Psalms 119 — Sena Malawi

1Ngakutsanzaya ale makhaliro awo ngakusowa chinthu chakupokanyisa, pontho ambakhala mwakuteweza mwambo wa MBUYA.

2Ngakutsanzaya ale ambavera upangizi wache, ale ambamsaka na mtimawo onsene.

3Iwo nkhabe chita pyakudawika tayu; iwo ambafamba m'njira zache.

4Imwe mwatipasa pifunziso pyanu mbamutipanga kuti tipivere mwakukhulupirika.

5Ndina chidikhiro kuti ndinakhaladi wakukhulupirika pakukoya matongero anu!

6Ngakhala ndinafungula khutu kuna matongero anu, penepo nkhabe dzachitiswa manyadzo tayu.

7Ndzidzi unafunza ine matongero anu akulungama, ndinakukuzani na mtima wangwiro.

8Ndinavera mwambo wanu; lekani kundisiya ndekha!

9Mphale angakwanise tani kuchitisa moyo wache kukhala wangwiro? Mphakuvera mafalanu.

10Na mtimanga onsene ndimbayesa-yesa kukusaka-sakani; ndichitiseni kuti ndileke bauka kubuluka kuna matongero anu.

11Ndimbakoya mafalanu mumtima mwanga, towera ndileke kukudawirani.

12Ndikukukuzani, MBUYA; ndifunziseni mwambo wanu.

13Ndinakhuwa mwakubwereza-bwereza matongero anu onsene apereka imwe.

14Ndimbakomerwa na kuteweza upangizi wanu pyakwanga kusiyana na kukhala na mfuma ikulu.

15Ndimbanyerezera pikulu mumtima mwanga pifunziso pyanu; mbandionesesa mwadidi njira zanu.

16Ndimbakomerwa na mwambo wanu; mafalanu ine nkhabe dzaaduwalira tayu.

17Khalani wadidi kuna ine, nyabasanu, towera ndikhale na moyo mbandivera mafalanu.

18Fungulani maso anga, towera ndione pinthu pyakudodomesa pyakugumanwa m'mwambo wanu.

19Ine ndine mlendo wakugwanda kwene pyanga; lekani kundibisira matongero anu.

20Mtimanga umbapha na chitchuwo; ndinafuna ndidziwe ndzidzi onsene matongero anu.

21Imwe mumbasumulula anyakutumbama; ale ngadzedze pontho abauka kubuluka kuna matongero anu.

22Achitiseni kuti aleke kundishola pontho kunditikana, thangwi ine ndakoya upangizi wanu.

23Podi kwene atongi ambagumanyikana mbaverana pyakupha ine pano, ndinanyerezera pikulu mumtima mwanga mwambo wanu.

24Mwambo wanu nkhukomerwa kwanga; iwo ndi nyakundipangiza pyakuchita.

25Ndikugona wakukundwa pansi pa fumbi; sisimusani moyo wanga malingana na mafalanu.

26Ndidatawira na mulomo wanga pyonsene pyachita ine, tenepo imwe mudanditawira; ndifunziseni mwambo wanu.

27Ndiphedzenimbo kuvesa mwadidi pifunziso pyanu, tenepo ndinanyerezera pikulu mumtima mwanga pyakudodomesa pyachita imwe.

28Moyo wanga wakundwa na kutsukwala; ndiwangiseni mphamvu, ninga mudadumbira imwe kuna ine.

29Ndikhondeseni kwenda m'njira zakunama, pontho na udidi wanu ndifunziseni mwambo wanu.

30Kukhala wakuvera ndiye chasankhula ine; ine ndaikha mtimanga pana matongero anu.

31Ine ndili nganganga pa upangizi wanu, MBUYA; lekani tawirisa kuti ndichitise manyadzo.

32Ine ndinachita phinga kuvera matongero anu, thangwi imwe munandipasa kuavesa kukulu.

33Ndifunziseni, MBUYA, kuteweza mwambo wanu, tenepo ndinaavera ndzidzi onsene.

