1 Kings 2 — Sena Malawi

1Pikhali Davite chifupi kufa, adachemera mwanache Solomoni mbampanga pyonsene pidathema iye kuchita mbati,

2“Ine ndili chifupi kufa, natenepo wanga mtima pionese wekha ene kuti ndiwedi mamuna.

3Chita pyonsene pinafuna MBUYA Mulungu wako: teweza njira za MBUYA, pontho vera upangizi wache, matongero ache na pifunziso pyache pyonsene ninga montho mwalemberwa ipyo m'mwambo wa Mose, towera pyonsene pinaphata iwe pikufambire mwadidi konsene kunaenda iwe.

4Ngakhala unavera MBUYA, iye anachita pidadumbira iye kuna ine kuti: ‘Ngakhala pidzukulu pyako pinachita mphole-mphole na makhaliro awo, pontho ngakhala iwo anakhulupirika pamaso panga na mtimawo onsene pontho moyo wawo onsene, iwe nkhabe dzasowa munthu wakukhala pampando wachifumu wa Israele tayu.’

5“Kuthimiza penepa iwe ene ukupidziwa pidandichita Yoabu mwana Zeruia, pontho pidachita iye kuna Abineri mwana Neri na Amasa mwana Yetere, akadamu awiri a nkhondo a Israele. Iye adaapha, kuchuchisa chiropa chawo pandzidzi wa mtendere khala ninga mphankhondo, tenepo na chiropa chenechi adodesera bande ya m'chuno mwache na nkhwaira kumanyalo kwache.

6Chita kuna iye malingana na nzeru zako, mbwenye iwe nee wathema kumuleka kuti atchithire kudziko ya anyakufa mumtendere tayu.

7“Kwache akomere mtima ana achimuna a Barizilai wa ku Gileadi pontho atawirise kukhala abodzi akudya na iwe pathebulu pako. Iwo adandiphedza pandzidzi ukhathawa ine mbaleako Abisalomu.

8“Pontho kumbuka Shimei mwana Gera wa ku Bahurimu wa dzinza ya Benjemani. Iye adanditemberera pyakwanga pansiku ikhaenda ine ku Mahanaimu. Pidabwera iye kudzagumanikana nane pa mkulo wa Yorodani, ndidadumbira kuna iye na dzina ya MBUYA kuti, ‘Ine nkhabe dzakupha na talasada tayu.’

9Mbwenye chinchino leka kumuyesa okhonda dawa. Iwe ndiwe munthu wanzeru, unapidziwa wekha ene pyakuchita naye weneyu. Iwe wathema kumuendesa kudziko ya anyakufa nyaimvi weneyu.”

10Pidamala penepi Davite adagonera mkono mbaikhwa m'masiye mumzinda wa Davite.

11Iye adakhala mfumu wa Israele pyaka makumanayi: kutonga mu Hebroni pyaka pinomwe, pontho mu Yerusalemu pyaka makumatatu na pitatu.

12Natenepo Solomoni adakhala pampando wachifumu wa Davite babache, pontho ufumu wache udakhazikika pyakwanga.

13Kubuluka penepo Adonia ule mache akhali Hagiti adenda kuna Batesheba mache Solomoni. Batesheba adamvunza mbati, “Ayi nkhwadidi kwene?” Iye adatawira mbati, “Ande, nkhwadidi.”

14Iye adathimiza kulonga mbati, “Ine ndina chinthu chinango chakuti ndilonge namwe.” Mkazi ule adatawira mbati, “Unakwanisa kulonga.”

15Iye adatoma kulonga mbati, “Ninga munapidziwira imwe kale kuti ufumuwu ukhali wanga. Anthu onsene Aisraele akhayang'ana pana ine pano ninga mfumu wawo. Mbwenye lero pinthu pyasanduzika, ufumu waenda kuna mbaleanga; ufumuwo waenda kuna iye thangwi ampasa ndi MBUYA.

