John 18

Sena Malawi

← Chapter 17 Jump to: Chapter 19 →

1Pidamala Yesu kupemphera, iye na anyakufunzache adabuluka mbawambukira kumtunda unango wa mkulo wa Kidroni. Kweneko kukhali munda, tenepo Yesu na anyakufunzache adapita m'mundamo.

2Yudasi, nyakupereka Yesu kuna anyamalwache ule, akhaidziwa mbutoyo thangwi kazinji kene Yesu akhadagumanyikana na anyakufunzache kweneko.

3Tenepo Yudasi ule adenda kumundako pabodzi na gulu ya anyankhondo a Chiroma pabodzi na anango mwa anyakulondali Nyumba ya Mulungu akutumwa na anyansembe akulu pontho na Afarisi. Iwo adathukula pida, nyale na nsakali.

4Yesu adadziwiratu pyonsene pikhafuna kumchitikira, tenepo adenda patsogolo mbaavunza mbati, “Anafuna imwe mbani?”

5Iwo adatawira mbati, “Yesu wa ku Nazareti.” Tenepo Yesu adatawira mbati, “Ndine ene pano.” Yudasi, nyakupereka Yesu ule, adaimira ponthopo pabodzi nawo.

6Pidalonga Yesu kuna iwo mbati, “Ndine ene pano,” iwo adafundukira m'nduli mbagwa pansi.

7Yesu adaavunza pontho mbati, “Anafuna imwe mbani?” Iwo adatawira mbati, “Yesu wa ku Nazareti.”

8Yesu adalonga mbati, “Ndakupangani kale kuti ndine pano. Apo ngakhala munafuna ine, alekeni anangowa aende pyawo.”

9Iye adalonga penepi kuti pikwane-kwane pikhadalonga iye pile kuti, “Baba, ine sidataye na mbodzi ene pa anthu adandipasa imwe ale tayu.”

10Simoni Peturo ule akhali na talasada, adaicholola mbakhamwadza nayo bitchu wa Nyansembe Wamkulu mbagwandiratu khutu yache yakumadyo. Dzinache bitchu weneyu ikhali Malikosi.

11Yesu adapanga Peturo mbati, “Feka talasada m'mbuto mwache! Kani ukunyerezera kuti ndinamwa tayu khomitcho ya nyatwa yandipasa Babayi?”

12Gulu ya anyankhondo a Chiroma pabodzi na mkadamu wawo, pontho na anyakulondali a ku Nyumba ya Mulungu ale, adaphata Yesu mbammanga.

13Chakutoma adenda naye kuna Anasi, thangwi iye akhali tebzalache Kayafa, ule akhali Nyansembe Wamkulu chaka chenecho.

14Kayafayo ngule akhadapanga akadamu a Chiyuda kuti mphyadidi kuti munthu mbodzi afere anthu onsene.

15Simoni Peturo pabodzi pene na nyakufunza unango ule, adatewera Yesu. Nyakufunza unangoyo akhadziwika mwadidi mwene kuna Nyansembe Wamkulu, tenepo adapita na Yesu pabodzi m'thando ya nyumba ya Nyansembe Wamkulu,

16mwenemo Peturo adaimira panja pamsuwo. Tenepo nyakufunza unangoyo adabwerera panja mbalonga na mtsikana akhayang'anira pamsuwo pale, tenepo adapitisa Peturo m'thando mule.

17Mtsikana akhali pamsuwo ule adalonga kuna Peturo mbati, “Kadi iwe si iwe mbodzi wa anyakufunza a munthu weneyu tayu?” Peturo adatawira mbati, “Nkhabe si ine tayu.”

18Kunja kukhatonthola, tenepo anyabasa na anyakulondali a ku Nyumba ya Mulungu akhadaphatisa moto wamakala, mbaimira kuotha. Tenepo Peturo adaimirambo pabodzi na iwo mbaotha moto.

19Nyansembe Wamkulu adavunza Yesu pya anyakufunzache na pya chifunziso chache.

20Yesu adatawira mbati, “Ine ndikhalonga pakwecha kuna anthu onsene. Ndzidzi onsene ndikhafunzisa m'nyumba zakupemphereramo, pontho na m'Nyumba ya Mulungu, mukhagumanyikana Ayuda onsene pabodzi mule. Nee ndidalonga chinthu na chibodzi chene chibiso-biso tayu.

21Apo mwatani munandivunza? Vunzani anthu adandivawo. Ndimomwene kuti iwo akudziwa pinthu pidalonga ine kuna iwo.”

22Pidalonga Yesu penepi, mbodzi wa anyakulondali penepo adamgasa mbama mbalonga mbati, “Kadi iwe ungalonge tenepa kuna Nyansembe Wamkuluyu?”

23Yesu adatawira mbati, “Ngakhala ine ndalonga pyakuipa, pilongetu mphapo kuna anthu onsene ali panowa. Mbwenye ngakhala ndalonga pyakuonadi, apo wandimenyeranji?”

24Tenepo Anasi adamtumiza wakumangwa kuna Kayafa, Nyansembe Wamkulu.

25Peturo akhaimira basi penepo kuotha moto. Tenepo anango ale adalonga kuna iye mbati, “Ayi iwe si iwe mbodzi wa anyakufunza a munthu weneyu tayu?” Mbwenye Peturo adatuna mbati, “Nkhabe si ine tayu.”

26Mbodzi wa anyabasa a Nyansembe Wamkulu, mbaleache ule akhadagwandwa khutu na Peturo adalonga mbati, “Kadi sidakuone na iye m'munda mule tayu?”

27Peturo adatuna pontho mbati, “Nkhabe!” Penepo pene dzongwe adalira.

28Bzobzo na machibese akadamu a Chiyuda adakwata Yesu kubuluka naye kunyumba ya Kayafa mbaenda naye kunyumba ya mkulu wa boma. Iwo ene hadapite m'nyumba mule kuti akhonde swipa, thangwi akhateweza mtemo wawo wakupichenesa towera akwanise kudya nawo Phwando ya Paska.

29Natenepo Pilato adabuluka panja kuna iwo mbaavunza mbati, “Munthuyu adawanji kuti mumsumire kuna ine?”

30Iwo adatawira mbati, “Ife nee mbatidadza naye kuna imwe tayu, iye mbadakhonda khala na mseru.”

31Pilato adalonga kuna iwo mbati, “Apo mkwateni muende naye kamtonga kuteweza mwambo wanu.” Iwo adatawira mbati, “Ife nkhabe tawiriswa kupha munthu tayu.”

32Penepi pidachitika towera mafala adalonga Yesu akwane-kwane, mafala akulonga pya kufa kukhafuna iye dzachita.

33Pilato adabwerera m'nyumba mule mbachemeresa Yesu mbamvunza mbati, “Ayi iwe ndiwe Mfumu wa Ayuda?”

34Yesu adatawira mbati, “Kadi pinandivunza imwepi mukupinyerezera ndimwe, penu anthu anango akupangani pya ine?”

35Pilato adatawira mbati, “Kani ukunyerezera kuti ine ndine Myuda? Akupereka kuna ine ndi anthu a dzinzako na anyansembe akulu. Wasosanji?”

36Yesu adalonga mbati, “Ufumu wanga si wa padziko yapansi pano tayu. Ufumu wanga mbudakhala wa padziko yapansi pano, anyakunditewera mbadachita kale nkhondo kuti ndileke perekwa kuna akadamu a Chiyuda. Nkhabe! Ufumu wanga si wa padziko yapansi pano tayu!”

37Tenepo Pilato adamvunza mbati, “Apo ndiwe mfumu?” Yesu adatawira mbati, “Mwalonga ndimwe kuti ndine mfumu. Ndidabalwa mbandidza padziko yapansi pano kudzera penepi, kudzalonga pyakuonadi. Munthu wakuikhira kunduli pyakuonadi ambandivera.”

38Pilato adamvunza mbati, “Apo pyakuonadipyo ninji?” Tenepo Pilato adabuluka pontho panja mbalonga mbati, “Ine sidamgumane na mseru tayu.

39Mbwenye pana mtemo wakuti ine ndimbakusudzulirani nyaperezo mbodzi pandzidzi wa Phwando ya Paska. Ayi munafuna ndikusudzulireni Mfumu wa Ayudayi?”

40Iwo adatawira mwakugaluza fala mbati, “Tayu! Weneyu tayu! Tinafuna Baraba!” Barabayu akhali phanga.

← Chapter 17 Jump to: Chapter 19 →