Micah 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Ake, sys lav Ráskire-Devléskiro, savó javdiá Mihiejoske Morasfiejostyr dre dolé dyvesá, kiéli sys trin králja Judejákire: Iofámo, Aházo i Jezekíia. Davá lav Devél sykadiá léske dre suné, so javéla Samarijasa i Jerusalimosa.

2‘Šunén, saré manušýtka nácyi (narody), phuv i saró, so isyn pe láte! Mek te javél Raj Devél syr jakhítko (svidietieljo) proti tuménde, o Raj Devél Léskire sventoné Khangirjátyr.

3Dykhén! Ake, Raj Devél vydžála Léskire štetóstyr; Jov džála telé, i Jov javéla te štavel (te terdjol) pir vučé štéty pe phuv.

4Bérgi javéna te bilaven tel Léste, i doly javéna te pharadjon, sýrby mom angíl jag, sýrby paniá, so čhuvenape krutymatyr (vučipnástyr).

5Saró davá pal Jakovóskiro čoripén, i pal gréhi, so kerdiá kher Izrailjoskiro. Savó isyn čoripén Jakovóskiro? Ci davá na pal Samárija? Save dalé isyn vučé štéty dre Judéia? Ci davá saró isyn na Jerusalimóstyr?

6“Paldavá Me keráva Samarijatyr gruda ruinendyr pe félda, – štéto, sob (kaj) te počhuven vinagrado: Me vyčhurdava lákire bará pe dólo, i Me otčhakirava lákire fundamienty.

7Saré lákire vyčhindlé muiá javéna phagirdé pe koterá (kuski), i saré lákire dáry, syr biladžakuné džuvliakire, javéna xačkirdé jagása. Me xasiakiráva saré lákire ídoly, pal-dová so joj (Samárija) kerdiá len pal dáry, so denape biladžakuné džuvliáke, i kadalé dáry risjona vaš dáry javire biladžakuné džuvliáke.”

8Paldavá me, Mihiejo, javáva te obrovav i te tuginav jasvénca, me džáva obriskirdo i nango; Me javáva i te vyinav syr šakaly, i te tuginav rovibnasa syr strausy.

9Pal-dová so Samarijakire fránsy (rany) isyn nasastiakiribnytka, pal-dová so jone doginé ke Judéia; jone doginé ke pórta miré manušéngiri, ke Jerusalimo.

10Na phenén davá dre Giefo, na rovén zoralés odój, ne učhakiren pes prahosa dro forico Ofra.

11Džán te dživén pe javír štéto, kon dživéla ke Šafiro, nange ke ladž; na našela, kon dživéla ke Caano (Caanano), Ecel' (Bet-Ecel') tuginela zoralés; davá roviben na mekéla tumen te terdjol dre léste.

12Kon dživéla ke Marofa (Marat), zanasvalyne pal lačhipén, ne bibáht javdiá telé Rástyr-Devléstyr ke pórta Jerusalimóskiri.

13Kon dživéla ke Lahiso, de andré ĥenšten dro vurdén maribnýtko; pal-dová so čoripén Izrailjoskiro lathné dre túte.

14Paldavá tu javésa te des počastúnki (dáry) ke Moriešef-Gief: ne kherá dro Ahzivo javéna xohanés te prityrden kral'jén Izrailjostyr.

15Ne Me janáva mištypén-prilyibnaskires (nasliednikos) ke tu, manušnije Moriešoskiri; i baripén Izrailjoskiro piridžala ke Odolamo.

16Ker péske plieška [zle péstyr balá-r.s.] i občhin péskire balá, kiéli iló tyró javéla te dukhal pal drogoné čhavénde tyrende. Barjakir péskiri plieška sýrby órlo (kído), pal-dová so jone džána dro pliéno tútyr.

Jump to: Chapter 2 →