Haggai 2

Romani Sinte 2024 (O Debleskro Lab 2024 (Sinte-Manouche))

← Chapter 1 Jump to:

1Ap o 21. (biish-te-yekto) dives an o eftato čon penas o baro Devel ap peskro rakepaskro, o Haggay:

2Pen ap o Zorobabel, ko pralstuneste pral o them Youda, koleskro dad o Shealtiel hi, oun ap o baro rashayeste, o Yeshoua, koleskro dad o Yozadak hi, oun ap i tsele menshende, kay pral ačan an o them:

3Koon t'mendar hi gomme koy, kay dikas kava kheer, har lo an peskro shoukester tsiro vin dikas? Oun har dikenn les t'mer kanna? Hi či leskro shoukapen pral!

4Kanna penell t'menge o baro Devel: Avenn zoreles, tou, Zorobabel, oun tou Yeshoua, oun t'mer halauter, oun boudrenn! Me hom t'mentsa, penell o baro Devel, ko ray pral o bolepen oun i phoub.

5Me dom t'men miro lab, har tserdan vin dran o them Egiptia. Me ačau pash t'mende. Ma darenn!

6Doleske penell o baro Devel, ko ray pral o bolepen oun i phoub: An i tikno tsiro krau me, te trissenn o bolepen oun i phoub, o baro pani oun o trouk them.

7Ava, i menshenge an i tsele themma lau i zoor krik. Oun lengro kouč koova vell kate anlo, oun me krau miro kheer pherdo raylepen. Ko penell o baro Devel, ko ray pral o bolepen oun i phoub.

8Ko tselo roup, miro hi lo, ko tselo sonakay – halauter hi miro, penell o baro Devel, ko ray pral o bolepen oun i phoub.

9Kava kheer te vell shoukeder har miro ersto kheer his. Oun me kamau t'men barht te dell an kava foro, penell o baro Devel, ko ray pral o bolepen oun i phoub.

10Ap o 24. (biish-te-starto) dives an o enyato čon an o douyto bersh, har o Darius o baro ray his, penas o baro Devel ap peskro rakepaskro, o Haggay:

11Kova penell o baro Devel, ko ray pral o bolepen oun i phoub: Pouč i rashayen, hoy yon penenn an kava koova:

12“Te hidjrals yek an peskro ripen mass, hoy o Debleske hi, oun taprals kava ripeha maro an, keredo rhapen, mool, oun djet, vals ko koova palle ninna o Debleske?” Oun i rashaya rakran pale pale, oun penan “Na-a.”

13O Haggay poučas pale: “Te taprals yek i moules an oun vals yaake pale-čiddo, oun palle taprals lo o rhapen an, vals ko rhapen ninna pale-čiddo?” “Ava”, penan i rashaya, “ko rhapen vals pale-čiddo.”

14Koy penas o Haggay: Yaake hi ninna kal menshentsa an kava them. An mire yaka hi le pale-čidde. Oun lauter, hoy krenn le pengre vastentsa, hi pale-čiddo, ninna ko koova, hoy le mange anenn.

15Oun kanna denn garda, har djal t'menge kava dives, oun an ko tsiro, hoy vella! Glan kava dives kay čivan t'mer yek bar ap o vavar ap o baro Debleskro kheer, his yaake:

16Te vas yek t'mendar kote, kay i djob čiddo hi, oun kamas douy-sheel kilogramme te lell, hatsas yob gar boudeder har yek sheel kilogramme. Te vas yek t'mendar kote, kay i mool garedo vell, oun kamas sheel litarya te lell, hatsas lo gar boudeder har star-deesh litarya.

17Me rikrom o brishin pale, t'maro djob meras tele, brishineskre barra moukom ap t'mari harhetikri phoub te perell. Pal ko tselo koova van t'mer gar pale pash mande, oun mangan t'men gar tele pash mande.

18Kava dives hi o 24. (biish-te-starto) dives an o enyato čon. Kava dives čivan t'mer i telstoune barra miro khereske yek ap o vavar. Kanna denn garda, har t'menge kava divesseha djala!

19An t'mare djobengre khera ačell doha djob. I drakengre rouka hidjrenn pale drake, i faygetikre rouka hidjrenn fayge, i granatikre phabyengre rouka hidjrenn phabya, oun i djeteskre rouka hidjrenn djeteskre drake. Kava divesseha čivau miri barht oun miri zoor ap t'maro them.

20Ap o 24. (biish-te-starto) dives an ko čon rakras o baro Devel i douyto kopo ap o Haggay:

21Pen ap o Zorobabel, ko pralstuneste pral o them Youda: Me krau, te trissell o bolepen oun i phoub.

22Oun me vitsrau i beshepangre kol themengre rayendar trouyel oun lau lengri zoor krik. Lengre kourepangre vourdya vitsrau trouyel khetne kolentsa, kay koy pre beshenna. I graya oun i klissepangre merenna. Yek dell o vavares moulo.

23O baro Devel, ko ray pral o bolepen oun i phoub penell: Ap ko dives dau me tout, Zorobabel, miro čačo vast. Tou hal miro bičepaskro. Tou hal mange yaake kouč har i goustri, koleha miro lab ap i liil čivau. Tout rodom vin, te boudress mange. Kova penell o baro Devel, ko ray pral o bolepen oun i phoub.

← Chapter 1 Jump to: