Ezra 3

Romani Sinte 2024 (O Debleskro Lab 2024 (Sinte-Manouche))

← Chapter 2 Jump to: Chapter 4 →

1Oun har o 7. (eftato) čon vas oun i Israelitarya an pengre forya his, van i tsele menshe har yek morsh khetne an o foro Yerusalem.

2Oun o Yeshoua, koleskro dad o Yozadak his, kras pes ap i boudi khetne peskre phralentsa, kol rashayentsa, oun o morsheha Zorobabel, koleskro dad o Shealtiel his, oun leskre phralentsa. Oun yon kran i nevi sasterni rhačepaskri, te nay rhačrenn le firhen koy pre o Israeleskro Debleske, yaake har činlo hi an o liil o Debleskro morshestar, o Mosestar.

3Oun ninna te hi len daar i vavar menshendar an o them, čivan le i sasterni rhačepaskri pre ap peskri phouri platsa, oun anan kote firhen o baro Debleske, oun rhačran len koy pre. Kova kran le taysarlake oun ratsyake.

4Oun yon rikran kol bare divessa, kay djivenn i Israelitarya an patyengre khera, yaake har tele činlo vas, oun rhačran yaake boud firhen o Debleske kol tsele efta divessa, har hako diveske glan činlo his.

5Pal ko tsiro anan le hako dives kol firhen, kay van taysarlake oun ratsyake rhačedo o baro Debleske. Oun ninna ap hako nevo čon oun ap i vavar bare divessa anan le firhen o baro Debleske. Oun dan ninna kova, hoy yek pestar kamas te dell o baro Debleste.

6O ersto kopo har anan le firhen, te venn le rhačedo o baro Debleske, his ap o ersto dives an o eftato čon. An ko tsiro his i telstoune barra o baro Debleskro khereske gomme gar čiddo.

7Oun yon dan love kol morshen, kay boudrenn i barrentsa oun kol morshen, kay boudrenn o kashtentsa. Ninna dan le rhapen oun pipen oun djet kol morshen dran Sidon oun Tirus, te nay anenn le Cedertikro kasht dran o Libanon pral o baro pani an ko foro Yafo. Kova lauter kran le yaake har les lenge o Cyrus, ko ray pral Persia penas.

8An o douyto bersh har yon pale van an o foro Yerusalem, oun an o douyto čon, kran pen i Israelitarya ap i boudi, te čivenn le o Debleskro kheer pale pre. O Zorobabel, koleskro dad o Shealtiel his, oun o Yeshoua, koleskro dad o Yozadak his, oun lengre vavar phrala, kolla his i rashaya oun i Levitarya, oun halauter, kay van dran pengro pandepen pale an o foro Yerusalem boudran khetne ap o Debleskro kheer. Oun yon rodan i Levitaryen vin, kay biish bersh oun phoureder his, te denn le yak ap koy tseli boudi an o baro Debleskro kheer.

9Oun o Yeshoua oun leskre morsh čave oun leskre phrala, o Kadmiel, o Binnouy oun o Hodavya his khetne koy tardo, te nay sikrenn le kol boudepangren ap o Debleskro kheer, har koy boudi hounte kerdo vella. Koy pashel his ninna kol Levitarya, kolengro phouro dad o Henadad his.

10Oun har čivan i boudepangre i telstoune barra pre o baro Debleskro khereske, his i rashaya koy tardo an pengre rashayengre ripya oun phourdan an pengre phourdepangre. Oun i Levitarya, kolengro phouro dad o Asaf his, kolen his pengre bashepangre, hoy kharenn cimbale, ninna pashel, te nay sharenn le o baro Debles, yaake har o David, ko baro ray pral Israel kova penas.

11Oun yon givan, sharan oun parkran pen pash o baro Debleste: “Yob hi lačo oun leskro kamlepen hi an hako tsiro pral Israel.” Oun i tsele menshe dan gole i barhtyatar, har parkran le pen pash o baro Debleste doleske, kay i telstoune barra leskro khereske čiddo his.

12Boud i phoure rashayendar, i Levitarendar oun i familyengre pralstunendar djinan, har o baro Debleskro phouro kheer vin dikas. Kolla rovan zoreles, har yon kanna dikan, har i telstoune barra kava nevo khereske čiddo van. Vavar dan gole i barhtyatar, yaake his, kay nay van le dour shounlo.

13Oun kek djinas, hoy zorleder hi, koy gole i barhtyatar oder ko zorelo ropen; i menshe dan yaake bares gole, te vas kova dour shounlo.

← Chapter 2 Jump to: Chapter 4 →