Esther 4

Romani Sinte 2024 (O Debleskro Lab 2024 (Sinte-Manouche))

← Chapter 3 Jump to: Chapter 5 →

1Oun har o Mordekay shounas, hoy djas, kras lo peskre koola paash, hoy ap leste his. Oun rivas peske i gono an, oun čivas yagakri čik ap peste. Oun djas dren mashkral o foro oun rovas oun das gole.

2Oun yaake vas lo bis glan o baro voudar o baro rayeskro kherestar. Oun kote ačas lo. Kek, kay his rido an gone, nay djas dren.

3Oun an hako them, kay o liil o baro rayestar vas, his baro ropen mank i bibolde. Oun boud kaman bouder či te rhal, rovan oun rivan pen an gone oun čivan yagakri čik ap pende.

4Oun i djouvya, kay i Esterake boudrenn oun kol pralstoune, kay lake koy hi, van pash late oun penan lake kava koova. Oun kote tapras i rani bari daar. Oun yoy bičras ripya pash o Mordekay, te rivell lo len an, oun te čivell lo o gono pestar tele. Oun yob kamas gar.

5Kote moukas i Ester i morshes te kharell. Kova kharas Hatak oun his i pralstouno, koles o baro ray late das, te vell lo lake koy. Oun koles bičras li pash o Mordekay te poučell lo lestar, hoske yob yaake krell.

6Oun o Hatak djas pash o Mordekay vin ap i platsa, hoy his glan o voudar o baro rayeskro kherestar.

7Oun o Mordekay penas leske lauter, hoy leske djas, oun ninna har boud roup o Haman kamas te čivell lo pash o baro rayeskro bravlepen pashel, te venn i tsele bibolde maredo.

8Oun o Mordekay das les i liil peha, kay kol laba tele činlo his, hoy an o foro Susa ap i kasht dino his, kay tardo hi, te venn i bibolde maredo. Kava liles te sikrell lo i Esterake, oun te penell lo lake lauter, oun mangell latar, te djal li pash o baro rayeste dren, oun mangell les i ropah, te krell lo peskro dji pre lakre menshenge.

9Oun o Hatak djas oun penas i Esterake, hoy o Mordekay penas.

10Kote bičras i Ester les pale pash o Mordekay, te penell lo leske:

11“I tsele pralstoune, kay o baro rayeske boudrenn, ninna i menshe an hako them, koles o baro ray hi, kolla prindjrenn ko činlo lab, te vell hako morsh oun haki djouvel maredo, kay djal dren pash o baro rayeste oun vell ap i platsa an leskro kheer, oun hi lestar gar kharedo. Kokres te lell o baro ray peskro sonakaskro raan oun sikrell ap leste, ačell lo djido. Me vom triyanda divessa bouder gar pash o baro rayeste dren kharedo.”

12Har shounas o Mordekay, hoy moukas i Ester leske te penell,

13moukas lo lake pale te penell: “Ma pats, te nay veh tou tiro djipah krik, doleske, kay djiveh an o baro rayeskro kheer! Ma pats, te ačess tou kokres djido i tsele biboldendar!

14Tou te peneh či kanna an kava tsiro, palle vell i vavar, kay men bibolden vin lell. Oun tou oun tiro dadeskro kheer venn maredo. Oun koon djinell, te val tou gar rani savo tsireske har kava kanna hi?”

15Kote moukas i Ester ap o Mordekay te penell:

16“Dja koy oun de i tsele bibolden an o foro Susa khetne gole! Rhan oun piyenn triin divessa či, gar ap o dives, vitar gar an i rati. Krenn kova mange, te dikell o Devel lačes ap mande! Oun me oun kol djouvya, kay mange boudrenn, mer kamah kova ninna yaake te krell. Oun pal kova kamau pash o baro rayeste dren te djal, ninna te hi khatar o činlo lab. Oun te denn le man moulo, palle denn le man moulo.”

17Oun o Mordekay djas peske oun kras lauter yaake har i Ester leske penas.

← Chapter 3 Jump to: Chapter 5 →