Philippians 3

Sena Malawi

← Chapter 2 Jump to: Chapter 4 →

1Pakumalisira, abale anga, komerwani mukuphatanizana kwanu na Mbuya. Ine nkhabe nenseka na kukulemberani pontho mafala abodzi-bodziwo tayu, thangwi mphinthu pyakukutchinjirizani.

2Khalani m'maso na anambwa, anthu ambachita pinthu pyakuipa ale. Enewa ngale ambakhakhamiza kucheka manungo.

3Ife ndife anyakugwandwa nsonga yachimuna chadi-chadi, thangwi timbapembedza Mulungu kudzera muna Mzimu Wakuchena mbatikomerwa m'moyo mukuphatanizana na Khristu Yesu. Ife nkhabe nyindira pinthu pimbachita anthu pamanungo tayu,

4podi kwene kuti ine ndinakwanisadi kunyindira pinthu ninga penepi. Ngakhala munthu unango ananyerezera kuti anakwanisa kunyindira pimbachitwa pamanungo, inembo ndina mathangwi mazinji akuchitira chibodzi-bodzi kupiringana achewo.

5Ine ndidagwandwa nsonga yachimuna pidamala ine dimingu ibodzi yakubalwa. Ine ndine Muisraele pakubalwa, ndine wa dzinza ya Benjemani, pontho Mheberi chadi-chadi. Kulonga pya kuteweza mwambo, ine ndikhali Mfarisi,

6pontho ndikhali na chipapu chikulu pa chipembedzo changa mwakuti ndidaboneresa mpingo. Kulonga pya kulungamiswa kwa munthu pakuvera matongero a mwambo, ine ndidayeswa nyakusowa chakundipokanyisa tayu.

7Mbwenye pinthu pyonsene pikhayesa ine kuti mphyakuganyalisa pile, lero ndikupiyesa pyakukhonda ganyalisa thangwi ya kutumikira Khristu,

8pontho si pyokhapyo tayu, mbwenye ndimbayesa pinthu pyonsene ninga pyakukhonda ganyalisaletu thangwi ya chinthu chakufunika pikulu, chile ndi udziwisi wa Khristu Yesu Mbuyanga. Na thangwi ya kutumikira Khristu ndataya pinthu pyonsene. Ndapiyesa pinthu pyapezi mbandipitaya pakhuku, towera ndikhale wa Khristu,

9pontho ndikukhala wakuphatanizana na iye monsene mwene. Ine nkhabeve kupiyesa ndekha ene wakulungama pamaso pa Mulungu pakuvera mwambo tayu, mbwenye chinchino ndalungamiswa pamaso pa Mulungu kudzera muna chikhulupiro pana Khristu. Kulungamiswa kweneku kumbabulukira kuna Mulungu, pontho kwagona pachikhulupiro.

10Chinafuna ine nkhudziwa Khristu, pontho kuona mphamvu idamulamusa kuimfa ile. Ndinafuna pontho ndione nyatwa sasawa ninga mudaonera iye nyatwa mbandisanduka ninga iye na mafero adachita iye ene,

11na chidikhiro chakuti inembo ndinalamuswa kuimfa.

12Sinalonga kuti penepi ndapikwanisa kale, penu ndathema kale monsene mwene tayu. Mbwenye ine ndimbachita phinga kufuna kutambira mfupo, thangwi penepi ndiye pidandichitisira Khristu Yesu kuti ndikhale wache.

13Abale anga, sinapiyesa ndekha ene kuti penepi ndapikwanisa kale tayu. Mbwenye pana chinthu chibodzi basi chimbachita ine. Chinthu chache ntchakuti ndimbaduwalira pinthu pya m'nduli, mbandichita phinga kufuna kafikira pinthu pya kutsogolo.

14Ndikuthamangira kumadolomero a bitcha-bitcha, towera ndikatambire mfupo wa moyo okhonda mala, wandichemerera Mulungu kudzera muna Khristu Yesu ule.

15Tenepo ife tonsene ale ndife akukola m'moyo wauzimu, tikhale na manyerezero sasawa ninga enewa. Mbwenye ngakhala anango a imwe ana manyerezero akulekana na enewa, Mulungu anapichitisa kukhala pyakuveka kuna imwe.

16Podi na kutani kwene, tendeni tithimize kwenda m'tsogolo malingana na matongero ateweza ife kufikirana lerowa.

17Abale anga, imwe mwathema kuthimiza kunditsanzira. Tsanzirani ale ambateweza upangizi wakuthema udakuonesani ife ule.

18Ndakupangani kale penepi kazinji kene, tenepa chinchino ndikukupangani pontho na misozi: alipo anthu azinji ale makhaliro awo ambaachitisa kukhala anyamalwa a imfa ya Khristu pamtanda.

19Pakumalisira pache anaenda kugehena, thangwi mulungu wawo ndi pikhumbo pya manungo. Iwo ambanyadira pinthu pidathema iwo kuchita napyo manyadzo, pontho iwo ambanyerezera kwene pinthu pya padziko yapansi pano basi.

20Mbwenye ife ndife mzika za kudzulu, pontho ife maso ali kunjira kudikhira Nyankhombo wathu kudza kubulukira konthoko. Weneyu ndi Mbuya Yesu Khristu,

21ule anasandusa manungo athu, ambavunda ana ifewa, kukhala sasawa na manungo ache ademelero ale. Iye anachita penepi na mphamvu zontho zile zimbakwanisa na iye kuikha nazo pinthu pyonsene pansi pa utongi wache.

← Chapter 2 Jump to: Chapter 4 →