2 Peter 2

Sena Malawi

← Chapter 1 Jump to: Chapter 3 →

1Maprofeti akunama adaoneka kale ene pakati pa anthu, sasawambo afunzisi akunama anaoneka pakati panu. Iwo anadzesa chibiso-biso pifunziso pyakunama pyakuvunga mbakhonda Mbuya adaaombola ule. Tenepo iwo anapichemerera okha ene kuvungika kwakututumusa.

2Anthu azinji anateweza makhaliro awo akuzuda; anango analonga tsweda Njira Yakuonadi, thangwi ya pinthu pimbachita iwo.

3Na thangwi ya kufuna mfuma afunzisiwa anakudyerani nkope-kope na pithankano pidapeka iwo pile. Kwache kutchunyuswa kwawo kwasasanywa kale, pontho Nyakuavunga ali m'maso kuadikhira.

4Mulungu hadaleke kutchunyusa angelo adadawa ale tayu, iye adaaponya kugehena, kumdima kule kunakoyiwa iwo uku amangwa na njema kudikhira Nsiku inafuna dzatonga Mulungu anthu mseru.

5Mulungu hadaleke kutchunyusa anthu akale ale tayu, iye adadzesa madzi makulu padziko yonsene yapansi kuna anthu okhonda tsalakana pya Mulungu, mbwenye adapulumusa Nowa, ule adalalika pya chilungamo, pabodzi pene na anthu anango anomwe basi.

6Mulungu adatchunyusa mizinda ya Sodomu na Gomora, adaivungiratu na moto mbachitisa kuti ikhale upangizi kuna pinafuna dzachitikira anthu okhonda tsalakana pya Mulungu.

7Iye adapulumusa Loti, munthu wakulungama, ule akhanensiwa na makhaliro akuzuda a anthu okhonda tsalakana pya mwambo ale.

8Munthu wakulungamayu akhakhala pakati pawo, tenepo nsiku na nsiku iye adasanyika pyakwanga na kuona, pontho na kuva makhaliro akudawika akhachita anthu ale.

9Mbuya ambadziwa kupulumusa pamayesero anthu ambatsalakana pya iye ale, pontho na kukoya anthu akudawa kudikhira kuatchunyusa Nsiku inafuna iye dzatonga mseru anthu a padziko yapansi,

10maka-maka anthu ambateweza pikhumbo pyakunyansa pya manungo ale mbalulupisa utongi wa Mulungu. Afunzisi akunama ngakuwanga mtima, pontho akudungudza, pontho nkhabe chita mantha kutikana pyakulengwa pyademelero pyakudzulu tayu.

11Podi na angelo ene, ale ngamphamvu pikulu kupiringana afunzisi akunamawa, nkhabe kuasumira na mafala akutikana pamaso pa Mbuya tayu.

12Mbwenye anthu enewa akhala ninga nyama zam'tsanga, pirombo pyakusowa nzeru, pile pidabalwa kwene kuti piphatwe na kuphiwa basi, pimbatikana iwo pinthu pyonsene pinakhonda iwo kuvesa. Iwo anavungwa ninga nyama zam'tsanga,

13tenepo iwo anabwezerwa nyatwa thangwi ya nyatwa zidaonesa iwo anthu anango. Chinthu chimbaakomera nkhuchita pakwecha na masikati pinthu pyakukhutisa pikhumbo pya manungo awo; iwo ngakunyansa, pontho ngakuchitisa manyadzo angadya namwe pabodzi, thangwi ambakomerwa na kukunyengezani.

14Iwo nkhabe yang'ana chinango tayu, mbwenye akazi akuti achite nawo uputa; pikhumbo pyawo kufuna kuchita pyakudawika nkhabe khuta tayu. Iwo ambachitisa anthu akusowa mphamvu kukweshwa na misampha. Iwo ngaluso pakuchita mtima, pontho Mulungu aatemberera!

15Iwo asiya njira yakulungama, pontho abauka kubuluka kuna njirawo; iwo atewera njira ya Balamu, mwana Beori, ule adakhumba mfuma idakwanisa iye kuigumana, thangwi ya kuchita kwache pyakudawa ile,

16tenepo iye adasumululwa thangwi ya pyakudawa pyache. Bulu wache, nyama yakukhonda longa, adalonga na fala ya munthu mbamkhondesa kuchita pyakuseluka pikhafuna chita mprofetiyo.

17Anthu enewa akhala ninga mphuno zakuuma za madzi, pontho akhala ninga nkhungu yakugwinywa na mphepo; Mulungu aakoyera mbuto yawo kumdima wakugoswa pyakwanga.

18Iwo ambalonga mafala akudungudza, pontho akupupwa, pontho ambaphatisa basa pikhumbo pyakuipa pyakusirira pya manungo kukwesha napyo ale atoma kwene chinchino kupulumuswa pakati pa anzawo akale akudawika.

19Iwo ambadumbira pya utumbe, mwenemo iwo ndi mabitchu a pinthu pyakuipa pimbavunga pile, thangwi munthu ambasanduka bitchu wa pinthu pimbamkunda pile.

20Ngakhala anthu anapulumuka kuna pyakuipa pya pansi pano pimbaavunga pile pakudziwa Mbuyathu pontho Nyankhombo wathu Yesu Khristu, m'nduli mwache mbakweshwa pontho kukundwa na pinthu pyonthopyo, pakumalisira pache anakhala wakunyanya kuipa kupiringana mukhali iye pakutoma pale.

21Iwo mbadakhonda dziwa njira yakulungama, mbapidakhala pyadidi kuna iwo, kusiyana na kuidziwa mbabauka kubuluka kuna matongero akuchena adapaswa iwo ale.

22Pinthu pyaachitikirapi pikuonesa kuona kwa mwambi wakuti, “Mwanambwa ambabwerera kadya pontho matapiko ache,” pontho “Nkhumba imbabwerera pontho kabulumunda m'matope ingamala sambiswa.”

← Chapter 1 Jump to: Chapter 3 →