1 Timothy 4

Santali Bible (সান্তালী বাইবেল)

← Chapter 3 Jump to: Chapter 5 →

1Sonot Jiu do pusṭạuteye menakada, darakan dinkore adom hoṛ do biswạs khonko bhingṛạukʼa ar bulạu jiuko ar bạṛicʼ jiukoakʼ bintiko moneyakʼa.

2Bibek goṛdho akan nonkan eṛe hoṛkoakʼ phạsiạrate nonka do hoyokʼa.

3Noko do manwa baṅ baplakʼ lạgitʼko hukumako kana ar adom adom jomakʼ jojomko baron kana. Menkhan biswạsiko, okoe do Isorakʼ sạriyakʼtetʼko baḍae akatʼ, onko do gun manao joharkateko jomma ar ona iạtege Isor do noako jomakʼe sirjạu akada.

4Isore sirjạu akatʼ sanamakʼge bhagegea, onate okaṭakʼ hõ bạṛicʼ hudiskate giḍikakʼ lek do baṅkana; menkhan ona do jemon gun manao joharkate ataṅokʼ,

5ente Isorakʼ katha ar koete ona do sonot ocokʼ kana.

6Am do noako reaṅ boehakom bujhạuako khan enḍekhan Mạsiyakʼ dhorom biswạs reakʼ okaṭakʼ sạri ar bhageakʼ sikhnạtem manaoetʼkan, onate Mạsi Jisuren mitʼṭen bhage sapʼ dapʼicʼem hoyokʼa.

7Bhõnḍ ar alatʼ bakatʼ kạhniko khon sahaṛ akae tahenme; ente onako do haṛam ar buḍhikoakʼ benaoakʼ kạhni kana. Ona khon bickom Isor bhokti lạgitʼ hewakʼme.

8Hoṛmo bhańjaore porho do ńamokʼgea, menkhan Isor bhokti do joto secʼ khon porhowanakʼ kana; onare do nahakʼ reakʼ ar darakan jion reakʼ as menakʼa.

9Noa katha do sạrikangea ar sanam secʼte ataṅ reakʼ hõ lek kana.

10Onate murukte bon mehnoteda arbon lạgiyạ paṛao akana, ente abo do jiwetʼ Isorre bon as akana. Uni do sanam manwakoren babańcaoicʼ kanae, asokaete okoe do unireko pạtiạu akan.

11Ar noako babotre am do hukum emakom ar cetʼakome.

12Amakʼ koṛa umer do okoe hõ aloko neṅghaotam ma. Menkhan pạtiạuko lạgitʼ nạmuna baṛe hoyokʼme, amakʼ kathare, amakʼ cạl-colonre, amakʼ dulạṛre, amakʼ biswạsre ar sonotre.

13Ar iń ạuriń hijukʼ hạbicʼ am do biswạsikom sikhạu paṛhaokoa, sonot sostorkom paṛhao ańjomakoa, ar lại cecetʼakʼge moneyakʼme.

14Manḍerren murubbiko capokateko koeyatʼme tahẽkanre nạbi lekate katha roroṛ hotete okaṭakʼ danko ematʼme tahẽkan, ona daya dan do alom ḍhilạua.

15Noako kạmi idire mone lagaome; ar onakorege tahẽakan tahenme. Jemon sanamkoko ńelme, am dom laha idikʼkana mente.

16Am apnar reaṅ ar amakʼ lại cecetʼre sontor akae tahenme. Ar onakore tahẽakae tahenme, entem onka lekhan apnar hõm bańcaokʼa, ar okoeko ańjomtam onko hõm bańcaokoa.

← Chapter 3 Jump to: Chapter 5 →