Psalms 89

Romani from Romanian (E Romaii Biblia 2020 (Kăldărărihko))

← Chapter 88 Jump to: Chapter 90 →

1Dilabaua orkana le lašimata le Raiehkă: phenaua neamo neamoste, mîŕă muiesa o pateaimos Tiro.

2Kă phenau: „E mila le Devllesti sîla temelii vešnikuri! zuralo sar le čerurea sî Tiro pateaimos!”

3„Kărdem phanglimos Mîŕă alosardesa” – phenel o Rai – „dikta so solaxadem Mîŕă robohkă le Davidohkă:

4„Zurearaua ti sămînça ando veako, thai andel veakuri thoaua teo skamin le raimahko.”.

5Le čerurea lăudin le šukarimata Tiră, Raia, thai o pateaimos Tiro ando tidimos le sfinçăngo!

6Kă, ando čerii, kon dašti thol pe Tusa?

7O Dell sî daraimahko ando tidimos o baro le sfinçăngo, thai darako anda kola kai bešen ande Lehkă riga.

8Raia, Devlla le oštirengo, kon sî zuralo sar Tute, Raia! thai o pateaimos Tiro del Tu angali.

9Tu kovlearăs o barimos la mareako; kana vazden pe lakă valuri, Tu atărdearăs le.

10Tu linčeardean o Ejipto sar khă stato mullo, phaŕadean Te dušmaien andai zor Tiră vastesti.

11Tiră sî le čerurii thai e phuw, Tu kărdean e lumea thai sa so sî pe la.

12Tu kărdean e riglareateati thai e rigteledesăsti; o Taboro thai o Xermono bukurin pe Te Anavestar.

13O vast Tiro sî zuralo, O vast Tiro sî zor, e čeači Tiri sî vazdini.

14O čeačimos thai e kris sî e temelia le skaminesti Te raimasti; o lašimos thai o pateaimos sî angla Teo Mui.

15Baxtalo le poporostar, kai prinjeanel o bašimos la šingako, kai phirăl ande lumina Te Mosti, Raia!

16O bukuril pe biatărdimahko Te Anavestar, thai delpebaro Te čeačimasa.

17Kă tu san o barimos lehka zorako; thai, ando lašimos Tiro, vazdes e zor amari.

18Kă o Rai sî amaro skuto, o Sfînto le Israelohko sî o Thagar amaro.

19Atunčea dean duma ande khă suno le but kamblimahko Tirăhkă, thai phendean: „Dem o kandimos Muŕo khă zuralehkă, vazdem andoa maškar le poporohko khă tărno;

20arakhlem Mîŕă robos le Davidos, thai makhlem les le zetinosa Mîŕăsa o sfînto.

21O vast Muŕo nikrăla les, thai o vast Muŕo zurearăla les.

22O dušmano či astarăla les, thai kukoa o nasul či pharearăla les;

23ta linčearaua angla leste lehkă dušmaien, thai malavaua kolen kai či dabadikhăna les.

24O pateaimos thai o lašimos Muŕo avena lesa, thai zor lesti vazdela pe ando Anau Muŕo.

25Daua ande lehko vast e marea, thai ande čeači lesti le nanilašuri.

26O phenela Mangă: „Tu san muŕo Dadd, O Dell muŕo thai o Kotorlebaŕăhko le skăpimahko mîŕăhko!”

27Ta Me kăraua les o anglal kărdino, o mai baro andal thagar la phuweakă.

28Garavaua lehkă orkana o lašimos Muŕo, thai o phanglimos Muŕo lesa avela bizdrunčinimahko.

29Kărau lesti sămînça vešniko, thai lehko skamin le raimahko sar le desa le čerurengă.

30Kana lehkă šeave mekăna e Kris Mîŕî, thai na phirăna pala le mothodimata Mîŕă,

31kana ušteavena le muklimata Mîŕă, thai či mai arakhăna Mîŕă mothodimata,

32atunči došaraua le lendi bikris la ŕaiasa, thai le bezexalimata maladimatănça;

33ta či durearaua dăfel o lašimos lendar, thai či kăraua Muŕo pateaimos xoxaimahko;

34či ušteavaua Muŕo phanglimos, thai či paruvaua so ankăsto pa Mîŕă ušt.

35Solaxadem ăkhdata pe Mîŕî sfinçenia: Ta te xoxavau Me le Davidos?

36E sîmînça lesti avela andel veakuri; o skamin lehkă raimahko avela angla Mande sar o kham;

37sar o šonuto, avela ando veako, thai sar o dihkitorii le pateaimahko andoa čerii..

38Thai varesar, Tu dureardean les, thai xolleailean pe Tiro makhlo;

39či lean sama koa phanglimos kărdino te robosa; peradean thai marisardean lesti kununa.

40Peradean sa lehkă zîduri, thai rimosardean sa lehkă četăçi.

41Sa le phirditorea čiorăn les, thai arăslo prasaimahko pehkă pašengă.

42Vazdean e čeači lehkă dušmaiendi, veselisardean sa lehkă dušmaien,

43kărdean koa skuçîmos lehka săbiako te del parpale, thai či nikărdean les ando mardimos.

44Thodean gor lehkă străfaimahkă, thai peradean kai phuw lehko skamin le raimahko;

45šindean lehkă des le tărnimahkă, thai pherdean les prasaimahko..

46Ji kana, Raia garavesa Tu biatărdimahko, thai phabola Ti xolli sar e iag?

47An tukă godi sode dă tang sî mîŕî čivava, thai anda soste kărdean sal šeaven le manušehkă.

48Sî vokh manuši kai dašti trail thai te na dikhăl o mullimos, kai te dašti te skăpil pehko duxo andoa than le mullengo?.

49Kai sî, Raia, le lašimata Tiră dă anglal, kai solaxadean le ăl Davidohkă, ando pateaimos Tiro?

50An Tukă godi, Raia, le prasaimahko Te robengo, an Tukă godi, kă phiravau ando kolin o prasaimos bute popoarăngo;

51an Tukă godi le prasaimatăndat Te dušmaiengă, Raia; lengă prasaimatăndar pal pasurea Te makhlehkă!

52Dinodumadămišto te avel o Rai andel veakuri! Amin! Amin!

← Chapter 88 Jump to: Chapter 90 →