34Ndichitiseni kuvesa mwambo wanu, tenepo ndinauvera; ndinaukoya na mtimanga onsene.

35Ndichitiseni kukhala wakuvera matongero anu, thangwi ndimbagumanamo kukomerwa.

36Ndipaseni chikhumbo chakuvera upangizi wanu kusiyana na kukhala nyamfuma.

37Phophani maso anga kuna pinthu pyakusowa basa; koyani moyo wanga malingana na kudumbira kudachita imwe.

38Chitani pidadumbira imwe kuna ine, nyabasanu, pidadumbira imwe kuna anyakukugopani.

39Ndipulumuseni kuna kutikanwa kumbagopa ineku; thangwi matongero anu ngadidi pyakwanga!

40Ndina chitchuwo na pifunziso pyanu; ndipaseni moyo wachinchino, podi imwe ndimwe wakulungama.

41Ndioneseni kundifuna kokhonda mala kwachita imwe, MBUYA, pontho mundipulumuse malingana na kudumbira kwachita imwe kuna ine.

42Tenepo anyakunditikana ndinakwanisa kuatawira thangwi ndimbanyindira mafalanu.

43Ndichitiseni kuti ndilonge pyakuonadi ndzidzi onsene, thangwi chidikhiro changa chili pana matongero anu.

44Ndzidzi onsene ndinavera mwambo wanu, pontho kwenda na kwenda.

45Ndinafamba-famba pyanga mwakutakasuka, thangwi ndimbayesa kuvera pifunziso pyanu.

46Ndinalalika upangizi wanu kuna mafumu, pontho ine nkhabe dzachita manyadzo tayu.

47M'matongero mwanu ndimbagumanamo kukomerwa, thangwi ndimbaafuna.

48Ndimbalemedza pontho kuafuna matongero anu; ndinanyerezera pikulu mumtima mwanga mwambo wanu.

49Kumbukani kudumbira kudachita imwe kuna ine, nyabasanu; ipyo pyandipasa chidikhiro.

50Podi pa nyatwa zanga zene ine ndidathondozwa, thangwi kudumbira kudachita imwe kuna ine kwandipasa moyo.

51Anyakutumbama ndzidzi onsene ambandishola, mbwenye ine handidabauka kubuluka kuna mwambo wanu tayu.

52Ndimbakumbuka mwambo wanu wakale, tenepo ambandipasa chithondozo, MBUYA.

53Ndingaona anyakudawa akukhonda mwambo wanu, ine ndimbaswirizwa napyo.

54Pandzidzi ukhali ine mlendo wakugwanda kwene padziko yapansi pano, ndimbapeka nyimbo za mwambo wanu.

55Na mosiku ndimbakukumbukani, MBUYA, mbandinyerezera pya mwambo wanu.

56Ndimbagumana kukomerwa kwanga pakuvera pifunziso pyanu.

57Ambafuna ine ndimwe ene basi, MBUYA; ndinadumbira kuti ndinavera mafalanu.

58Ndikukupemphani na mtimanga onsene kuti mundikomerembo mtima ninga kudumbira kudachita imwe kuna ine.

59Ndanyerezera pya makhaliro anga, tenepo ndimbadumbira kuteweza upangizi wanu.

60Mwakukhonda nthontho ndimbachimbiza kuvera matongero anu.

61Podi kwene kuti anyakudawa anditeyera msampha, mbwenye ine nkhabe duwalira mwambo wanu tayu.

62Pachiti-chiti na mosiku ndimbalamuka kukukuzani, thangwi matongero wanu ngwakulungama.

63Ndimwe shamwali wa anyakukugopani onsene, wa onsene anyakuvera pifunziso pyanu ale.

64MBUYA, dziko yapansi yadzala na kutifuna kwanu kokhonda mala; ndifunziseni mwambo wanu.

65Imwe, MBUYA, ndimwe wadidi kuna ine, nyabasanu, malingana na pidadumbira imwe kuna ine.

66Ndipaseni nzeru na udziwisi, thangwi ndimbanyindira matongero anu.

