Zechariah 13

Santali Bible (সান্তালী বাইবেল)

← Chapter 12 Jump to: Chapter 14 →

1“Iń phạdkoren Probhu Isorgeń meneda, enhilokʼ Dạudakʼ bõsren ar Jerusalemren hoṛkoakʼ kại ar besapha akanakʼ ạrupʼ saphae lạgitʼ mitʼṭecʼ jharna do jhijogokʼa. Ar enhilokʼ do disạm khon boṅgako sạṅgiń ocokʼa ar onkoakʼ ńutum do celehõ bako disạiya. Disạm khon onkoren nạbikoń sạṅgiń giḍikakoa ar bạṛicʼ jiuko hõń sạṅgińkoa.

3Enhõ jãhãe nạbi lekate kathako roṛ enḍekhan acʼren eṅgat-apat do unikin metaea, ‘am do gujukʼ hoyokʼtama, ente am do Probhu Isor ńutumte eṛe katham roṛeda.’ Ar nạbi lekate kathae roṛetʼkante uniren eṅgat-apat do unikin sobokʼ gojea.

4“Enhilokʼ mimitʼ nạbiko do uniyakʼ dorson reaṅko lajao ocokʼa. Ekʼṛe nạbiko leka upʼ reakʼ kicricʼ uni do bae horoga.

5Uni doe mena, ‘nạbi doń baṅkana, iń do mitʼṭen casa hoṛge; gidrạ tahen khonge iń do golam menteń ạkhriń ocoakana.’

6Ar jãhãege uniye kuliye, ‘amakʼ hoṛmore noako do cetʼ reakʼ dag kana?’ Uni doe roṛ ruạṛa, ‘ińren gatekoakʼ oṛakʼre oneń ghạllen onako reakʼ dag kangea noako do.’ ”

7Phạdkoren Probhu Isore meneda, “E tarwaṛe, am do ińren gukʼpiko upạrte, ińren sãoten hoṛko upạrte, ebhenokʼme. Gukʼpiyicʼ iń mageya, enḍekhan bhiḍiko doko chir chạturokʼa; ar iń do bhiḍi hoponko upạrte hõ tiyiń tula.

8Goṭa disạm reakʼ pe hạṭiń reakʼ bar hạṭińren hoṛ doko gocʼ ocokʼa, menkhan iń Probhu Isorgeń meneda, ona modre pe hạṭiń do jiwetʼko tahena.

9Niạ tesar hạṭińrenko do seṅgel talateń idikoa; rupạ cetʼlekako khạṭi ocoy onkage onko doń khạṭikoa ar sona cetʼlekako biḍạu aṭkar onkage onkoń biḍạu aṭkarkoa. Onko do ińko hohowạńạ ariń roṛ ruạṛakoa; ińiń metakoa, ‘noko do ińren hoṛ kanako,’ ar onkoko mena, ‘Probhu Isor do aleren Isor kanae.’ ”

← Chapter 12 Jump to: Chapter 14 →