1 Corinthians 3

Romani from Romanian (E Romaii Biblia 2020 (Kăldărărihko))

← Chapter 2 Jump to: Chapter 4 →

1Sode pa mande, phralale, nasti dem tumengă duma sar une manušengă duxovničiskurea, ta trăbuisardea te dau tumengă duma sar khă manušengă lumeakă, sar varesar le gloatengă ando Kristoso.

2Me čeileardem tume thudesa, na kotora zuralença, kă našti dikhăn le; thai či akana orta našti dikhăn le,

3anda kă sa lumeakă san. Ande čeačimaste, kana maškar tumende sî kîrkote, čiungara thai phaŕadimata, či san tume lumeakă thai či juvin tume sar sî i le kolaver manuši?

4Kana iekh phenel: „Me sîm le Pavelohko!” Thai aver: „Me sîm le Apolohko: „či san tume manuši andai lumea?

5Kon sî o Pavelo? Thai kon sî o Apolo? Varesar kanditorea le Devllehkă, anda save pateaian; thai sakogodi palai zor dini lehkă le Raiestar.

6Me thodem te bareol, o Apolo tindeardeas, ta o Dell kărdea te bareol:

7kadea kă či kukoa kai thol ande phuw, či kukoa kai tindearăl nai khanči; ta o Dell, kai kărăl te bareol.

8Kukoa kai thol ande phuw thai kukoa kai tindearăl, sî sa iekh; thai sakogodi lela pehko potindimos pala pehko ašadimos.

9Kă ame sam andekhthan butearea le Devllesa. Tume san e phuw le Devllesti, o khăr le Devllehko.

10Pala o xaro le Devllehko, kai sas ma dino, me, sar khă buteari-vazdeari godeaver, thodem e temelia, thai aver vazdel opral. Ta orsao te lel sama mišto so vazdel opral.

11Kă khonikh našti thol aver temelia numai kodea kai sas thodini, thai kai sî o Isus Kristoso.

12Ta kana varekon vazdel pe kadea temelia, sumnakai, rup, bar kuči, kašt, khas, papura,

13e buti saorăsti avela dini anglal: o des le Raiehko kărălala prinjeandi, kă sîkavelala ande iag. Thai e iag čeačearăla sar sî e buti orsavesti.

14Kana e buti vazdii varekastar pe temelia kodea, ašel ande pînŕănde, o lela khă potindimos.

15Kana e buti lesti avela phabardi, xasarăla pehko potindimos. Sode pa leste, avela skăpime, ta sar andai iag.

16Či jeanen kă tume san o Templo le Devllehko, thai kă o Duxo le Devllehko bešel ande tumende?

17Kana varekon peravel o Templo le Devllehko, kodoles peravela les o Dell: kă o Templo le Devllehko sî sfînto: thai kadea san tume.

18Khonikh te na athavel tume: Kana varekon anda tumende pateal pe godeaver le veakohko kadalehko, te kărdeol dillo, kaste arăsăl xarano.

19Kă o xaraimos la lumeako kadalako sî khă dillimos angla o Dell. Anda kodea sî ramome: „O astarăl kolen le xaranen ande lengo čiorimos.”

20Thai pale: „O Rai prinjeanel le gîndurea kolengă le xaranengă. Jeanel kă sî întaină.”

21Khonikh te na delpe baro kadea le manušença, kă sa le butea sî tumară:

22avela o Pavelo, avela o Apolo, avela o Šifa, avela e lumea, avela e čivava, avela o mullimos, avena le butea dă akanara, avena kola le kolaver; sa sî tumară,

23thai tume san le Kristosohkă, ta o Kristoso sî le Devlklehko.

← Chapter 2 Jump to: Chapter 4 →