James 5

Santali Bible (সান্তালী বাইবেল)

← Chapter 4 Jump to:

1E kisạ̃ṛko ańjompe. Apere okaṭakʼ kosṭo hijukʼkan ona lạgitʼ rakʼ homorpe ar hae haeyokʼpe.

2Apeakʼ dhon-durib do sea akantapea ar apeakʼ kicricʼko doko jạrnḍi akada.

3Apeakʼ sona ar rupạre joṅ dhorao akana, ar ona joṅ dhoraoge ape upạrte gohae ema ar seṅgel leka apeakʼ jele jomtapea. Ape do sesa sisi dinkore dhon-duribpe sońj akawana.

4Apeakʼ khetre okoe kạmiyạko phosolko samṭao akatʼtape onko do kuṛại bape emakatʼkoa; ar ńelpe, ona kuṛại do ńitokʼ ãṭ aṛaṅteye dusiyetʼpea. Sanam daṛean Probhu Isorakʼ luturre onko kạmiyạkoakʼ rakʼ do seṭerakana.

5Noa dhạrtire ạḍi nirạite dinpe ṭalaoeda ar bin sambṛaokʼtepe ten ocoakana. Gujukʼ din lạgitʼpe logno akana.

6Ape do dhorom hoṛkope dusi akatʼkoa arpe gocʼ akatʼkoa, ar onko do bako tạkicʼ daramletʼpea.

7Onate E boehako, tin hạbicʼ Probhu Isor bae hijukʼ unhạbicʼ jiwi hataṛkate jotowakʼ sahaope. Cetʼleka casa do khet reakʼ damanakʼ phosol lạgitʼe ńel horetʼkan ar pạhil ar mucạtʼ dakʼ lạgitʼe sombhuriyetʼ, ona mape ńeletʼkange?

8Ape hõ onkage sombhuripe ar ontorre teṅgo ṭak akae tahenpe, ente Probhu Isor do ạḍi usạrageye hijukʼ kana.

9E boehako, Isor jemon apeakʼ dosko aloe sabtape onate ape apere dos alope ladejoṅa. Ńelpe, bicạricʼ do duạr sorregeye hecʼakana.

10E boehako, okoe nạbiko Probhu Isor secʼ khon kathako roṛakatʼ, ar kosṭo oktere cetʼlekako sombhuri akatʼ tahẽkana ona katha do hudiskate ńelpe.

11Okoe sombhurikateko sahao akatʼ onko do bhạgankole metakokana. Ape do Jobe sumbrạuletʼ reakʼ kathape ańjomakada ar Probhu Isorakʼ kạmi reakʼ mucạtʼ jo do bhagegea mente ona hõpe ńelakada. Probhu Isorakʼ daya ar mãyã reakʼ mucạtʼtetʼ do bạnukʼa.

12E ińren boehako, iń do asokaete noa kathań metapekana, ape do serma, ar ot se eṭakʼ jãhãnakʼ ńutumte alope kiriạkʼa. Ona khon bickom, “Hẽ khan hẽ, ar baṅ khan baṅ,” hoyokʼtape ma, jemon bicạrre dayi alope hoyokʼ.

13Ape modre cetʼ jãhãe duke jomeda? Uni doe koejoṅ ma. Jãhãe sukre menaea?

14Uni doe sarhao sereń ma. Jãhãe ruạreye paṛao akana? Uni do manḍerren mukhiyạkoe hoho jarwakoma. Onko do Probhu Isor ńutumte uniyakʼ bohokʼre sunumko ojokʼaete uniko koeyae ma.

15Ar pạtiạuteakʼ koejoṅ do uni ruạkʼkan hoṛe bogeyea; Probhu Isorge uni doe bogeyea. Ar uniye kại akatʼ khan Isor do uniye ikạyea.

16Onate ape apere kạiko aṅgocpe ar ape ape lạgitʼ koejoṅpe, jemonpe bogekʼ. Isorakʼ sana leka okoeye calakʼkan uni do koejoṅ reakʼ daṛe menakʼtaete onae hoeocoya.

17Eliạ do abo lekage mitʼṭen manwae tahẽkana. Ar nehõr salakʼe koekeda jemon dakʼ hõ aloe dag, ar pe bochor tala disạmre bae dakʼleda.

18Uni do arhõe koekeda; unre serma do dakʼe emena ar ot do phosole omon ocokeda.

19E ińren boehako, ape modre jãhãe sạriyakʼ khone chingạulen khan ar ape modren jãhãe uniye ạcur ruạṛle khan,

20enḍekhan noa katha baḍaekakʼpe, jãhãe mitʼṭen kại hoṛ bhul hor khone ruạṛ ạguiye uni do gujukʼ khone bańcaoea ar ạḍi utạr kạiye dapaltaea.

← Chapter 4 Jump to: