Amos 4

Romani Sinte 2024 (O Debleskro Lab 2024 (Sinte-Manouche))

← Chapter 3 Jump to: Chapter 5 →

1Shounenn kava lab, t'mer romya i pralstunendar pral o foro Samaria! T'mer han har i thoulle groumya ap i berge Bashan. T'mer krenn i čorvelenge čilačepen, rikrenn i tiknen tele, oun penenn ap t'mare romende: Anenn menge mool, te piyas mer!

2O baro Devel, maro ray, das pes sovel pash peskro lab: O tsiro vella, kay taprenn le t'men yaake har mače tapedo venn i ranyentsa. Hakeno t'mendar hi har i mačo ap i raan.

3Yek pal i vavar hounte djan t'mer mank i massouri vin – kote kay li paash hi. Oun yon tradenn t'men kote, kay i berga Hermon hi. Kova penau me, o baro Devel.

4T'mer djan pash o Debleskro kheer an o foro Betel, oun hadenn t'men pral o Debleste! T'mer djan an o Debleskro kheer an o foro Gilgal, oun hadenn t'men ninna boudeder pral o Debleste! Krenn doureder yaake: Taysarla marenn firhen o Debleske, oun o vavar dives anenn leske o deshto kotar kolestar, hoy dren anan!

5Anenn shoutlo maro o Debleske, te parkrenn pen pash leste! Denn vin gole, te anenn i menshe pendar čomone o Debleske! Oun palle denn vin gole, hoy hakeno anas. Savo koova kamenn t'mer yaake, t'mer Israelitarya! Kova penell o baro Devel, maro ray.

6Me hom kova, kay bičras i bok an t'mare tsele forya. Ninna te his t'men gar doha rhapen an o tselo them, van t'mer gar pale pash mande, penell o baro Devel.

7Triin čon glan kova kay anan t'maro djob dren, rikrom o brishin pale. Oun me dom brishin ap yek foro oun gar ap i vavar. O brishin peras ap yek harhetikri phoub, oun koy vavar phoub, kay kek brishin das, meras tele.

8Oun i menshe dran douy, triin forya djan an i vavar foro, te hatsenn le pani. Oun kote his gar doha lenge. Ninna palle van t'mer gar pale pash mande, penell o baro Devel.

9Me bičrom i tato phourdepen oun i nasslepen ap t'maro djob, yaake te meras o djob tele. Ninna rhan i stepangre lauter, hoy bares vas an t'mari baar oun an t'maro drakengro them, ap t'mare faygetikre rouka oun djeteskre rouka. Ninna palle van t'mer gar pale pash mande, penell o baro Devel.

10Me bičrom savo pharo nasslepen ap t'mende, har bičrom ap o them Egiptia. Me marom t'mare terne morshen an o kourepen, oun moukom t'mare grayen pandles krik te anell. O khand kol moule lourdendar ap lengri platsa moukom an t'mare naka te djal. Ninna palle van t'mer gar pale pash mande, penell o baro Devel.

11His save forya pash t'mende, kay krom yaake paash, har krom i forya Sodom oun Gomorra paash. Oun t'mer hans har i kotar kasht, hoy vas vin tserdedo dran i yag. Ninna palle van t'mer gar pale pash mande, penell o baro Devel.

12Doleske, t'mer menshe an Israel, krau t'mentsa pale yaake har krom! Djinenn, me vau t'maro čačepaskro ray, kay dell t'men t'mari phagi.

13O Devel hi kova, kay kras i berge, oun moukell o phourdepen pral i phoub te djal. Yob sikrell i menshende, hoy kamell lo te krell. Yob moukell o kham pre oun tele te djal. Yob hi o ray pral i tseli phoub. Leskro lab hi: Baro Devel, ray pral o bolepen oun i phoub.

← Chapter 3 Jump to: Chapter 5 →