2 Peter 3

Santali Bible (সান্তালী বাইবেল)

← Chapter 2 Jump to:

1E dulạṛiạ boehako, ape ṭhen noa do ińakʼ dosar ciṭhi kana. Banar ciṭhirege iń do adomakʼko babotreń disạ ocoyetʼpete apeakʼ soṛa mon udgạu reakʼ iń kurumuṭuyeda.

2Sonot nạbiko okako katha lahateko menakatʼ onako ar aperen apostolko hotete aboren Probhu Isor ar babańcaoicʼ okaṭakʼ hukume emakatʼ, ińakʼ monejonakʼ do jemon onape disạ dohoy.

3Pạhilre noa katha disạ dohokakʼpe, bhageakʼko reaṅ okoe do nisṛạu reakʼ sobhabtako onko do sesa sisi dinrehõko nisṛạugea. Onko do akoakʼ bạṛicʼ kusi sana lekako colona,

4arko mena, “Uniyakʼ hijukʼ reakʼ oka gokʼakʼ tahẽkan ona reakʼ do cetʼ hoyena? Dhạrti sirjạu khon cetʼleka calao hijukʼkan tahẽkan ṭhik onkage aboren hapṛamko gocʼ tayom khon jotowakʼge coṅ inạ mitʼlekage calakʼkan.”

5Noko hoṛ do dikhitegeko hiṛińeda baṅma, sedaere Isorakʼ kathatege serma do sirjạulena ar dakʼte ar dakʼ khonge dhạrti hõ sirjạulena mente.

6Un reakʼ ona dhạrti do ḍubạ dakʼte ḍahao maraolena.

7Ar Isorakʼ inạ mitʼ kathatege ńitokʼakʼ serma ar dhạrti do seṅgelte ḍahao maraokʼ lạgitʼ dohoakana; Isor bebhokti hoṛkoakʼ bicạr ar ḍahao marao din hạbicʼ ona do jogao dohoakana.

8Menkhan E dulạṛiạ boehako, noa katha do alope hiṛińa, Probhu Isor ṭhen mitʼ din do hajar bochor soman kana ar hajar bochor do mitʼdin soman kana mente.

9Adom hoṛko hudiseda Probhu Isor do acʼakʼ gokʼakʼ purạu lạgitʼe bilomeda, menkhan ona do baṅ. Asokaete uni do ape lạgitʼe soboriyeda, ente jãhãegeye nosṭokʼ do bae khojkana, bickom sanamkoge jemon kại khon monko ạcurtako onageye khojkana.

10Menkhan Probhu Isorakʼ din do kombṛo leka hijukʼa. Ona dinre serma do sãe sãe saḍete parom calakʼa ar siń cando, ńindạ cando, ipilko sanamgeko atarokʼa arko le cabakʼa. Dhạrti ar onare menakʼ sanamakʼge ḍahao maraokʼa.

11Sanamakʼge nonka marao lạgidokʼkan khan enḍekhan cetʼ lekanko hoyokʼ lektapea? Ape do gagojokʼ tulucʼ Isorakʼ din koyokʼ horre tahente sonot ar Isor bhoktite jion khemao lektapea.

12Unre serma do lokʼte ḍahao maraokʼa ar siń cando, ńindạ cando ar ipilko hõko atarokʼa arko galao cabakʼa.

13Menkhan abo do Isorakʼ gokʼakʼ lekate nãwã serma ar nãwã dhạrti lạgitʼ bon koyokʼ horeda. Onḍe do sanamakʼge Isorakʼ monejoṅakʼ leka hoyokʼa.

14E dulạṛiạ boehako, ape do ńitokʼ noako lạgitʼpe koyokʼ horetʼkante murukte kurumuṭuipe jemon uni do niphuṭ ar dhoromre sulukte tahẽakane hecʼńampe.

15Disạipe, manwako kại khon bańcaoko ńam lạgitʼ aboren Probhu Isor doe sombhuriyeda. Ar inạ mitʼ kathage aboren dulạṛiạ boeha Pạul hõ Isore emakade akelte apeye olatʼpea.

16Uniyakʼ joto ciṭhirege noako reaṅ inạ mitʼ kathageye oletʼkana. Onako modre adomakʼko babotre menakʼakʼ as bujhạu do muskilgea. Onate baṅ cetʼakatʼ ar baṅ kajak hoṛko do eṭakʼ eṭakʼ sostorko leka noako reakʼ mane hõko pẽṛtayetʼte nijạte nosṭokʼko ạgujoṅ kana.

17E dulạṛiạ boehako, ape do noa katha laharegepe baḍae akatʼte sontor akae tahenpe, jemon noko bạṛicʼ hoṛkoakʼ bhul horte aloko bulạu idipe, ar apeakʼ kajak mon khon alope ńurokʼ.

18Ape do aboren Probhu Isor ar babańcaoicʼ Jisu Mạsiyakʼ daya ar uni reaṅ akelte hara rakabokʼpe. Ńit ar jaejug hạbicʼ uniyakʼge ṭhonok hoyokʼtae ma. Amen.

← Chapter 2 Jump to: