Leviticus 12

Romani from Romanian (E Romaii Biblia 2020 (Kăldărărihko))

← Chapter 11 Jump to: Chapter 13 →

1O Rai dea duma le Moisahkă, thai phendea:

2„De duma le šeavengă le Israelohkă thai phen lengă: „Kana khă juwli ašela khamni, thai kărăla khă šeau muršano, te avel biuji efta des; te avel biuji sar ando čiro lako nasfalimahko.

3Ando oxto des, o šeaoro te avel šindinoroata.

4E juwli te mai ašel treanda thai trin des, kaste ujarăl pe lakă ratestar; te na thol o vast pe či khă buti sfînto, thai te na jeal koa sfînto than, ji pune či pherdeona le des lakă ujimahkă.

5Te kărdino khă šei, te avel biuji dui kurkă, sar po čiro kana avilea lakă o nasfalimos; thai te ašel šovardeši thai šou des kaste ujarăl pe lakă ratestar.

6Kana pherdeona le des lakă ujarimahkă, anda khă šeau or anda khă šei, te anel le rašahkă, koa uluw la çărako le arakhadimasti, khă bakro khă băršehko anda o phabarimos dă sa, thai khă puio golumbohko or turtureaua anda e jertfa le iertimasti.

7O rašai te jertfil le angloa Rai, thai te kărăl iertimos anda late; thai kadea, oi avela ujardi anda o thavdimos lakă ratehko. Kadea sî khă kris anda e juwli kai kărăl khă šeau or khă šei.

8Kana našti te anel khă bakro, te lel dui čirikleora or dui pui golumbea, iekh anda o phabarimos dă sa, aver anda e jertfa le iertimasti. O rašai te kărăl iertimos anda late, thai avela ujeardi.”

← Chapter 11 Jump to: Chapter 13 →