16Natenepo ndinafuna kukupemphani chinthu chibodzi basi. Ndaphata miyendo, lekani kundikhondera.” Mkazi ule adatawira mbati, “Ninji chinafuna iwe kulonga?”

17Natenepo iye adathimiza kulonga mbati, “Ndaphata miyendo ndipempherenimbo kuna Mfumu Solomoni kuti andipase Abishagi wa Chishunemu kuti akhale mkazanga. Ndikupidziwa kuti iye hanakukhonderani tayu.”

18Batesheba adatawira mbati, “Ande, ndatawira, ndinati ndikalonge na mfumu m'mbuto mwako.”

19Pidenda Batesheba kuna Mfumu Solomoni kalonga pya Adonia, mfumu adalamuka kagumanikana naye, adamulambira mbakhala na matako pa mpando wache wachifumu. Iye adachemeresa mpando unango kuti mache mfumu akhalirepo, tenepo macheyo adakhala kumadyo kwa mfumu ule.

20Mkaziyo adalonga mbati, “Ndina chinthu ching'ono ng'ono kuti ndikupempheni, lekani kundikhondera.” Mfumu adatawira mbati, “Ninji chinafuna imwe, mama; ine sinakukhonderani tayu.”

21Natenepo iye adalonga mbati, “Mtawirise Abishagi wa Chishunemu kuti asembwe na mbaleako Adonia.”

22Mfumu Solomoni adamtawira mache ule mbati, “Thangwi yache ninji mama mukupempha Abishagi wa Chishunemu kuti asembwe na Adonia? Ayi imwe nkhabe kupidziwa tayu kuti kupempha kweneku nkhumpemphera ufumu. Padzulu pa penepi iye ndi mbaleanga wamkulu, pontho Abiatara nyansembe pabodzi pene na Yoabu mwana Zeruia ali kukhundu kwache?”

23Tenepo Mfumu Solomoni adadumbira na dzina ya MBUYA mbati, “Mulungu mbanditchunyuse pyakwanga ngakhala Adonia hanaphiwa tayu thangwi ya chinthu chapempha iyechi.

24Natenepo ndinadumbira pamaso pa MBUYA, ule adandikhazikisa mwadidi pampando wachifumu wa babanga Davite, mbandipasa ufumu ninga montho mudadumbirira iye, kuti lero pano Adonia anati aphiwe!”

25Natenepo Mfumu Solomoni adenda kapanga Benaia mwana Yehoiada kuti aende kapha Adonia, tenepo iye adendadi mbampha.

26Tenepo Mfumu Solomoni adalonga kuna Abiatara nyansembe mbati, “Bwerera kumusa kwako mu Anatoti. Iwe wathema kuphiwa, mbwenye sinakupha chinchino tayu, thangwi iwe udathukula Bokosi ya Chiverano cha MBUYA Mulungu pamaso pa babanga Davite, pontho udakwata khundu panyatwa zonsene za babanga.”

27Natenepo Solomoni adabulusa Abiatara pa basa ya unyansembe wa MBUYA kuchitisa pinthu pikhadalonga MBUYA pa Shilo pya banja ya Eli kukwana-kwana.

28Pidava Yoabu, ule akhali kukhundu ya Adonia, nee kwa Abisalomu tayu, pya pyonsenepi iye adathawira ku Chikhumbi cha Mulungu mbakaphata nyanga za guwa yansembe.

29Mfumu Solomoni adapangwa kuti Yoabu athawira ku Chikhumbi cha MBUYA pontho kuti ali kuguwa yansembe. Tenepo Solomoni adapanga Benaia mwana Yehoiada mbati, “Ndoko kamkhamwadze.”

30Natenepo Benaia adapita m'Chikhumbi cha MBUYA mbalonga kuna Yoabu mbati, “Mfumu alonga kuti ubuluke muno.” Iye adatawira mbati, “Nkhabe, ine ndinati ndifere muno.” Benaia adalonga kuna mfumu mbati, “Mwenemu ndiye mwanditawirira Yoabu.”

