Habakkuk 1

Santali Bible (সান্তালী বাইবেল)

Jump to: Chapter 2 →

1Isorakʼ katha do Habakuk nạbi ṭhen dorson hotete sodorlena.

2E Probhu Isor, ar tinạkʼ din goṛo ńam lạgitʼ amiń hohowama ar am do bam ańjomtińạ? Ar tinạkʼ din “Santao hoyokʼte” am ṭheniń rakʼjoṅa ar am do bam bańcaoińạ?

3Cedakʼ dusṭami hoṛ ńelko lạgitʼ dom jorae moṭeńkana? Cedakʼ am do behokakʼem sahaoeda? Iń samaṅre jarkhar ar santao hoyokʼkana ar jhogṛa hõ jaoge hoyokʼkana.

4Ạn-ạriko nijor idikʼkana ar dhorom reakʼ bicạr do baṅge hoyokʼkana. Dhorom hoṛko khon dusṭạmi hoṛkoakʼ ektiạrige ḍherokʼkante bicạr do ulṭạukʼkana.

5Probhu Isore menkeda, “Jạt jạtrenko secʼ beṅgedpe, enḍekhanpe ṭhak utạrokʼa, ente ape bidạlrege nonkanakʼ iń kạmiya one ona reakʼ kathań lại apere hõ ohogepe pạtiạulena.

6Iń do Babelrenkoń sapṛaoetʼkoa; onko do kurmutạha jạtren kanako, onko do eṭakʼkoakʼ disạm hatjoṅ lạgitʼ dhạrti reakʼ sanam ṭhạ̃iteko calakʼkana.

7Onko ńelte hoṛ do ạḍiko botorokʼa. Onko do akotege akoakʼ ạn-ạriko benaojoṅa ar okoe tabere hõ tahen do bako aṅgoca.

8Onkoren sadomko do hunḍạr khon hõ usạrateko calakʼa, ar ạyupʼ jokhecʼ do hunḍạr khon hõko botorangea. Onkoren aswariko do sạṅgiń khon tạpisteko hijukʼa; ar onko do jojom lạgitʼ pajhạṛ lekako ạphir hijukʼkana.

9Onko do santao lạgitʼgeko hijukʼkana. Onkoren maraṅ phạdko doko laha hijukʼkana ar gitil leka alekha hoṛko bondi idikoa.

10Onko do rapajkoko siṛog akokana ar subedarko doko landa dhutʼako kana. Gaṛ ńelteko landa joṅkana; ar pạcrite decʼ paromokʼ lạgitʼ dhiri reakʼ ḍhipiko benaoeda ar gaṛkoko dokholeda.

11Ar ona tayom do hadaṛ hadaṛ hoe lekako parom calakʼkana. Onko hoṛ doko dusigea, ente onkoren debota do akoakʼ daṛege.”

12E Probhu, ińren Isor, ińren sonoticʼ, am do cetʼ jaejug tahenkạnicʼ dom baṅkana? Ale do ohole marao utạrlena. E Probhu Isor, ale sạjạile iạtege am do Babelrenkom bachao akatʼkoa; E asray buru, ale sạjạile lạgitʼge onko dom teṅgo akatʼkoa.

13Am do nunạkʼgem khạṭigea je, am do bạṛicʼakʼ secʼ beṅgetʼ hõ bam beṅgetʼeda ar behokakʼ hõ bam sahao daṛeakʼ kana. Enḍekhan cekate onko bepạtiạr hoṛ do bhage mẽtʼtem ńeletʼkoa? Dusṭạmi hoṛ do tinre ako khon hõ bhage hoṛko tạhuṛetʼkoa unre cedakʼ am do hape akanem tahenkana?

14Cedakʼ am do hoṛko jalapuriren hako ar leńokʼkan jiwiyanko leka cakʼlaoicʼ bạnuitako hoṛ lekam doho akatʼkoa?

15Babelrenko do onkoren sanamkoge bạ̃ṛsiteko or rakapʼetʼkoa ar jhạliteko owar rakapʼetʼkoa, arko samṭao jarwayetʼkoa; ar onate onko doko rạskạkʼ kana, arko kusikʼkana.

16Onko do akoakʼ jhạli ńutumte janwar dãṛẽko samaṅetʼkoa ar or jhạli ńutumte dhupko jeretʼeda, ente jhạli iạtege onko do ḍherko laba ar bhage bhage jomakʼko joma.

17Onko do cetʼ ghane ghạṛicʼge akoakʼ jhạliko ạjạuṛiytakoa ar jạt jạtrenko bin mãyãteko gocʼ idikoa?

Jump to: Chapter 2 →