Galatians 6

Romani Baltic Latin (Biblija - Pe Baltitko Romani čib (Romanes) 2019)

← Chapter 5 Jump to:

1Pšalále, kóli manúš isyn uhtyldo dro vari-savó nálačho réndo (diélo), tedy tumé, savé dživéna pir dúho (fáno), poden vast (pomoginen) léske te terdjol pale pe čačunó drom kovlé ilésa, i dykhén pal péste, sob (kaj) tumé kokoré te na perén pe propatiakiriben.

2Pomoginen jekh jekhéske te lydžán pharipén, i dalésa tedy tumé spolninena Xristosóskiro Zakóno.

3A kóli vari-savó manúš ginéla pes vari-konesa, kiéli jov kokoró ničý na mol péstyr, tedy jov xohavela pes;

4ne mek kažno manúš te del čol (te sprobinel pes) péske, tedy jov javéla te radynélpe kokoró péskire keribnastyr, a na javire manušéndyr.

5Pal-dová so kažno manúš lydžála péskire džiibnáskiro pharipén.

6Mek manúš, savó sykljola, te del paš péskire mištypnástyr kodoléske, kon sykliakiréla les.

7Na denpe dukhá: Devlés naštý te xohavél; dová, so manúš čhuvéla dre phuv, dová-pac' jov i skedéla.

8I kon čhuvéla dre phuv vaš péskiri loč (plot'), odová čhinela krig aplodostyr Duhoskiro meribén, a kon čhuvéla dre phuv vaš Dúho (Fáno), kodová sčhinela aplodostyr viéčno džiibén Sventoné Duhóstyr:

9kiéli ame kerása šukár, tedy aménge te na khinjovas, pal-dová so ame javása te skedas aplodo dro péskiro časo, kóli ame na perasa dro dúho (fáno).

10Paldavá, kóli isyn časo/saštypen, to javása te kerás lačhipén sarénge, i drieván fedýr kodolénge, savé isyn pšála pir patiaibén.

11Dykhén, savé baré bukvenca me čhindjom tuménge miré vastésa.

12A odolé, savé kaména te sykavén pes pir loč manušénge, začhuvena tumen te občhinenpe, jekh vaš dová, sob (kaj) len te na tradén pal Xristosóskiro trušúl.

13I jone kokoré, savé isyn občhindlé, na rikiréna Zakóno, ne jone kaména, sob (kaj) tumé te občhinenpe vaš dová, sob (kaj) te šarenpe, so jone kerdé občhinyben pe tuménde.

14Ne mánge te na šaravpe nisosa, jekh amaré Ráskire-Devléskire, Isusóskire Xristosóskire trušulesa, pir Konéste svéto isyn primardo pe trušúl vaš mánge, i me adiáke-pac' vaš davá svéto.

15Pal-dová so, kon isyn dro jekhipén Xristosósa, na značinela nisó: ni občhinyben, ni naobčhinyben, a nevó manúš.

16I kodolénge, kon dživéla pir davá uphenybén, te javél pe lénde ramánjo (miro) i tangipén (láska) i pe saré Devléskire manušénde.

17Paldavá adiáke: mek nikón te na pharjakirel man, pal-dová so mánde isyn Isusóskiro šramy (morima) pe masá.

18Mek bahtalypén amaré Ráskire-Devléskire, Isusóskire Xristosóskiro te javél tumaré Duhósa, pšála. Amín'!

← Chapter 5 Jump to: