasavó, sob (kaj) te kerés lačhipén. Kon keréla lačhipén, odová isyn Devléstyr, a kon keréla čoripén, odová na dykhciá Devlés.

12Saré dophenena lačhipén pal Dmitrijoste (Mitraste), i čačipén adiáke-pac' pal léste; ame adiáke-pac' dočhuvasa amaró dophenybén i tumé džinéna, so amaró dophenybén isyn čačunó.

13Mánde but treindiá te čhinav tuménge, ne me na kamám te keráv davá černilasá i porésa;

14ne me patiáva, so syg me dykhavo tumen, i ame javása te rakiras muj ke muj.

15Te javél ramánjo (miro) túke. Piridena “paklono” túke malá. Piride “paklono” malenge (drugenge), kažnonéske pir lav. Amín'.

Jump to: