Lamentations 5

Santali Bible (সান্তালী বাইবেল)

← Chapter 4 Jump to:

1E Probhu Isor, ale cetanre oka hoyakan ona baṛe disạime; ạribạndhime, ar aleakʼ henosta baṛe ńelme.

2Aleakʼ ạidạriko do bidisiạkoakʼ tire jimạ akana, ar aleakʼ oṛakʼ do eṭakʼ jạtren hoṛko em ocoakana.

3Ale do ṭũạr amarkole hoyakana, aleren baba do bạnuitalea, aleren gogo doko rạnḍi akana.

4Dakʼ do kirińkatele ńũiyeda; ar aleakʼ sahan hõ damtele kirińeda.

5Tarenre arãṛko ladeakatʼlea, ãṭko kạmi ocoyetʼlea laṅga cabayenale; jirạu do bạnukʼtalea.

6Ale do jomakʼko ńama iạte Misor ar Ạsurrenko gobolrenkole hoyakana.

7Aleren hapṛamko doko kạileda; onko do ńitokʼ ar bạnukʼkoa, menkhan ale do onkoakʼ ghạṭkole gokʼbaṛayeda.

8Golamkoge ale cetanre mạlikiko calaoeda; onkoakʼ ti khon bańcaole lạgitʼ celege bạnukʼkoa.

9Hahaṅkarre ḍạkuko botorte jiwi cuputʼkate jomakʼle jogaṛetʼkana.

10Aleakʼ harta do bhaṭa leka dhipạu akana; reṅgecʼ reakʼ jaljalao iạte.

11Maejiuko do Sionreko nosṭo ocokʼ kana; ar kũạri kuṛiko do Jihudạ ato ar nagrahakore.

12Cetan hudạren kạmiyạko do tire tolkateko akaketʼkoa; ar murubbiko do bako manot ocolena.

13Juạn koṛako do janteko ritʼeda; ar huḍiń koṛako do sahan bojha gokʼteko keḍe keḍekʼkana.

14Nagraha reakʼ phaṭok duạr ṭhen murubbiko do ar bako duṛupʼ kana; Juạnko hõ ar bako sereń durạṅeda.

15Aleakʼ mon khon rạskạ do caba akana ale do enecʼ baṅkatele halaṅ homoreda.

16Aleakʼ bohokʼ khon mukuṭ do ńur akana. Hae ale do, entele kại akada!

17Noa iạte aleakʼ mon do nijor akana, noako iạte aleakʼ mẽtʼ do ńuṛu ńuṛu akantalea.

18Sion buru do ujạṛakʼ hoyakana; toyoko do onareko dãṛã baṛaekana.

19E Probhu Isor, jaejug hạbicʼ rajokʼme; amakʼ siṅghạson do piṛhike piṛhi tahenkana.

20Am do cetʼ jaejug lạgitʼem hiṛiń akatʼlea? Nunạkʼ din khon cedakʼem bạgi giḍiakatʼlea?

21E Probhu Isor, bam nihạ̃t giḍi akatʼle khan, ale cetanre bam bekusi akan khan, enḍekhan am ṭhen baṛe ruạṛ idilem adole ruạṛ hijukʼa; ar sedae leka aleakʼ dinko baṛe ruạṛ kataleme.

← Chapter 4 Jump to: