Habakkuk 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Anglatunó dykhibén, savó proróko Avakumo dykhciá.

2Kicý, me javáva te kharav Tut, Rajo Dévla, i Tu na šunesa, kicý me javáva te godlav Túke pal “nahratyma!” Ne Tu na désa vast te rakhés amen.

3Sóske Tu désa mánge te dykháv čoripén, i kerésa adiáke, sob (kaj) me te dykháv mén'ki? Pal-davá so čorja i nahrata réndy isyn angíl miré jakhá, manušá košenape i čingardenape.

4Pir dová Zakóno jaciá bizorjákiro (našadia zor), i nane čačunó séndo. Fuj manúš pirizorjakirela čačuné manušés, a séndo riskirena, syr kaména.

5“Dykhén maškír narody, i pridykhenpe, i ake – tumé keréna baré jakhá!”, – rakiréla Raj Devél. Pal-dová so Me keráva dasavo réndo dre tumaré dyvesá, dro savó tumé na javéna te patián, na dykhí pe dová, so tuménge rosphenena.

6Pal-dová so Me, ake, ĥazdáva Xaldiejen, kirki i sýgno nacyja, saví kharélape (dviginelape) pir phuvjákiro buĥlypén, sob (kaj) te zauhtylen džiibnáskire štéty, savé isyn na léngire.

7Jone isyn darakune i trašane manušá: pharó séndo keréla léngiri zor, léndyr kokorendyr vydžála séndo.

8Léngire grajo isyn sygedýr lieopardendyr i jone isyn xoliamedyr bel'velitkone ruvendyr. Léngire uklistengire xaladé tradéna baripnasa; léngire graja javéna duripnastyr; jone prastána sýrby vurniala órlo (kído), savó sygedýr javéla te xal doresybén.

9Jone saré javéna te odlen nahrates, mina pe léngire muiá riskirdy pe vastóko, jone skedéna pliennonen sýrby práho.

10Jone sykavéna bipatyv ke králja, jone sanape xoliames thagar'jendyr, jone prosana kažno tvárdyma (diz), pal-dová so jone čhuvéna valy phuvjátyr i zauhtylena len.

11Tén'ci léngiro dúho (fáno) parudjola i jone džána syr balvál, i jone keréna čoripén: léngiro zor jačélape vaš lénge syr léngiro devloro.

12Ci na san Tu viekendyr i pe saré viéki, O, Rajo Dévla, miro Dévla, miro Jekh Svénto, – ame na merasa. Tu, Rajo Dévla! Tu vykedyjan len, Xaldiejen, vaš pharó séndo pe aménde. E, Skála! Tu dyján zor lénge te pirisykliakiren amen.

13Tyré jakhá isyn drieván svénta, sob (kaj) te dykhén pe daja bibáht, i lénge naštý te dykhén fuipén. Sóske Tu dykhésa kodolén, savé keréna zlydnitkes, i Tu na rakirésa nisó, syr bibahtaló manúš xasiakiréla odolés, savó isyn čačunedyr léstyr?

14Sóske Tu kerésa adiáke, so manušá jačénape syr morjoskire (derjavéskire) mačhé, syr capnia, pe savénde nane barydyró?

15Jone, Xaldiei, starena manušén vendkasa, jone uhtylena len dre léngiri khudý (siet'), i jone skedéna len dro léngiro nievodo, paldavá jone drieván radynénape, i jone isyn viesiéla (lošalé).

16Paldavá jone janéna svénta dyibená léngire khudiake i jone xačkirena dróga smóly léngire nievodoske; pal-dová so khudiatyr léngiri dólia (paš) isyn barvaly, i pe léngiro skamínd isyn but xabena.

17Ci javéna jone iščo (inké) te čhučakiren péskiri khudý, i duredýr te marén (te muliakirén) manušýtka nácyi bi tangipnaskires?

Jump to: Chapter 2 →