Hosea 11

Romani from Romanian (E Romaii Biblia 2020 (Kăldărărihko))

← Chapter 10 Jump to: Chapter 12 →

1Kana sas tărno o Israelo, kamaua les, thai akhardem Mîŕă šaves andoa Ejipto.

2Ta sodença le prooročea akharănas le, kaditi on dureonas: andine jertfe le Baalilengă, thai tămîia le tipurengă le idolurengă.

3Thai varesar Me sîkadem le Efraimos te phirăl, thai vazdem les ande angali; ta či dikhline kă me sastearauas le.

4Çîrdem lehkă phanglimatănça manušikane, le šelença le kamblimahkărănça, sîmas anda lende sar kukoa kai vazdel lengo xamo dă paša o mui. Bandilem karing lende thai dem le xamos.

5Či mai amboldena pe ando čem le Ejiptohko; ta o Asiriano avela lengo thagar, andakă či kambline te ambolden pe Mande.

6E sabia šudela pe pa lengă četăçi, xasarăla, xala lengă nikărditoren, andai doši le planurengo kai kărdine le.

7O poporo Muŕo sî thodino te dureaol Mandar; thai kana sî akharde parpale Kolestar le But Barăstar, či iekh anda lende či rodel te vazdel pe.

8„Sar te dau tu Efraime? Sar te nigrau tu Israelona? Sar te kărau tu sar o Çeboimo? Mardeol o illo ande Mande, thai sa Muŕo andraimos mištil pe millatar!

9Či kăraua buti paala Mîŕî xolli e astardi, či mai xasaraua le Efraimos; kă Me sîm o Dell, na khă manuši. Me sîm o Sfînto ando maškar tiro, thai či avaua te mudarau tu.

10On avena pala o Rai, sar khă leo kai xunxuila; kă O orta xunxuila, thai le šaoŕă prastena isdraindoi katar perălokham.

11Prastena isdraindoi andoa Ejipto, sar khă čirikli, thai andoa čem la Asiriako, sar khă gulumba. Thai kăraua le te bešen ande pehkă khăra, phenel o Rai.”

12O Efraimo delmaroata xoxaimatănça, thai o khăr le Israelohko xoxaimatănça. O Iuda sî sa phirdimahkobut angloa Dell, angla Kukoa o Sfînto thai pateamno.

← Chapter 10 Jump to: Chapter 12 →