Nehemiah 10

Sena Malawi

← Chapter 9 Jump to: Chapter 11 →

1Nyakutoma kuikha chidindo akhali mkulu wa boma Nehemia mwana Hakalia. Kubuluka penepo Zedekia nyansembe, pontho na anango ali m'tchindemu adaikhambo pidindo pyawo.

2Anyansembe: Seraia, Azaria, Yeremia, Pashuri, Amaria, Malikia, Hatushi, Shebania, Maluki, Harimu, Meremoti, Obadia, Daniele, Ginetoni, Baruki, Meshulamu, Abia, Miamini, Maazia, Biligai na Shemaia.

3Alevi: Yeshua mwana Azania, Binui wa m'mbumba ya Henadadi, Kadimiele, Shebania, Hodia, Kelita, Pelaia, Hanani, Mika, Rehobu, Hashabia, Zakuri, Sherebia, Shebania, Hodia, Bani na Beninu.

4Akadamu a anthu: Paroshi, Pahati-Moabu, Elamu, Zatu, Bani, Buni, Azigadi, Bebai, Adonia, Bigivai, Adini, Ateri, Hezekia, Azuri, Hodia, Hashumu, Bezai, Harifi, Anatoti, Nebai, Magipiasi, Meshulamu, Heziri, Meshezabele, Zadoki, Yadua, Pelatia, Hanani, Anaia, Hoshea, Hanania, Hashubu, Haloheshi, Piliha, Shobeki, Rehumu, Hashabina, Maaseia, Ahia, Hanani, Anani, Maluki, Harimu na Baana.

5“Ife anthu a Israele, anyansembe, Alevi, anyakulondali ku Nyumba ya Mulungu, anyakuimba nyimbo, anyabasa a m'Nyumba ya Mulungu na anthu anango onsene, ale thangwi ya kuvera mwambo wa Mulungu apipambula okha ene kuna alendo ambakhala pakati pathu ale, ife pabodzi pene na akazathu, pontho na anathu ene ale ngathunga kuvesa pinthu,

6tili pano kuphatizana na akadamu athu kudumbira kuti tinateweza pyonsene pinalonga mwambo wa MBUYA udatipasa Mulungu kudzera muna Mose nyabasache: kuti ife tinavera pyonsene pinatitonga MBUYA, Mbuyathu, pontho kuti ife tinakoya matongero ache na kuchita pyonsene pinafuna iye. Munthu onsene okhonda chita tenepo athema kutembererwa.

7“Ife nkhabe dzasemberana na alendo ambakhala pakati pathu ale tayu.

8“Ngakhala alendowo anadza na mapira penu chinthu chinango chene dzatigulusira pa Nsiku Yakupuma penu pansiku inango ene yakuchena ife nkhabe dzapigula tayu. “Chaka chachinomwe chonsene ife nkhabe dzalima mindathu tayu, pontho tinafudza mangawa onsene.

9“Chaka na chaka munthu onsene anasonkha siliva wakulemera magramu mashanu kuphedza basa ya pa Nyumba ya Mulungu.

10“Ife tinapereka pinthu ipi pachipembedzo cha ku Nyumba ya Mulungu: mikate yakupambulika, chakupereka cha nsiku na nsiku cha mapira, nyama kuti ziperekwe nsembe zakupyerera, pyakupereka pyakupambulika pya pa Nsiku Yakupuma, Phwando yakusekera Kubalwa kwa mwezi, maphwando anango akusankhulika, pyakupereka pinango pyakupambulika, pyakupereka kubulusa pyakudawa pya Israele, na pinthu pinango pyonsene pyakufunika kuphatiswa basa m'Nyumba ya Mulungu.

11“Ife anthu, anyansembe, na Alevi tinachita ntsango chaka na chaka kuona kuti njipi dzinza inafuna kupereka nkhuni zakupyerezera nsembe zakuperekwa kuna MBUYA Mulungu wathu malingana na pinthu pinafuna mwambo kuti ife tipichitepyo.

12“Ife tinaenda na pyakupereka chaka na chaka ku Nyumba ya Mulungu na mapira athu akutoma kutokota ambavuna ife pontho na nsapo zakutoma kufira m'miti yonsene.

13“Anathu achimuna autombo a munthu onsene wa ife tinaenda nawo kuna anyansembe ku Nyumba ya Mulungu. Tenepo kweneko tinaapambulira kuna Mulungu ninga munalongera mwambo. Tinapambula pontho anamphulu akutoma kubalwa, anabira akutoma kubalwa na anambuzi akutoma kubalwa kubulukira kuna pifuyo pyathu pyonsene.

14“Ife tinaenda kuna anyansembe chaka na chaka na mpambo wa mikate wakusasanywa na mapira akutoma kuvunwa na pyakupereka pyathu pinango pya vinyu, mafuta aolivi pontho na mtundu onsene wa nsapo. “Tinaendesa kuna Alevi, anthu ambasonkhesa chakhumi cha pinthu pya m'mazunde mwathu ale, chakhumi cha mbewu zimbamera m'minda mwathu zile.

15Anyansembe ale mphidzukulu pya Aroni athema kukhala pabodzi pene na Alevi ndzidzi unasonkheswa chakhumi, pontho Alevi athema kwenda na chakhumi chile ku Nyumba ya Mulungu kumasubi akukoyeramo pinthu kuti pikaphate basa mwenemo.

16Anthu a ku Israele na Alevi athema kudza na pyakupereka pyawo pya mapira, vinyu na mafuta aolivi ku masubi kule kumbakoyerwa pyombo pya m'Nyumba ya Mulungu, pontho kule kumbakhala anyansembe ali pa buswa ndzidzi wenewo, anyakulondali pamsuwo na anyakuimba nyimbo. “Ife nkhabe dzakhonda Nyumba ya Mulungu wathu tayu.”

← Chapter 9 Jump to: Chapter 11 →