Malachi 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1“Ake, Me bičhaváva Miré Jangolós (zvies'-janybnaskires), i jov keréla drom angíl Mánde. O Raj Devél, Saves rodéna tumé, javéla ke Péskiri Khangirí, i Jangólo (zvies'-janybnaskiro) pe davá zavieto, Saves kaména tumé: ake, Jov džála”, – rakiréla jangoléngire-bolybnáskiro Raj Devél.

2Ne kon vyrikiréla [saštý te vyrikirel-ju.o.] davá dyvés, kiéli Jov javéla? Kon vyterdjola [saštý te vyrikirel-ju.o.], kiéli Jov sykadjola? Jov javéla sýrby jag, saví rozbilavela (rosplavinela), sýrby šutlo sapuni (ščolko), savó žužakirela rup.

3Jov bešéla sýrby spieco, savó piribilavela (piriplavinela) i žužakirela rup, i Jov žužakirela čhavén Lievijoskiren i piribilavela len syr suvnakáj i rup, sob (kaj) jone saštý te janén Ráske-Devléske svénto dyibén dro čačipén.

4Tén'ci svénto dyibén Judáskiro i Jerusalimoskiro javéla lačhó Ráske-Devléske, syr dre garatune beršá, syr dre beršá vagedyr (angledýr).

5I Me javáva pašyledýr ke tumé te sendiakirav pharés tumen; Me javáva syr sýgno dudvalo (obličytieljo) proti džinybnaskiren pir čergeniá (čaradiejen), proti biladžakuneskiren (blendar'jen), proti odolénde, kon xohanés sovlahala; proti odolénde, kon xohavela lavénca butiarnen, i proti odolénde, kon pritasavela pivlien (udoven), i piroten (siroten), i proti odolénde, kon risjola dumesa ke javire – theméskire-manušéskiro pravo, – adiáke syr jone na daréna Mándyr”, – rakiréla jangoléngire-bolybnáskiro Raj Devél.

6“Pal-dová so Me, Raj Devél, na parudjovava, paldavá tumé, čhavé Jakovóskire, na xasiné.

7Ne tumé risiné krig Miré statutendyr (ustavendyr) dolé dyveséndyr, kiéli sys tumaré dadá, i tumé na rakhne len. Risjon ke Me, i Me risjováva ke tumé”, – rakiréla jangoléngire-bolybnáskiro Raj Devél. Ne tumé rakiréna: ‘Syr aménge te risjovas?’

8Ci saštý manušéske te xohavél Devlés? Ne tumé ž xohavena Man! Ne tumé phučena: ‘Dro so ame xohadiam Tut?’ – Dre dešengirja i dre svénta dyibená.

9Pe tuménde phendlé armania (tumen prokošne), ne tumé xohade Man, tumé – sarí tumarí nacyja.

10Janén céla dešengirja dre piralý, sob (kaj) te javél xabén dro Miro kher, i sprobinen Man dalésa akaná, – rakiréla jangoléngire-bolybnáskiro Raj Devél, – ci psiravava (otkerava) Me fenštry pe bolybén i bičhaváva tuménge adákicy bahtiakiribena, sob (kaj) te na uhtylel štéto te prilén len.

11I Me keráva adiáke, so kirme butýr te na xan sarésa barjakirdé (plódy), so tumarí phuv déla, i sob (kaj) vinagradýtko xrústo te na pirijačel te del múri pe félda,” – rakiréla jangoléngire-bolybnáskiro Raj Devél;

12I saré manušýtka nácyi javéna te kharén tumen bahtalenca, pal-dová so tumarí phuv javéla kamly, – rakiréla jangoléngire-bolybnáskiro Raj Devél.

13Tumé phendlé xoliamé lavá pe Mánde, – rakiréla Raj Devél, – Ne tumé phučena: So dasavo ame rakirasa pe Túte?

14Tumé ž phendlé: “‘Nane mol te dynarinás Devléske; i savó kófo (pol'za) isyn daléstyr, so ame rakhasa Léskire statutna uphenybená, i so ame psirasa tugasa (piečaliasa) angíl jangoléngire-bolybnáskire Raste-Devléste?

15I akaná ame dykhasa i rakirasa, so phut'kirdé manušá isyn bahtalé, pal-dová so odolé, kon keréla zlydnima (fuipén), dživéna fedýr dyvés dyveséstyr, i, čačó, kodolé, savé propatiakirena Devlés, jačénape džidé [bidošakire-ju.o.].’”

16Tén'ci odolén, savé darándyne Rástyr-Devléstyr i rakirdé jekh jekhéske: “Len o Raj Devél léla te šunél i pošunela; i adiáke čhindiape lylvarí ripiribnytko angíl Léste pal kodolende, kon daréla Rástyr-Devléstyr i rozlela godiása [rikiréla dro iló-r.s.] Léskiro lav.”

17Jone javéna Miré, – rakiréla jangoléngire-bolybnáskiro Raj Devél, – dro dová dyvés, syr Me keráva léndyr Miro kučipén. I Me javáva te tanginav (žalinav) len, syr o manúš tanginela Péskire čhavés, savó dynarinela léske.

18Tén'ci tumé nevéstyr rozĥaljona lačhés maškír patiaibnaskirende i fujé manušénde; maškír kadalende, kon dynarinela Devléske i odolénde, kon na dynarinela Léske.

← Chapter 2 Jump to: Chapter 4 →