Hebrews 13

Sena Malawi

← Chapter 12 Jump to:

1Thimizani kufunana unango na mwanzache ninga abale.

2Khalani anthu akutambira alendo mwadidi m'nyumba mwanu. Akhalipo anango ale adachita penepi, pontho adatambira angelo mwakukhonda kupidziwa.

3Kumbukani anthu ali m'perezo ale khala ninga imwembo muli nawo pabodzi m'perezomo. Kumbukani anthu ali panyatwa ale khala ninga nyatwa zinaona iwozo mukuziona ndimwe.

4Mphyakufunika kuti banja ilemedzwe na anthu onsene; amuna na akazi akhale akukhulupirika kuna unango na mwanzache, thangwi anthu akuchita pyakuzuda na uputa ale, anakonwa pamaso pa Mulungu.

5Lekani khala anthu akufuna pyakwanga kobiri, pontho mwathema kukwana na pinthu pina imwe. Thangwi Mulungu alonga mbati, “Ine nkhabe dzakusiyani tayu; ine nkhabe dzakutayani tayu.”

6Apo tendeni tiwange mtima mbatilonge kuti, “Nyakundiphedza ndi Mbuya Mulungu, tenepo ine nkhabe dzachita mantha. Munthu anandichitanji?”

7Kumbukani akadamu anu akutoma, ale adalalika mafala a Mulungu kuna imwe. Nyerezerani pya moyo ukhali na iwo ule, pontho tsanzirani chikhulupiro chikhali na iwo chile.

8Yesu Khristu nkhabe sanduzika tayu; ngontho ule dzulo, lero, pontho kwenda na kwenda.

9Lekani kutawirisa pifunziso pyakunama kukubausani. Mphyadidi kuwangiswa mtima na kukoma mtima kwa Mulungu, nee pakuvera matongero akulonga pya pinthu pyakuthema kudya tayu; anthu ambavera matongero ninga enewa nkhabe ganyali nawo tayu.

10Ife tina guwa ile anyansembe akutumikira m'mbuto zakupembedzeramo ya Ayuda nkhabe tawiriswa kudya nsembe zakuperekwa paguwapo tayu.

11Nyansembe Wamkulu wa Chiyuda ambapita na chiropa cha nyama m'Mbuto Yakuchenesesa kapereka nsembe zakuti pyakudawa pilekererwe, mbwenye manungo a nyamazo akhapiswa kunja kwa msasa.

12Ndi thangwi yache Yesu adafa kunja kwa mzinda, towera kuchenesa anthu kuna pyakudawa na chiropa chache.

13Apo tendeni kuna iyeko kunja kwa msasa kuti tikalulupiswe naye pabodzi.

14Thangwi ife nkhabe mzinda wakukhazikika pansi pano tayu; unafuna ife ndi mzinda unadzawo.

15Tenepo tendeni ndzidzi onsene tikuze Mulungu kudzera muna Yesu ninga nsembe, ile imbapereka mulomo wathu pakutawira kuti iye ndi Mbuya.

16Kumbukani kuchita udidi, pontho kuphedzana unango na mwanzache, thangwi penepi ndi nsembe zimbakomera Mulungu zile.

17Lemedzani akadamu anu, pontho verani pinalonga iwo. Iwo ambayang'anira miyoyo yanu okhonda kupuma, thangwi iwo athema kulonga pya basawo pamaso pa Mulungu. Ngakhala imwe munaavera, iwo anaphata basawo mwakukomerwa, mbwenye ngakhala munakhonda kuavera, iwo anaphata basa mwakutsukwala, tenepo imwe nee munaganyali napyo tayu.

18Thimizani kutipempherera. Tikupidziwa kuti tina chikumbu mtima chakusowa chakupokanyisa, thangwi pinafuna ife mphyakuti ndzidzi onsene tichite pinthu pyakulungama.

19Ndikukupemphani na mtima onsene kuti mupemphere kuti Mulungu anditumize pontho kuna imweko chinchino pano.

20Mulungu alamusa Mbuyathu Yesu kuimfa, ule ndi Makabuswa Wamkulu wa mabira thangwi ya kufa kwache pamtanda ninga nsembe, ile imbatsikimiza chiverano chokhonda mala. Mulungu wa mtendere mbakupaseni pinthu pyonsene pyadidi pinasowa imwe, towera muchite pinafuna iye, pontho iye mbachite muna ife pinthu pyakumkomera kudzera muna Yesu Khristu. Kuna Khristu kukhale demelero kwenda na kwenda! Ameni.

22Abale anga, ndikukupemphani kuti muavese mwakupirira mafala akukuwangisani mtimawa, thangwi kalata yakulemberani ineyi njing'ono.

23Ine ndinafuna kuti mupidziwe kuti mbaleathu Timoti abuluswa m'perezo. Iye angafika msanga, ndinati ndidze naye pabodzi ndingadza kweneko dzakuonani.

24Perekani mwenyikiro kuna akadamu anu onsene, pontho na anthu onsene a Mulungu. Abale athu a kudziko ya Italia akukupasanimbo mwenyikiro.

25Kukoma mtima kwa Mulungu mbakukhale na imwe monsene.

← Chapter 12 Jump to:

Recommended Reading

Commentary Hebrews Commentaries → Devotional Hebrews Devotional Guide → Get This Bible Sena Malawi Study Bible →