2 John 1

Romani Sinte 2024 (O Debleskro Lab 2024 (Sinte-Manouche))

Jump to:

1Me, i phoureder, činau ap koy rayetsa, kolat o Devel peske vin rodas, oun ap lakre čavende. Me kamau t'men o tselo djiyestar, oun gar me kokres, ninna kol vavar, kay prindjrenn o čačepen, kamenn t'men o djiyestar.

2O čačepen ačell an mende, oun hi pash mende hako tsiro. Doleske kamah t'men o djiyestar.

3Lačepen, kamlepen oun barht t'menge! Kova dell men o Devel, maro dad, oun leskro čavo, o Yezous Kristo, an o dji. Oun yaake ačah mer khetne an o Debleskro čačepen oun kamlepen.

4Me homs barhtelo, kay hatsom menshe t'mendar, kay an o čačepen djivenna, yaake har o Devel, maro dad, kova kamella.

5Romniya, kanna činau touke oun tire čavenge i lab, hoy hi t'menge kek nevo lab. T'mer shounan les, har van patslo. Mangau t'mendar, te kamell yek o vavares o djiyestar!

6Te krah mer kova, hoy o Devel penas, sikrah mer, kay kamah les. Oun kova, hoy yob penas, te kras, shounan t'mer, har van patsle.

7Boud rhorhene sikepangre nashenn ap i phoub trouyel, kay kamenn i patslen o čačo dromestar tele te anell. Yon penenna, kay vas o Yezous Kristo gar i mensho dran mass oun rat. Kol sikepangre venna gar o Deblestar. Yaake har yon rakrenna, yaake rakrell ninna ko rhorheno, kay hadell pes pral o Yezous Kristeste.

8Denn yak, te nashrenn gar kova, hoy mer t'men sikram, te vell t'men ninna ko tselo bravlepen, hoy o Devel kamell t'men te dell.

9Hakeno, koon ačell gar pash kol laba, hoy o Yezous Kristo menge penas, oun penell vavar koova, kova ačell gar o Debleha. Kova, kay ačell pash kol laba, hoy o Yezous Kristo menge penas, kova ačell o Debleha, maro dadeha, oun peskro Čaveha.

10Te vell yek pash t'mende, oun penell t'menge vavar koova har kova, hoy o Yezous Kristo menge penas, koles lenn gar an t'maro kheer! Parkrenn les vitar gar!

11Koon les parkrella, koles hi ninna doosh ap leskro čilačo koova, hoy yob krella.

12Me nay penoms t'menge gomme boud. Kova kamau gar lauter an i liil te činell. Shoukeder vals, te nay voms pash t'mende, oun rakroms t'mentsa, te venn mare djia pherdo barht.

13I čave tiri vi-rodedi phenyatar penenn touke lače laba.

Jump to: