Esther 7

Romani Baltic Latin (Biblija - Pe Baltitko Romani čib (Romanes) 2019)

← Chapter 6 Jump to: Chapter 8 →

1I javné králi Amanosa pe svenkitko xabén ke králica Estéra.

2I phendiá králi Estere i dre davá javír dyvés pe svénko (bankiéto): “So isyn pe iló túte, králica Estéra? Davá javéla kerdó pir lav. I savó isyn mangipén tyró? Mek ke paš kralipén, davá javéla kerdó pir lav.”

3Tén'ci otphendiá králica Estéra, i phendiá: “Kóli me lathjom tangipén (žalima) dre tyré jakhá, o Králi, i kóli kralíske javéla pir iló, tedy mek te javél darindlo miro džiibén mánge, pir iló miro, i miré manušénge, pir miro mangipén!

4Paldavá so bikindle amen, man i miré manušén, pe tradypen krig, umariben i xasibén. Kóli ame te javas bikindle syr pishárja i pisharicy, to me javáva štyl, usajékh vérgo na riskiréla uriéža kralískiri.”

5I otphendiá králi Artaksiérkso, i phendiá kralicake Esterake: “Kon isyn adasavó, i kaj isyn kodová, savó sys tromalo (murškanó) dre péskiro iló te kerél adiáke?”

6I otphendiá Estéra: “Vérgo i nálačho manúš – kadavá isyn zahalo Amáno!” I Amáno strahadyja angíl kralíste i kralicate.

7I králi uštyjá dre bari xolyn péskiri svenkostyr moliasa, i gijá dre felatiniakiri únta (sado); ne Amáno jaciápe te mangél pal džiibén péskiro králica Estéra, pal-dová so jov dykhciá, so užakiréla les pánda (fuj sud'ba) kralístyr.

8Kiéli králi risijá felatiniakire untatyr pe štéto dro kher, kaj sys svénko, Amáno sys pyi ke čhuibén, pe savó sys Estéra. I phendiá králi: “Až kaméla i te lel pe zor králica dre kher mánde, kiéli me som!” Lav vygijá kralískire uštendyr, i začhakirde muj Amanoske!

9I phendiá Xarbona, jekh jevnuhendyr, savó sys pašýl kralíste: “Ĥáda, i vešyna (kašt) isyn”, savó kerdiá Amáno vaš Mardohiejoske, savó rakirdiá lačhipén vaš kralíske, isyn terdó pašýl kher Amanoskiro, vučipnása dre pandždešá kuniá. I phendiá králi: “Ublaven les pe léste.”

10Adiáke jone ublade Amanos pe kašt, savó jov kerdiá Mardohiejoske. Tén'ci bari xolyn kralískiri štylyja.

← Chapter 6 Jump to: Chapter 8 →