Ephesians 6

Romani Baltic Latin (Biblija - Pe Baltitko Romani čib (Romanes) 2019)

← Chapter 5 Jump to:

1Čhavorále, kandén peskiren daden, savé isyn Rástyr-Devléstyr, pal-dová so dro davá isyn čačipén.

2“Kutiákir (de patýv) péskires dadés i da”, davá isyn anglatunó zaphenyben dyné lavésa,

3sob (kaj) tu javes bahtaló i te dživés ĥará pe phuv.

4I tumé, dadá, na xan péskire čhavorén, ne barjakirén len pir Ráskire-Devléskiro sykliakiribén i prirakhiben.

5Pisharjále(raby), kandén péskire xulan pe phuv pir loč, kutiakiribnása (vagása) i darása saré tumaré iléstyr, syr Xristosós;

6na kerén davá vaš sykaibén, vaš manušéngiro šaribén, ne syr Xristosóskire pishárja, savé saré péskire iléstyr keréna pir Devléskiri vólia,

7dynarinén ilésa saré iléstyr, syr Ráske-Devléske, a na, syr manušénge;

8džinén tumé, so kažno manúš, kóli savó keréla lačhipén, to jov davá-pac' i doreséla pale Rástyr-Devléstyr, mek jov te javél pishári ci vól'no.

9I tumé, xulajale, adiáke-pac' otlydžanpe šukár ke péskire pishárja i na strahakiren len, džinén, so dro Bolybnáskiro Rajo isyn Xuláj vaš lénge i vaš tuménge i Jov kutiakirela šerá (rávnes) saré manušén.

10I dro kónco (dro jagóro) miré pšála, me kamám te phenáv tuménge, javén zoraledýr dro jekhipén Rása-Devlésa i Léskire baré zorjátyr.

11Ur'jen pe péste saré Devléskire mardýtko, sob (kaj) tumé mogindlé te terdjon proti nalačheskire frenta rendore (dielycy):

12pal-dová so ame sam na proti manušénde, a proti barydyrende i svetóskire thagar'jénde (kniaz'jende), savé xulainena pe davá ciamló (tjómno) svéto, proti benglané dúhi, savé isyn dro Bolybnáskiro svéto.

13Paldavá ur'jen saré Devléskire mardytka, sob (kaj), kiéli javéla nálačho dyvés, tumé mogindlé te terdjon proti, i saró te pirizorjakiren i te vyrikiren.

14I paldavá terdjon saré zorjátyr, podphandenpe simirísa čačipnastyr i ophandén pes patiaibnása syr sastruné ščytosa,

15i ur'jen péskire ĥerá, sob (kaj) te javén skedyné te džán i te rosphenén bahtalý zan pal ramánjo (miro):

16Ne fedýr saréstyr, len pésa ščýto patiaibnastyr, savésa tumé moginéna te murdiakiren saré nalačheskire xačkirdé maribnýtka bustiá (striély).

17I len adiáke-pac' zrakhibnaskiro šliemo, i Duhoskiri kurtála, so isyn Devléskiro lav,

18i dro kažno časo mangénpe dro Dúho (Fáno) kažnoné patierjasa (molitvasa), adiáke-pac' saró časo mangénpe Devléske pal saré devlytkonene;

19adiáke-pac' mangénpe Devléske i pal mánde, sob (kaj) mánge te javén dyné lavá, savé trej te rakiráv murškanés garadó čačipén pal bahtalý zan,

20vaš davá me i som bičhadó dre sastyrá, sob (kaj) me te rakiráv murškanés, syr i trej mánge te rakiráv.

21Ne sob (kaj) i tumé adiáke-pac' te džinén pal davá, so otlydžalape ke me i pal miré réndy, dová rosphenéla tuménge pal saró Tihiko, amaró drógo pšal i čačunó Ráskire-Devléskiro dynári;

22savés me i bičhadjom ke tumé vaš dová-pac', sob (kaj) tumé te udžinén pal aménde, i, sob (kaj) jov te podrikirél tumaré ile.

23Mek te javél ramánjo (miro) pšalénge i patýv ke javír manušá patiaibnása Devléstyr Dadéstyr i Rástyr-Devléstyr, Isusóstyr Xristosóstyr.

24Mek te javél bahtalypén sarénge, kon saré iléstyr rikiréla syr Drógima amaré Ras-Devlés, Isusós Xristosós dro péskiro iló. Amín'.

← Chapter 5 Jump to: