Daniel 7

Sena Malawi

← Chapter 6 Jump to: Chapter 8 →

1Chaka chakutoma wa Beleshazara mbali mfumu wa Babiloni, Daniele adalota, pontho adaona masomphenya pikhagona iye na mosiku. Ndotozo adazilemba, tenepo pidalota iyepyo pikhali tenepa:

2Ine, Daniele ndidaona kumasomphenya mphepo ikumenya kubulukira makhundu onsene manayi mbivundula madzi a m'bara ikulu.

3Pirombo pikulu-pikulu pinayi pidaluthuka m'bara mule, chonsene mbichikhala na makhaliro akusiyana na chinzache.

4Chakutoma chikhaoneka ninga nkhalamu, pontho chikhali na maphaphido ninga mphamba; pikhachiyang'ana ine maphaphido ache adakhwadzuka. Tenepo icho chidalamuswa mbachiimira na miyendo miwiri ninga munthu. Natenepo icho chidapaswa mtima wa munthu.

5Chirombo chachiwiri chidaoneka ninga thika wakuimira todoga na miyendo yache ya m'nduli. Icho chidapananga mbavu zitatu kukanwa kwache, tenepo icho chidapangwa kuti, “Lamuka, idya pyako nyama ninga munakwanisira iwe!”

6Ndili m'kati kuyang'ana, chirombo chinango chidaoneka. Icho chikhaoneka ninga nyalugwe, kwache kunduli kwache chikhali na maphaphido anayi ninga a mbalame. Chirombo chenechi chikhali na misolo minayi, tenepo chidapaswa mphamvu zakutonga nazo.

7Pikhathimiza ine kuyang'ana, ndidaona chirombo chinango chachinayi. Chenechi chikhali chakuchitisa mantha, chakugoswa pontho champhamvu. Icho chikhali na mano makulu-makulu ninga mapaza; icho chikhadya na kupwetedza na kuponderera pyonsene pyakusalira. Icho chikhali na nyanga khumi kusiyana na pirombo pinango pile.

8Pikhayang'ana ine nyanga zile, ndidaona kanyanga kang'ono kamera pakati pa nyanga zile. Iko kadakhutcha nyanga zinango zitatu zikhali penepo kale zile. Kanyanga keneka kakhali na maso ninga a munthu, pontho kanwache ikhalonga pinthu pyakulunkuma.

9Pikhathimiza ine kuyang'ana, mipando ikhaikhwa m'mbuto mwache. Nyakukhalapo kwenda na kwenda adakhala pampando wache. Nguwo zache zikhali zakuchena ninga matalala; tsisi ya mumsolo mwache ikhali yakuchena ninga thonje. Mpando wache ukhayerima moto, pontho magaletache onsene akhagaka moto.

10Mkulo wakugaka moto ukhakuka kubulukira kuna iyeko. Pikwi-pikwi pya anthu adamutumikira; anthu pikwi khumi na kumanyalo adaimira pamaso pache. Thando ya miseru idatoma basache, tenepo mabukhu adamala fungulwa.

11Tenepo ine ndidathimiza kuyang'ana, thangwi ya mafala akulunkuma akhalonga kanyanga kale. Ine ndidathimiza basi kuchiyang'ana mpakana chirombo chachinayi chile chidaphiwa mbichiponywa pamoto, tenepo chidamala pyerera.

12Pirombo pinango pitatu pile pidapokoserwa utongi wawo. Kwache ipyo pidatawiriswa kuthimiza kukhala na moyo ndzidzi ene pang'ono.

13Pidaona ine masomphenya enewa na mosiku mwache, ndidaona unango wakuoneka ninga mwana munthu. Iye akhadza pamakole akudzulu mbaenda kuna Nyakukhalapo kwenda na kwenda ule, mbaimira pamaso pache.

14Iye adapaswa utongi, chilemedzo na ufumu, towera anthu a madzinza onsene, a mtundu onsene na chilongero chonsene ampembedze. Utongi wache ukhali wakwenda na kwenda, pontho ufumu wache ukhali okhonda mala.

15Masomphenya adaona ine ale adandichitisa mantha mbandimalwa nawo nzeru.

16Penepo ndidafedza chifupi na ule akhaimira penepo mbandimvunza chadi-chadi chache cha pinthu penepi. Tenepo iye adanditchululira pinthu penepyo ninga tenepa:

17“Pirombo pikulu-pikulu pinayipi pikuimirira maufumu anayi, ale anafuna dzaoneka padziko yapansi.

18Kwache anthu akuchena a Nyakudzulu-dzulu anatambira ufumu, tenepo unakhala wawo ene kwenda na kwenda.”

19Kubuluka penepo ine ndikhafuna kudziwa chadi-chadi chache cha pya chirombo chachinayi, chile chikhali chakusiyana makhaliro na pinango pyonsene, pontho chakugoswa pyakwanga, chakukhala na mano ninga mapaza, pontho na ngole zankuwa, chirombo chile chimbadya na kupwetedza nyama pontho kuponderera pyonsene pyakusalira.

20Ine ndikhafuna pontho kudziwa pya nyanga khumi zikhali pamsolo pache zile, pontho na kanyanga kadamera m'nduli mwache, kale kadakhutcha nyanga zinango zonsene zitatu zile. Nyanga yeneyi ikhali na maso pontho kanwa mbalonga mwakulunkuma. Nyanga yeneyi ikhali yakugoswa pyakwanga kupiringana inango yonsene.

21Pikhayang'ana ine, nyanga yeneyi ikhachita nkhondo na anthu akuchena a Mulungu, pontho akhaakunda.

22Tenepo Nyakukhalapo kwenda na kwenda ule adadza mbatonga mseru mwakukomera anthu akuchena a Nyakudzulu-dzulu, pontho ndzidzi udafika udatambira iwo ufumu.

23Iye adandithumbusulira ninga tenepa: “Chirombo chachinayi chikuimirira ufumu wachinayi, ule unafuna dzakhala padziko yapansi, pontho mbukhala wakusiyana na unango onsene. Iwo unapwetedza, pontho kupondedza dziko yonsene yapansi.

24Nyanga khumi zile ndi mafumu khumi anafuna dzatonga ufumu wenewo ale. Kubuluka penepo mfumu unango anaoneka; iye anakhala wakusiyana na mafumu akutoma ale mbakunda mafumu atatu.

25Iye analonga mwakupokanyisana na Nyakudzulu-dzulu mbavuya anthu ache akuchena. Iye anayesera kusanduza maphwando awo akupambulika na matongero awo a chipembedzo. Anthu a Mulungu anakhala pansi pa utongi wache pyaka pitatu na miyezi mitanthatu.

26Kubuluka penepo thando ya miseru ya kudzulu inatoma basache, tenepo iye anapokoserwa mphamvu zache mbavungwa monsene mwene.

27Mphamvu, demelero na ukulu onsene pya maufumu a padziko yapansi pinaperekwa kuna anthu akuchena a Nyakudzulu-dzulu. Ufumu wawo nkhabe dzamala tayu, pontho atongi onsene a padziko yapansi anaatumikira na kuavera.”

28Kweneku ndiye kumala kwa pinthu penepi. Ine Daniele ndidaphatwa na mantha pyakwanga mwakuti nkhope yanga idabuluka kaluma, thangwi ya pinthu pidaona inepi, kwache ndidakoya pyonsenepi mumtima mwanga.

← Chapter 6 Jump to: Chapter 8 →