1 Thessalonians 5

Sena Malawi

← Chapter 4 Jump to:

1Abale, nkhabe funika tayu kuti tikulembereni pya nsiku na ndzidzi unafuna dzachitika pinthu penepi.

2Thangwi imwe mukupidziwa mwadidi mwene kuti Nsiku ya Mbuya inabwera ninga mumbabwerera mbava mosiku.

3Ndzidzi umbalonga anthu kuti, “Tili pa mtendere, pontho nkhabe chakugoswa,” penepo pene nyatwa zikulu zinagwa pana iwo mwakututumusa ninga kuva kupha kwa mkazi wamimba angafuna kubala, tenepo anthu hanathawa tayu.

4Mbwenye, abale, imwe nee muli mumdima tayu, natenepo nsiku yeneyo ileke kukudodomesani ninga kubwera kwa mbava.

5Imwe monsenene ndimwe anthu a cheza, anthu a masikati. Ife si ife anthu a mosiku penu a mumdima tayu.

6Tenepo mbatilekeni kugona chitulo ninga anangowa, mbwenye mbatikhaleni m'maso, pontho mbatikhaleni akuuphata mtima.

7Anyakugona ambagona na mosiku, pontho anyakuledzera ambaledzera na mosiku.

8Ife ndife anthu a masikati, natenepo mbatikhaleni akuuphata mtima. Tendeni tivale chikhulupiro na kufunana ninga chisimbi chakutchinjiriza nacho pagangafuwa pathu, pontho chidikhiro cha chipulumuso ninga chipewu chakutchinjirizira nacho misolo yathu.

9Mulungu hadatisankhule kuti atitchunyuse na ukali wache tayu, mbwenye kuti atipulumuse kudzera muna Mbuyathu Yesu Khristu,

10ule adatifera, towera tikhale na moyo pabodzi naye, penu tikhale na moyo penu tife pandzidzi unafuna iye dzabwera pontho.

11Natenepo wangisanani mtima na kuphedzana unango na mwanzache, ninga munachitira imwe chinchino.

12Abale, tikukupemphani kuti mulemedze anyakuphata basa pakati panu, ale ambakutsogolerani na kukupangizani makhaliro adidi pa moyo wanu wachikhristu.

13Alemedzeni na kuafuna pikulu thangwi ya basa imbaphata iwo. Khalani mwamtendere pakati panu.

14Abale athu, tikukudembeterani kuti mucheuze anthu akupolola, wangisani mtima anthu amantha, phedzani anyakusowa mphamvu, pontho khalani akupirira kuna anthu onsene.

15Lekani kubwezera chakuipa mwanzanu angakuchitirani chakuipa, mbwenye ndzidzi onsene khalani anthu akufuna kuchitirana udidi kuna unango na mwanzache, pontho na kuna anthu onsene.

16Komerwani ndzidzi onsene,

17pempherani mwakukhonda lekeza,

18perekani takhuta kuna Mulungu papinthu pyonsene pimbachitika. Penepi ndiye pinafuna Mulungu kuti imwe mupichite m'moyo wanu wakuphatanizana na Khristu Yesu.

19Lekani thimisa moto wa Mzimu Wakuchena,

20lekani lulupisa mphangwa zakubulukira kuna Mulungu,

21mbwenye yesani pyonsene; chitani pinthu pyadidi ndzidzi onsene,

22pontho thundani pinthu pyakuipa pya mtundu onsene.

23Mulungu, ule ambatipasa mtendere, akusanduseni kukhala anthu akupambulika monsene mwene, pontho akoye mwadidi mzimu, moyo na manungo anu, towera mukhale anthu akusowa chinthu chakukupokanyisani pandzidzi unafuna dzabwera pontho Mbuyathu Yesu Khristu.

24Mulungu ambakuchemerani ule anachita pyonsenepi, thangwi iye ngwakukhulupirika.

25Abale, tipempherenimbo ife.

26Perekani mwenyikiro kuna anyakukhulupira onsene kuonesa kuafuna kwanu.

27Na utongi wa Mbuya, ndikukudembeterani kuti muwerenge kalatayi kuna anyakukhulupira onsene.

28Kukoma mtima kwa Mbuyathu Yesu Khristu kukhale namwe.

← Chapter 4 Jump to: