Philippians 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1Kakaná, pšalále miré, radynénpe dro jekhipén Rása-Devlésa: mánge nane pharó te čhinav tuménge pal davá-pac', ne vaš tuménge davá isyn sykliaiben.

2Rakhénpe manušéndyr, savé keréna bibáht, syr džukela, rakhénpe xoliamé manušéndyr, rakhénpe xohané občhinybnastyr.

3Pal-dová so občhinyben davá isyn ame tuménca, savé mangénape Devléske Léskire Duhósa, i šarasape dro jekhipén Isusósa Xristosósa, i ame na drieván patiása dre loč (plot'),

4mek i me adiáke-pac' drieván patiáva dre loč; a kóli vari-kon javír kaméla te patial drieván dre loč, tedy mánde isyn butýr saštypen:

5me sómas občhindlo pe ohtóto (bidujéngiro déšto) dyvés, syr bijandyjom, me som Izrailjoskire rodóstyr, i me som Vieniaminóskire rodycóstyr, Judo Judendyr, i me som Farisiejo pir sykliakiribén;

6me sómas baró vérgo i xačkirdé ilésa tradyjom Xristososkiri Khangirí i pir Zakonoskiro čačipén me som bidošakiro;

7ne so vaš mánge sys l'góta, me lyjom te ginav pal xasibén vaš Xristosóske.

8I me ginava saró javír pal xasibén vaš dová, sob (kaj) butedýr te udžinav miré Ras-Devlés, Isusós Xristosós, vaš Léske me saréstyr otphendjompe, me saró ginava pal šuma (smieti), sob (kaj) mánge jekh te javav dro jekhipén Xristosósa;

9i te javav sarésa dro jekhipén Lésa na péskire čačipnása; savó isyn Zakonóstyr, ne čačipnása, savó isyn pir patiaibén dro Xristosóste, čačipnása, savó isyn Devléstyr pir patiaibén,

10sob (kaj) te udžinav Les i Léskire otdžidiakiribnaskiri zor, i te javav khetané dre Léskire mén'ki, i te merav, syr Jov.

11Sob (kaj) féni (tóka) te doresav otdžidiakiriben muléndyr ke džiibén.

12Ne pal-dová, so me ničý saró davá na dorescjom, i me na som kakaná bidošakiro, ne me pričhuvava zor te lathav, ci na lathava i me dová, pal so i lathiá man Isúso Xristóso vaš Péske.

13Pšalále, me ginava, so kokoró me na lathjom, ne jekh, so me bistrava dová, so jaciápe pale, i me džáva angíl,

14me prastava ke celjo, ke naj vučedýr patýv, vaš saví Devél khardiá man pir Xristosóste Isusóste.

15I adákicy, pe kicý améndyr isyn bidošakire manušá, lénge adiáke trej te duminen, a kóli tumé pal davá pe javír duminéna, to i davá Devél otčhakirela tuménge.

16Ne dová, so ame prilyjam, adiáke i ame javása te duminas i te dživás.

17Pšalále, pričhuvén zor te kerén adiáke-pac' syr me, i dykhén pe odolé manušénde, savé keréna dová-pac', syr i tumé duminéna pal aménde;

18pal-dová so but manušá, pal savénde me častes rakirdjom tuménge, a kakaná i jasvénca me rakiráva, keréna syr vérgi Xristosóskire meribnáske pe trušúl:

19jone isyn terdé pe drom ke xasibén, léngiro devel isyn kužum (želudko), i léngiri sláva isyn dre ladž, jone duminéna jekh pal dalé svetóskire réndy:

20pal-dová so ame sam džiibnarja themestyr (štetóstyr), savó isyn dro Bolybnáskiro Rajo, odothýr ame užakirasa i amaré Zrakhibnaris Ras-Devlés, Isusós Xristosós,

21Savó paruvela amaré xasibnýtka masá adiáke, so jov javéla te zdžal pe Léskire masá zorjása, savjása Jov čhudiá telé saró angíl Péste.

← Chapter 2 Jump to: Chapter 4 →