John 11

Romani from Romanian (E Romaii Biblia 2020 (Kăldărărihko))

← Chapter 10 Jump to: Chapter 12 →

1Khă varesao Lazăro anda e Betania, o gau la Mariako thai la Martako, lati phei, sas nasfalo.

2E Maria sas kodea kai makhlea le Raies mirosa, thai khoslea Lehkă pînŕă pehkă balença, thai o Lazăr o nasfalo sas lako phral.

3Le pheia tradine koa Isus te phen lehkă: „Raia, dikta kă kukoa kai kames les, sî nasfalo.”

4Ta o Isus, kana ašundea e vestea kadea, phendea: O nasfalimos kadoa nai merimahko, ta sî andai slava le Devllesti, anda o Šeau le Devllehko te avel bareardo anda leste.”

5Thai o Isus kamelas la Marta, thai laka phea, thai le Lazăros.

6Ta kana, ašundea kă o Lazăr sî nasfalo, mai ašilo dui des ando than kai sas;

7thai pala kodea phendea le jenengă: „Aven te amboldas ame ande Iudea.”

8„Sîkaitorina”, phendine Lehkă le jene,” akana dă iekhatar rodenas le Iudeia Te mudarăn Tu baŕănça, thai Te amboldes Tu ande Iudea?”

9O Isus dea le angal: „Nai dešdui čeasuri ando des? Kana phirăl varekon desă či ambladeol, anda kă dikhăl e lumina la lumeati kadalati;

10ta kana phirăl varekon reate, ambladeol, anda kă nai les lumina ande leste.”

11Pala kadala orbe, phendea lengă: „O Lazăro, amaro amal, sovel: ta jeau te ušteavau les andai lindri.

12Le jene phende Lehkă: „Raia, kana sovel, sî te kărdeol mišto.”

13O Isus deasas duma pa lehko mullimos, ta on pateanas kă del duma poa xodinimos lino anda e lindri.

14Atunčeara o Isus phendea lengă anglal: „O Lazăro mullo.”

15„Thai bukurima kă či sîmas oče, anda tumende, kaste patean. Ta akana, aven te jeastar leste.”

16Atunčea o Toma, phendino Jeamăno, phendea le kolavră jenengă: „Aven te jeas i ame te meras Lesa.”

17Kana avilo o Isus, ašundea kă o Lazăro sas mullo dă štar des ando mormînto.

18Thai, anda kă e Betania sas paše le Ierusalimostar, ka dešupanji stadii,

19But anda le Iudeia avilesas andai Marta thai e Maria, kaste aven lença kă mullosas lengo phral.

20Kana ašundea e Marta kă avel o Isus, ankăstea lehkă anglal; ta e Maria bešelas ando khăr.

21E Marta phendea le Isusohkă: „Raia, te avino koče, nahkă merăll muro phral!

22Ta i akana, jeanau kă orso mangăsa kata o Dell, dela tu o Dell.”

23O Isus phendea lakă: „Teo phral juvindila.”

24„Jeanau”, dea les anglal e Marta, „kă avela te juvindil koa juvindimos, ando des pai urma.”

25O Isus phendea lakă: „Me sîm o juvindimos thai e čivava. Kon pateal ande Mande, orta i te mullino, traila.

26Thai orkon trail, thai pateal ande Mande, či merăla čiăkhdata.Pateas e buti kadea?”

27„E, Raia” phendea Lehkă oi,” pateau kă tu san o Kristoso, o Šeau le Devllehko, kai trăbulas te avel ande lumea.”

28Pala so phendea kadala orbe, găli thai akhardea čioreal pehka phea la Maria, thai phendea lakă: „Avilo o Sîkaitorii thai akharăl tu.”

29E Maria, sar ašundea, uštili iekhatar, thai gălitar Leste.

30Kă o Isus či avilosas înkă ando gau, ta sas sa ando than kai avilisas e Marta.

31Le Iudeia, kai sas la Mariasa ando khăr dikhline la kă uštilisas iekhatar thai ankăstindoi avri, găline pala late, kă phenenas: „Jeal koa mormînto, kaste rovel oče.”

