Ephesians 2

Romani Sinte 2024 (O Debleskro Lab 2024 (Sinte-Manouche))

← Chapter 1 Jump to: Chapter 3 →

1Har gar patslo hans, his boud doosh ap t'mende. Oun t'mer hans čilačo. Yaake hans o Debleske moulo.

2T'mer djan ap o čilačo drom, yaake har i vavar menshe, oun shounan ap o bengeste. Kova hi o ray pral i čilače zorya mashkral o bolepen oun i phoub. Oun yob boudrell an i djia kolendar, kay shounenn gar ap o Debleste.

3His i tsiro, kay djivam mer halauter har yon, oun kram o čilačepen, hoy an mende hi. Mer kram, hoy mer kamam, oun hoy menge an o shero vas. Oun o Debleskri rholi his ninna pral mende har pral kol vavar menshende.

4Kanna kras men o Devel djido. Les his i baro dji menge oun kamas men o tselo djiyestar. Mer, kay leske moulo hams, har djivam an maro čilačepen, men kras yob djido, yaake har yob o Yezous Kristes djido kras. Yob his yaake lačo ap mende, te las lo men dran o čilačepen vin.

6Har djangras yob o Yezous Kristes i moulendar pre, djangras men lo ninna pre, oun beshas men an o bolepen pash leste.

7Yaake baro hi leskro lačepen ap mende, kay patsah ap o Yezous Kristeste. Ninna an ko tsiro, hoy vella, dikenna i menshe, har baro leskro lačepen ap mende hi.

8Dran peskro lačepen las lo t'men dran o čilačepen vin, har patsan ap o Yezous Kristeste. T'mer van nay gar dran t'mari zoor dran o čilačepen oun o merepen vin. Na-a! O Devel las t'men vin.

9Kova kras lo gar doleske, kay t'mer lačo koova kran. Yaake sharell nay pes kek mensho glan o Debleste.

10Kova, hoy mer kanna ham, kras o Devel dran mende. Har vam patslo ap o Yezous Kristeste, das lo men o nevo djipen, te kras mer ko lačo koova, hoy yob menge vin rodas oun an mare vasta das.

11Ma bistrenn, koon t'mer hans, har boldo van! T'mer hans kek bibolde. Oun i bibolde penan Bi-činle ap t'mende. I bibolde van ap pengro mass činlo, oun kova han t'mer gar.

12Ap ko tsiro prindjran t'mer o Yezous Kristes gar oun hans gar o Debleskre menshendar. Ko lačo koova, hoy o Devel peskre menshenge penas, te dell lo len, his gar t'menge. T'mer prindjran o Debles gar, oun djivan har an i kali rat oun dikan kek momeli glan t'mende.

13Ap ko tsiro hans t'mer dour o Deblestar. Kanna prindjrenn les. O Yezous Kristo anas t'men ap peskro drom, har yob ap o troushel peskro rat t'menge ratas.

14Yob anas i bibolden khetne kol menshentsa, kay kek bibolde hi, te venn le mala, oun las o čingepen lendar krik, hoy mashkral lende his.

15Har yob ap o troushel meras, čivas lo o Moseskre lila ap i rig, kay činlo hi, har i bibolde hounte djivenna. Yob kras čomone neves, te vell i biboldo khetne koleha, kay kek biboldo hi, oun te venn le lauter mala.

16Har meras lo ap o troushel, anas lo kol douyen khetne o Debleha, te venn le leskre mala. Kote las lo o čingepen lendar krik, hoy mashkral lende his.

17O Yezous Kristo vas, oun sikras lauteren o drom pash o Debleste. T'men, kay t'mer dour o Deblestar hans, oun ninna i bibolden, kay gar dour o Deblestar his, sikras lo ko drom, te djivas mer lauter pash leste khetne.

18Mende halauterende das yob o Debleskro Dourho. Oun kova krell, te nay vah mer lauter glan o Debleste, maro dadeste.

19Kanna han t'mer bouder gar save menshe, kay vin hi oun o Debles gar prindjrenna. Na-a, khetne kol vavar patslentsa han t'mer kanna o Debleskre menshe oun han khere pash leste.

20I tsele Debleskre menshe hi har yek kheer, kerdo dran barra. T'mer han kol barra, hoy hi tardo ap i telstoune barra. I telstoune barra hi o Yezous Kristeskre bičepangre oun o Debleskre rakepangre. O Yezous Kristo hi ko zorelo bar, hoy rikrell o tselo kheer khetne. Oun o kheer vell baro oun bareder, oun vell i shoukar kheer, kay o Devel djivella.

22Ninna t'mer djivenn o Yezous Kristeha khetne. Doleske han t'mer ninna har barra an o Debleskro kheer, kay o Debleskro Dourho djivella.

← Chapter 1 Jump to: Chapter 3 →