Ezra 7

Sena Malawi

← Chapter 6 Jump to: Chapter 8 →

1Pidagwanda pyaka pizinji pene, pikhali Aritaserisese mfumu wa ku Peresia, pakhali munthu unango dzinache Ezara, mwana Seraia, mwana Azaria, mwana Hilikia,

2mwana Shalumu, mwana Zadoki, mwana Ahitubu,

3mwana Amaria, mwana Azaria, mwana Meraioti,

4mwana Zerahia, mwana Uzi, mwana Buki,

5mwana Abishua, mwana Finiasi, mwana Eleazara, mwana Aroni Nyansembe Wamkulu.

6Ezara weneyu ngule adabulukira ku Babiloni. Iye akhali mfunzisi wakudziwisa mwadidi mwambo wa Mose, udapereka MBUYA Mulungu wa Israele ule. Mfumu adampasa pyonsene pidapempha iye, thangwi MBUYA Mulungu wache akhali naye.

7Anango mwa Aisraele, kuthimizapo anyansembe, Alevi, anyakuimba nyimbo, anyakulondali pamsuwo na anyakuphata basa m'Nyumba ya Mulungu adadzambo ku Yerusalemu chaka chachinomwe cha Mfumu Aritaserisese.

8Ezara adafika mu Yerusalemu mwezi wachishanu wa chaka chache chachinomwe.

9Ulendo wache adautomera ku Babiloni pansiku yakutoma ya mwezi wakutoma mbafika ku Yerusalemu pansiku yakutoma ya mwezi wachishanu thangwi Mulungu wache adamkomera mtima.

10Ezara adapipereka moyo wache onsene kuti adziwe matongero na mwambo wa MBUYA, pontho kufunzisa matongero ache pontho na pifunziso pyache kuna Aisraele.

11Mfumu Aritaserisese adalembera Ezara nyansembe pontho nyakudziwisa mwambo, ule adafunza pizinji pya matongero na mwambo wa MBUYA kuna Aisraele kalata ishi:

12“Kubulukira kuna Aritaserisese, mfumu wa mafumu, kwenda kuna Ezara nyansembe pontho nyakudziwisa mwambo wa MBUYA wa kudzulu.

13“Ine ndikutonga kuti muufumu wanga, Aisraele onsene, anyansembe na Alevi ale anafuna pyakwenda namwe ku Yerusalemu anakwanisa kwenda.

14Ine pabodzi pene na mapungu anga manomwe ndikukutumani kuti mukavunze-vunze pya mule munafambira pinthu mu Yerusalemu na Yuda, towera kuona ngakhala mwambo, udakupasani Mulungu wanu ule, ukuverwadi.

15Imwe mwathema kukwata mitukwa ya golidi na siliva inafuna ine na mapungu anga kupasa Mulungu wa Israele ile, ule Nyumbache ili ku Yerusalemu.

16Imwe mwathema kukwata golidi na siliva adasonkhesa imwe m'nthemba yonsene ya Babiloni na pyakupereka pidapereka Aisraele na anyansembe mwakufuna kwawo kuti pikhale pya ku Nyumba ya Mulungu wawo ku Yerusalemu.

17“Iwe wathema kuchita mphole-mphole pakuphatisa basa kobiri zenezi, tenepo ugule ng'ombe zimuna, mabira achimuna, mapira na vinyu mbupipereke nsembe paguwa yansembe m'Nyumba ya Mulungu ku Yerusalemu.

18Iwe na amunako munakwanisa kuphatisa basa golidi na siliva wakusalira pabasa yonsene malingana na kufuna kwa Mulungu wanu.

19Iwe wathema kupereka kuna Mulungu ku Yerusalemu pyombo pyonsene pyapaswa imwe kuti piphatiswe basa m'Nyumba ya Mulungu pile.

20Chinthu chonsene chinafuna imwe kuti chiphate basa pa Nyumba ya Mulungu mukachikwate kubulukira kuthumba yachifumu.

21“Ndikutonga mathubu onsene ale anakoya kobiri ya kunthemba yakumadokero dzuwa a mkulo wa Yufurate kupereka mwakukomerwa kuna Ezara nyakudziwisa mwambo wa Mulungu wa kudzulu pinthu pyonsene pinapempha iye;

22mpakana mdidache ukwane: siliva makilogramu pikwi pitatu na madzana manayi, tirigu makilogramu pikwi khumi, vinyu m'mabuyawo madzana manayi, mafuta aolivi m'mabuyawo madzana manayi, pontho na munyu uzinji ene ninga munafunikira ipyo.

23Imwe mwathema kuonesesa kuti mwapereka pyonsene pinafuna Mulungu wa kudzulu kuti piphatiswe basa pa Nyumbache, gopesera anandizhangalira ine na ale ene anafuna kudza m'nduli mwangamu.

24Imwe mwakhondeswa kukhomesa msonkho anyansembe, Alevi, anyakuimba nyimbo na anyakulondali misuwo ya Nyumba ya Mulungu penu anthu onsene akuphata basa m'Nyumba ya Mulunguyi.

25“Iwe Ezara, pakuphatisa basa nzeru zidakupasa Mulungu wako, wathema kusankhula amuna akudziwa mafambisiro a pinthu pontho na anyakutonga miseru kuti atonge anthu a kunthemba yakumadokero dzuwa a mkulo wa Yufurate, ale ambateweza mwambo wa Mulungu. Iwe wathema kufunzisa mwambowo kuna munthu onsene okhonda kuudziwa.

26Ngakhala munthu unango anakhonda kuvera mwambo wa Mulungu wanu penu matongero a mfumu, weneyo athema kutchunyuswa pikulu pene na imfa penu kuthamangiswa m'dziko, penu kupokoserwa pinthu pyache, penu kuikhwa m'perezo.”

27Ezara adalonga mbati, “Kuzani MBUYA Mulungu wa makolo athu. Iye achitisa mfumu kulemedza Nyumba ya Mulungu mu Yerusalemu na njira yeneyi.

28Tenepo na kundifuna kwache kokhonda mala kwandionesa iye, Mulungu achitisa mfumu na mapungu ache pontho na mathubu ache onsene amphamvu kundikomera mtima. Ndidawanga mtima thangwi MBUYA Mulungu wanga akhali na ine, natenepo ine ndakwanisa kunyengerera akadamu a mabanja azinji kubwerera nane pabodzi.”

← Chapter 6 Jump to: Chapter 8 →