31Kubuluka penepo mfumu adapanga Benaia mbati, “Chita ninga mwalongera iye. Mkhamwadze pontho umuikhe m'masiye, towera pidachita Yoabu pakupha anthu okhonda dawa pileke gwera pamsolo panga na pa banja ya babanga.

32MBUYA anati ambwezere thangwi ya upandu udachita iye. Iye adapha amuna awiri na talasada mwakukhonda dziwa babanga Davite. Amuna onsene awiriwa, Abineri mwana Neri mkadamu wa anyankhondo a Israele na Amasa mwana Yetere mkadamu wa anyankhondo a Yuda, akhali anthu adidi pontho akulungama kupiringana iye.

33Kutchunyuswa thangwi ya kuphiwa kwa anthu enewa mbakugwere Yoabu na pidzukulu pyache kwenda na kwenda. Mbwenye kuna Davite MBUYA anatsanzayisa pidzukulu pyache, banjache, na ufumu wache mbapakhala mtendere kwenda na kwenda.”

34Natenepo Benaia mwana Yehoiada adenda ku Chikhumbi cha Mulungu chile mbakhamwadza Yoabu, iyembo mbaferatu ponthopo, tenepo adaikhwa m'masiye a pamsuwo pache m'thando yatchetcha.

35Mfumu adaikha Benaia mwana Yehoiada kukhala mkadamu wa anyankhondo onsene m'mbuto mwa Yoabu mbaikha pontho Zadoki kukhala nyansembe m'mbuto mwa Abiatara.

36Kubuluka penepo mfumu adachemeresa Shimei mbalonga kuna iye mbati, “Pimangire nyumba mu Yerusalemu mbukhale mwenemo, kwache leka buluka mumzindamo kwenda kwinango.

37Nsiku inabuluka iwe mbuwambuka phedi ya Kidroni, upidziwiretu kuti unafa, pontho chiropa chako chinakhala pamsolo pako.”

38Shemei adatawira mbati, “Pyalonga imwepi mfumu mphyadidi. Ine nyabasanu ndinachita ninga mwalongera imwe mbuyanga mfumu.” Tenepo Shimei adakhala mu Yerusalemu ndzidzi ukulu ene.

39Mbwenye pidagwanda pyaka pitatu mabitchu awiri a Shimei adathawa kwenda kuna Akishi mwana Maaka, mfumu wa ku Gati. Tenepo pidapangwa Shimei kuti mabitchu ache akhali ku Gati,

40iye adapakira bulu wache mbaenda kuna Mfumu Akishi ku Gati kasaka-saka mabitchu ache. Natenepo Shimei adaagumana kweneko mbadza nawo kumusa kwache.

41Pidapangwa Solomoni kuti Shimei akhadenda ku Gati kubulukira mu Yerusalemu pontho kuti abwerako,

42mfumu adachemeresa Shimei mbalonga kuna iye mbati, “Ayi ine sidakudumbirise tayu pamaso pa MBUYA mbandikucheuza kuti, ‘Nsiku inabuluka iwe muno mbuenda kwinango, upidziweletu kuti unafa?’ Nsiku yeneyo iwe udalonga kuti, ‘Pyalonga imwepi mphyadidi. Ndinati ndipivere.’

43Apo thangwi yache ninji udakhonda chita pidadumbira iwe kuna MBUYA mbukhonda kuvera matongero adakupasa ine?”

44Mfumu adalonga pontho kuna Shimei mbati, “Iwe ukupidziwa mumtima mwako pyonsene pyakudawika pidachitira iwe babanga Davite. Natenepo MBUYA anati akubwezere thangwi ya pyakudawika pyonsene pyachita iwe.

45Mbwenye Mfumu Solomoni anatsanzayiswa pontho ufumu wa Davite unakhala wakutchinjirizwa mwadidi pamaso pa MBUYA kwenda na kwenda.”

46Kubuluka penepo mfumu adapanga Benaia mwana Yehoiada ule adenda mbakapha Shimei. Kubuluka penepo ufumu udakhazikika pyakwanga m'manja mwa Solomoni.