Zephaniah 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1Skedénpe tumé te obduminen, skedén tumé khetané, o biladžakuno manušýtko ródo;

2angíl dová, syr javéla Ráskire-Devléskiro uphenybén, angíl dová dyvés, so prourniala syr čhučó phus, angíl dová, syr te javél pe tuménde bari xolý Ráskire-Devléskiri; angíl dová dyvés, syr te javél pe tuménde Ráskire-Devléskiri xolý;

3rodén Ras-Devlés saré, savé isyn kovlé-iléskire pe phuv, kon rikirdia Léskiro čačunó Zakóno, rodén čačipén, rodén te javén rahmana (spokojna); saštý te javél, so tumé garadjona dro dyvés, syr javéla Ráskire-Devléskiri xolý.

4Pal-dová so manušá mekéna Gaza, i Askolonostyr jačélape čhučó (pusto) štéto; Xaldiei vytradena manušén Azotostyr dyvesé až dro paš-dyvés, i jone vyriskirena krig Ekrono.

5Bida pe manušénde, savé dživéna pe brégo morjoskiro (derjavéskiro); bída pe manušénde Kritostyr! Ráskire-Devléskiro lav isyn proti tuménde, o Xananiei, phuv Filistimijakiri: “Me rozmarava pe koterá tut; so na jačélape nijékh te dživél.”

6Morjoskire bregostyr jačénape čaritka phuvjá budénca (šalašenca) vaš čhupnar'jenge, i graženca (ovčarnikenca) vaš bakréngire ĥurty.

7Brégo javéla štéto manušénge, kon jačélape Judáskire kheréstyr; jone javéna te čaraven léngire-bakréngire ĥurty odój, bel'velienca jone javéna te pasjon dre kherá Askalonoskire: pal-dová so o Raj Devél, léngiro Devél, zaterdjola pal lénde, i riskiréla pale léngire manušén plienóstyr”.

8Me šundjom, syr obrakirelas Moávo, i syr rakirdé fuj lavá manušá Amonostyr, savénca jone obrakirenas Miré manušén, i syr jone šardepe nahrates (nahal'nes) te zauhtylen léngire miéžy”,

9Paldavá “Te dživáv Me”, – rakiréla jangoléngire-bolybnáskiro, Raj Devél, Devél Izrailjoskiro, – “Moavostyr jačélape dová, so sys Sodomasa, manušá Amonostyr javéna syr Gomóra, – syr phuv, saví zabarija cuknudása (striekavasa) i ĥanbiniénca (jamenca) vaš lond, i saví javéla ŭsády (sak) čhučí: Miré manušá, kon jaciápe džidó, rosčorena la, i Miré manušá, savé jačnépe pe štéto, len daja phuv syr péskiro meknó mištypén.

10Davá saró lénge javéla pal léngiro phut'kiribén, adiáke syr jone obrakirenas i ĥazdynépe xoliása proti manušénde, savé isyn jangoléngire-bolybnáskire, Ráskire-Devléskire.

11O Raj Devél javéla trašano vaš lénge; pal-dová so Jov rozmarela saré devloren pe phuv; manušá javéna te den patýv Léske, kažno manúš pe péskiro štéto, i pe ostrovy (džipá) saré manušéngire-rodengire.

12Tumen, Efiopy, adiáke-pac' pekavela Mirí kurtála.

13Jov pharés sendiakiréla Léskire vastésa paš-ratítko (sievierno) rig, i Jov rozmarela dre ruíny Asirija, i Jov keréla Ninievijatyr šukí golotýnia syr prahitko phuv.

14Kherítka stády, i kažno murdál (žyvotno), so isyn pe svéto, javéna te pasjon maškirál davá foróskiro štéto. Pielikano i nyglo/buzno (jožo) javéna te dživén pe gožakirde vyčhinybena, so isyn pe foróskire stýlby, léngire zaniá javéna te bagán dre fenštry (dudaliá); obriskirdo javéla léngiro progo; obsyiben pe kiedrytko kašt javéla lučkirdo.

15Kadavá javéla radymakiro fóro, savó dživdiá bi daripnaskires, konéskiro manúš phendiá dro péskiro iló: “Me som kadasavó, i nane butýr, baredýr mándyr!” Dykhén! Syr čhučó jaciá davá fóro, – štéto murdalénge te pasjon! Kažno manúš džála pašýl, déla šolia, i čhurdéla vastésa.

← Chapter 1 Jump to: Chapter 3 →