32E Maria, kana arăsli kai sas o Isus, thai dikhlea Les, šudea pe ka Lehkă pînŕă, thai phendea Lehkă: „Raia, te avino koče, nahkă merăll muro phral.”

33O Isus, kana dikhlea la roindoi, la thai le Iudeien kai avilesas lasa, dukhadi'lo ande Lehko duxo, thai tulburisai'lo.

34Thai phendea: „Kai thodean les?” „Raia,” phendine Lehkă on,” av thai dikh.”

35O Isus rovelas.

36Atunčea le Iudeia phendine: „Dikta sode dă but kamelas les!”

37Thai iekh anda lende phendine: „O, kai pîtărdea le iakha le koŕăhkă, našti kărălas ka i o manuši kadoa te na merăll?”

38O Isus dukhai'lo pale ande Peste, thai gălo koa mormînto. O mormînto sas khă thanšudro, koa šutimos savehko sas thodino khă baŕ.

39„Den o baŕ rigate,” phendea o Isus. E Marta, e phei le mullesti, phendea Lehkă: „Raia, khandel pharăs, kă sî mullo dă štar des.”

40O Isus phendea lakă: „Či phendem tukă kă, te pateasa, dikhăsa e slava le Devllesti?”

41Line o baŕ andoa than kai pašleolas o mullo. Thai o Isus vazdea le iakha opră, thai phendea: „Daddna, naisarau Tukă kă ašundean Ma.

42Jeanauas kă orkana ašunes Ma; ta dau duma kadea andoa norodo kai bešel rigate, kaste pateal kă Tu trdean Ma.”

43Pala so phendea kadala orbe, çîpisardea muiesa zuralo: „Lazăre av avri!”

44Thai o mullo ankăsto le vastença thai le pînŕănça phangle le făšiença le poxtanehkă, thai le mosa învăluime ande khă pištiri. O Isus phendea lengă: „Pîtărăn les, thai mekăn les te phirăl.”

45But andal Iudeaia, kai avilesas andai Maria, kana dikhline so kărdeas o Isus, pateaine ande Leste.

46Ta iekh anda lende găline kal Fariseia, thai phendea lengă so kărdeasas o Isus.

47Atunčeara le raša le mai bară thai le Fariseia tidine o Staboro, thai phendine: „So kărasa? O manuši kadoa kărăl but minunea.

48Te mekasa Les kadea, saoŕă pateana ande Leste, thai avena le Romaia thai xasarăn ame thai i o than amaro thai i o neamo.”

49Iekh anda lende, o Kaiafa, kai sas baro rašai ando bărši kodoa, phendea lengă: „Tume či jeanen khanči;

50ta či den tume godi kă să ande tumaro valoso te merăll khă korkoŕo manuši andoa norodo, thai te na xasaol soa neamo?”

51Ta e buti kadea či phendeala lestar; ta, anda kă sas baro rašai ando bărši kodoa, prooročisardea kă o Isus avela te merăll andoa neamo.

52Thai na numai andoa neamo kodoa, ta i kaste tidel ande khă korkoŕo stato le šaoŕăn le Devllehkă kola pharadine.

53Andoa des kodoa, dinepeduma te mudarăn Les.

54Anda kodea o Isus či mai phirălas angla le Iudeia; ta gălotar oçal ande phuw pašai pustia, andekh četaea kai bušolas Efraim; thai ašilo oče andekhthan Pehkă jenença.

55E Patradi le Iudeiendi sas paše. Thai but manuši andal phuwea kodola ankăste ando Ierusalimo, angla e Patradi, kaste ujarăn pe.

56On rodenas le Isusos, thai denas duma iekh avrănça ando Templo: „So patean? Nai te avel koa prazniko?”

57Ta le raša le mai bară thai le Fariseia mothodinesas kă, kana jeanela varekon kai sî, te de le phendimos kaste astarăn Les.

← Chapter 10 Jump to: Chapter 12 →

Recommended Reading

Commentary John Commentaries → Devotional John Devotional Guide → Get This Bible Romani from Romanian (E Romaii Biblia (Kăldărărihko)) Study Bible →