Haggai 2

Santali Bible (সান্তালী বাইবেল)

← Chapter 1 Jump to:

1Eaeakʼ cando reakʼ bargel pạhilakʼ dinre Probhu Isor do Hagae nạbiye metadea,

2“Am do Sealṭiel hopon Jihudạren disạm cakʼlaoicʼ Serubabel, Jehosadak hopon maraṅ naeke Josuạ ar sarecʼ sanam hoṛkom kulikoa,

3‘ape talare nonkan okoe menaea one uni do noa oṛakʼ reakʼ lahateakʼ ṭhonoke ńelakatʼ? Ar ńitokʼ ona do cetʼ lekae ńeleda? Ape do cetʼ bape hudisetʼkana, lahateakʼ khon noa do cetʼge baṅkana mente?’

4Ona tayom am do onkom metakoa, Probhu Isore meneda, ‘E Serubabel, am do dil joṅme; E maraṅ naeke Josuạ, dil joṅme; E disạmren sanam hoṛko, apehõ dil joṅpe ar kạmipe; ente iń phạdkoren Probhu Isor do ape são sãotege minạńa.

5Ape tinre Misor disạm khonpe oḍok hecʼlena unre ape ṭhen noageń gokʼleda, ar ińren Jiu do ńithõ ape talare menaea. Ape do alope botorokʼa.

6“‘Phạdkoren Probhu Isorgeń meneda, ar thoṛa ghạṛicʼ khange iń do ar mitʼ dhao serma, ot, jalapuri ar khaṅgoṭ ot iń dalmalao ocoya.

7Ar sanam jạtrenkoń thar tharao ocokoa ar onate onko do akoakʼ dhon nonḍeko ạguiytakoa. Ar unre noa oṛakʼ do ṭhonokteń pereja.

8Rupạ hõ ińakʼkana, ar sona hõ ińakʼkangea.

9Lahateakʼ oṛakʼ reakʼ ṭhonok khon ńitokʼakʼ oṛakʼ reakʼ ṭhonok do arhõ bạ̃ṛti jak jomok hoyokʼa. Noa ṭhạ̃ire iń do bhạlạiyiń ạguiya. Phạdkoren Probhu Isorge noa katha doń meneda.’ ”

10Darjawesakʼ rajokʼ dosarakʼ bochor reakʼ areakʼ cando reakʼ bargel ponakʼ dinre Probhu Isor do Hagae nạbiye metadea,

11“Iń phạdkoren Probhu Isorgeń meneda, ạn-ạri babotre am do naekeko noa katham kulikoa,

12‘Jãhãe hoṛ acʼakʼ kicricʼre sonotakʼ jele ghẽṭ idiy ar ona kicricʼre jãhãnakʼ piṭhạ, isinakʼ jomakʼ, darkha rasa, sunum se eṭakʼ jãhãn jomakʼre jakʼ tiyokʼlen khan ona do cetʼ sonotakʼ hoyokʼa?’ ” Naekeko do Hagae roṛ ruạṛadeteko metadea, “Baṅ, ona do baṅ sonotokʼa.”

13Unre Hagaeye metatʼkoa, “Gocʼ hoṛe joṭetʼ akade iạteye bhonḍ akan nonkan jãhãe hoṛ noako reakʼ mitʼṭecʼe joṭetʼ tiyog, enḍekhan ona jinis do cetʼ bhonḍakʼ hoyokʼa? ” Naekeko roṛ ruạṛkeda, “Hẽ, ona do bhonḍakʼge hoyokʼa.”

14Unre Hagae doe metatʼkoa, “Probhu Isore meneda, ‘ṭhik onkage ińakʼ mẽtʼre noko hoṛko ar noko jạtren doko bhonḍgea. Ona iạte onko okako cekayetʼ ar jãhãnakʼgeko samaṅetʼkan ona do bhonḍgetakoa.

15Ar ńit khon noa babotre mońjte hudisokʼpe, ińakʼ oṛakʼre tinre mitʼṭecʼ dhiri cetanre armitʼṭecʼ dhiri tahẽkana unre cetʼ dosa tahẽkana.

16Jãhãege tinre bargel mon phosol ṭhiki ṭhene hijukʼkan tahẽkan uni do eken gel mone ńametʼ tahẽkana. Jãhãe mõṛẽgel liṭar darkha rasa hatao lạgitʼ darkha rasa reakʼ jala ṭhene hijukʼkan tahẽkan uni do eken bargel liṭar sunume ńametʼ tahẽkana.

17Apeakʼ tite upcạuakʼ phosol do copate, jhãorate ar arelteń ńẽtʼletʼtapea menkhan enhõ iń secʼ do bape ruạṛlena.

18Teheń areakʼ cando reakʼ bargel ponakʼ dinre ińakʼ oṛakʼ reakʼ rehetʼ bạisạu hoyena. Ar ape lạgitʼ cetʼ iń cekae lạgidokʼkan onape ńela.

19Ńitokʼ apeakʼ murạire jãhãn itạge bạnukʼtapea ar unạkʼ din do darkha nạ̃ṛĩ, loa dare, ḍạlim dare ar jạitun darere jo hõ thoṛage sapʼlena, menkhan teheń khon doń bhorapea.’ ”

20Inạ dinge Probhu Isor do Hagae arhõe metadea,

21“Am do Jihudạren disạm cakʼlaoicʼ Serubabel metaeme, ‘iń do serma ar ot iń daldalao ocoya.

22Iń do eṭakʼ eṭakʼ jạtren rapajkoakʼ siṅghạson koń ulṭạu giḍikatakoa ar onkoakʼ ektiạriń marao utạra. Iń do rãt gạḍiko ar onaren cakʼlao koń ulṭạu giḍikoa; sadomko ar aswariko do uniren boehawakʼ tarwaṛeteko gujukʼa.

23E Sealṭiel hopon ińren guti Serubabel, iń Probhu Isor do enhilokʼ ińakʼ chachap reakʼ mundạm lekań hoyocomea, ente iń do amiń bachao akatʼmea.’ Iń phạdkoren Probhu Isorge noa katha doń menetʼkana.”

← Chapter 1 Jump to: