Joel 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Lav Ráskire-Devléskiro, so javdiá Ioiljoske, čhavéske Vafuiloskireske [Petuiloskireske-ju.o.]

2Šunén davá, tumé phurydyrá (godephuré), i pričhuvén kan saré, kon dživéla pe daja phuv! Ci sys dasavo dre tumaré dyvesá, ci dre dyvesá tumaré-dadengíre?

3Phenén tumaré čhavorenge pal davá, mek tumaré čhavoré te phenén léngire čhavorenge, i léngire čhavoré javire rodóske:

4dová, so mekciá listengiro kirmo (gusienica), pohaia phakitko skočko (saranča), ne dová, so mekciá phakitko skočko, pohaia kirmo, ne dová, so mekciá kirmo, pohaia bambula (žuko).

5Džangadjon, matymarjale, i rovén kirkes, i tuginen rovibnasa, saré, kon p'jela mol (vino) pal brodno (vinagradýtko) sóko (xum), pal-dová so jov isyn otlyno tumaré uštendyr.

6Pal-dová so but zoralé manušá javné pe Mirí phuv, so naštý len te pogines; léngire dandá isyn syr ščereste (lievoste), i léngire žandy isyn syr ščerihate (lievicate).

7Jone kerdé Miré-vinagradytkone bar'jendyr čhučí phuv, i jone phagirdé Miro inžyritko drévo, jone lučkirde cýpa léstyr i čhurdyné la javrí: léskire randiá jačné parné.

8Rovén zoralés, manušále, i podphandenpe žalobnone balytkone gonesa, sýrby patyvalý terný džuvlý, kon tuginela pal romeste péskire ternypnastyr.

9Butýr na janéna marune svénta dyibená i thadune svénta dyibená dre Khangirí Ráskire-Devléskiri. E rašaja, kon keréla butý vaš Ráske-Devléske, zoralés tuginena.

10Félda čhučakirdy (pustošono), i phuv zoralés tuginela, pal-dová so givá občorde, vyšutija brodno sóko (xum), i maslinitko dzet (maslina) xasijá.

11Ladžan tumé, kon san phuvjákire butiarné, tuginen rovibnasa, tumé, kon san vinagradarja, pir parnó giv i ĥersto (jačmienjo), pal-dová so feldakire givá xasiné.

12Vinagradýtko bar šutija, i inžyritko drévo zašutija, i granatytko drévo, i pal'ma adiáke-pac', i phabalin – saré drevy pe félda zašutine, dykhén, nane butýr rádyma manušéngire čhavénde.

13Podphandenpe žalobnone balytkone gonesa, i rovén zoralés tumé, kon san rašaja: tuginén rovibnasa, tumé kon keréla Devléskiri butý angíl altárjo. Javén, pasjon sarí rat, dre žalobna balytka goné tumé, kon keréla butý miré Devléske; pal-dová so butýr na janéna svénto dyibén givestyr i thaduno svénto dyibén dre Khangirí tumaré Devléskiri.

14Poden zvies' (zan) pal svénto posto, kharén te javén pe svénto skedyibén, keden phurydyren (godephuren) i saré manušén dalé phuvjátyr dre Khangirí Ráskire-Devléskiri, tumaré Devléskiri i prikharen zoralés Ras-Devlés.

15Dévla! Savó Dyvés ž da javéla! Pal-dová so Ráskire-Devléskiro dyvés isyn pašýl; jov javéla sýrby xasibén Sarezorjakirestyr.

16Ci da na xasjola xabén aménde pe jakhá, i rádyma i viesjolyma (loš) kheréstyr amaré Devleskirestyr?

17Ziárki kirnyne tel léngire komki, piraliá (kladovki) jačné čhučé; šurny phagirdé, pal-dová so giv vyšutija.

18Syr pharés murdalá (žyvotna) dyhinena! Gurty guruvén isyn sýrby nasvale; pal-dová so lénde nane čaritka félda, adiáke-pac' i stády bakréngire menčynenape.

19O Rajo Dévla! Me zoralés kharáva Tut, pal-dová so jag pohaia čaritka féldy pe čhučí phuv, i xačkiribén xačkirdiá saré drevicy pe félda.

20Murdalá pe félda adiáke-pac' kharéna Tut, pal-dová so rekicy (lenorjá) paniésa vyšutine, i jag pohaia čaritka féldy pe čhučí phuv.

Jump to: Chapter 2 →