Proverbs 21

Sena Malawi

← Chapter 20 Jump to: Chapter 22 →

1Mtima wa mfumu uli m'manja mwa MBUYA; iye ambautsogolera ninga madzi akukuka konsene kwene kunafuna iye kule.

2Njira zonsene za munthu zimbaoneka ninga zakulungama m'maso mwache, mbwenye MBUYA ndiye ambadziwa mtimache.

3Kuchita pyakulungama pontho chilungamo pimbatambirwa na manja mawiri pamaso pa MBUYA kupiringana nsembe.

4Kuyang'ana na nsonga ya diso, pontho mtima wakugaya, mphyakuipa mbipikhala ninga nyale kuna anyakudawika.

5Pinthu pimbasasanya kuchita munthu wa manja a basa pimbamganyalira, mbwenye kuchita pinthu mwamchunju kumbadzesa utcherengi.

6Mfuma yakugumanwa thangwi ya kulonga pyakunama, ndi mthunji yakutoya m'maso, pontho msampha wakupha.

7Kuzunguzika kwa nyakudawika kunati kumvunge, thangwi iye nkhabe funa kuchita pyakulungama tayu.

8Njira za munthu wakuipa nsakugongonyeka, mbwenye makhaliro a nyakukhonda dawa ngakulungama.

9Mphyadidi kukhala mwakufinyizika kunkhomo kwa nsoyi kusiyana na kukhala m'nyumba na mkazi wamulomo.

10Nyakudawika ambakhala na usa na kuchita pyakuipa; iye nkhabe vera nsisi tsanthembache tayu.

11Nyakusingirira angatchunyuswa, pupwe ambadziwa mfolo; munthu wanzeru angapaswa uphungu, penepo ambakhala na udziwisi.

12Mulungu, Nyakulungama ule, ambadziwa pya m'nyumba ya anyakudawika, mbachitisa anyakudawika kuvungika.

13Ngakhala munthu anafunga makutu ache kuna kulira kwa anyakutcherenga, iyembo analira mbakhonda na kuviwa kwene.

14Mtukwa wakuperekwa chibiso-biso umbamatamisa kuzhangali, pontho kudyekera kumbambombowesa ukali.

15Chilungamo chingatewezwa anyakulungama ambakomerwa, mbwenye anyakudawika mantha ambaaphata.

16Nyakubauka panjira ya udziwisi, mamalisiro ache nkhugwera m'dziko ya anyakufa.

17Nyakukomerwa na tsenzo anati atcherenge; nyakukomerwa na vinyu pontho mafuta nkhabe dzafuma tayu.

18Anyakudawika anakhala chakupagalira anyakulungama, pontho anyakukhonda khulupirika anakhala chakupagalira anthu adidi.

19Mphyadidi kukhala pyako m'thando yatchetcha kusiyana na kukhala na mkazi wamulomo pontho wachipsu.

20M'nyumba ya munthu wanzeru mumbakhala mfuma, mbwenye pupwe ambachita phata dyeratu pyonsene pina iye.

21Nyakukakamira kuchita pyakulungama pontho kukoma mtima, ambagumana moyo, kufamba mwadidi kwa pinthu na chilemedzo.

22Nyanzeru anakwanisa kukunda mzinda wa anyamphamvu, mbagwisa mpanda wamphamvu umbanyindira iwo ule.

23Nyakuyang'anira mulomo pontho lulume yache, nkhabe kupidzesera yekha ene nyatwa tayu.

24Munthu wakugaya pontho kutumbama, nyakusingirira ndiye dzinache; thangwi iye ambachita pinthu mwakulunkuma.

25Usa wa nyakupolola unakhala imfa kuna iye, thangwi manjache nkhabe funa phata basa tayu.

26Nsiku yonsene iye ambakhala na usa kufuna pizinji, mbwenye anyakulungama ambapereka mwakufewa manja.

27Nsembe ya nyakuipa njakunyansa; ndi tani apo angaipereka na manyerezero akuipa.

28Mboni yakunama inagwandwa m'kanwa, mbwenye nyakuvesa pinthu anatawiriswa kupereka umboni.

29Nyakuipa ambafuna kupionesa ninga wakuwanga mtima, mbwenye nyakulungama ambanyerezera mwadidi pinthu pimbachita iye.

30Nee nzeru, kuvesa pinthu, penu uphungu, pile pinakwanisa kupiringana MBUYA.

31Kavalo ambasasanyikira nsiku ya kumenya nkhondo, mbwenye kukunda kwagona m'manja mwa MBUYA.

← Chapter 20 Jump to: Chapter 22 →