67Mbamudzati kunditchunyusa, ine ndikhachita pyakudawa, mbwenye chinchino ndikuvera mafalanu.

68Imwe ndimwe wadidi, pontho wakukoma mtima pyakwanga! Ndifunziseni mwambo wanu.

69Anyakudungudza alonga pyakunama pya ine, mbwenye ine na mtimanga onsene ndimbavera pifunziso pyanu.

70Amuna enewa ngakufa msolo pontho akukala mtima, mbwenye ine ndimbakomerwa na mwambo wanu.

71Kunditchunyusa kwanu kukhali kwadidi kuna ine, thangwi kudandichitisa kuti ndifunze mwambo wanu.

72Mwambo udandipasa imwe ule ngwakufunika pikulu kuna ine kupiringana kobiri zonsene za padziko yapansi.

73Na manjanu imwe mudandilenga na kundiumba; ndipaseni nzeru zakuvesa pinthu, towera ndifunze matongero anu.

74Anyakukugopani anakomerwa angandiona, thangwi ndimbanyindira kudumbira kudachita imwe kule.

75Ndikupidziwa kuti mwambo wanu ngwakulungama, MBUYA, pontho kuti mudanditchunyusa thangwi ndimwe wakukhulupirika.

76Kundifuna kwanu kokhonda mala kundithondoze, ninga kudumbira kudachita imwe kuna ine, nyabasanu.

77Ndiverenimbo nsisi, tenepo ndinakhala na moyo thangwi ndimbakomerwa na mwambo wanu.

78Anyakutumbama mbachite manyadzo thangwi ya kundipambizira kwawo; inembo ndinanyerezera pikulu mumtima mwanga pifunziso pyanu.

79Anyakukugopani mbadze kuna ine, onsene ambadziwa upangizi wanu ale.

80Mtimanga mbukhale wakusowa chakupokonyisa pa mwambo wanu mbandichitiswe kuti ndileke chita manyadzo.

81Ndamaliratu na chitchuwo, MBUYA, kukudikhirani kuti mundipulumuse; chidikhiro changa ndinachiikha pana mafalanu.

82Maso anga atopa na kudikhira pidadumbira imwe kuna ine pile, uku mbandili kuvunza kuti, “Munandiphedza lini kani?”

83Podi kwene ndine wakusowa basa ninga budu ya vinyu yakutayiwa pakhuku; kwache sidaduwalire tayu mwambo wanu.

84Ndidikhire kufikirana lini? Munatchunyusa lini anyakundiboneresawa?

85Amuna akutumbama, okhonda vera mwambo wanu, akumba milindi kuti ndigweramo.

86Matongero anu ene basi ndiye akunyindirika; anthu akundiboneresa na pyakunama; ndiphedzenimbo ine!

87Iwo asala chifupi kundipha, mbwenye ine handidakhonde kuteweza pifunziso pyanu tayu.

88Na thangwi ya kundifuna kwanu kokhonda mala khalani wadidi kuna ine, towera ndivere upangizi wanu.

89Mafalanu, MBUYA, anakhala akwenda na kwenda; ngakukhazikika kudzulu.

90Kukhulupirika kwanu kumbapirira mifendu yonsene, imwe mwathikitiza dziko yapansi pambuto pache, tenepo iyo yakhazikika.

91Mwambo wanu ngwakukhazikika na lero, thangwi pyonsenepyo pimbakutumikirani.

92Mwambo wanu mbadakhonda khala phata ya kukomerwa kwanga, ine mbandidafa na kusanyika.

93Ine nkhabe dzaduwalira pifunziso pyanu tayu, thangwi na ipyo imwe mwandichitisa kuti ndikhale na moyo.

94Ine ndine wanu, ndipulumuseni! Ine ndachita phinga kuvera pifunziso pyanu.

95Amuna akudawa akudikhira kundivunga, kwache ine ndinanyerezera pikulu mumtima mwanga upangizi wanu.

96Ine ndaona kuti pinthu pyonsene, podi na pyangwiro pene, pina mamalisiro ache, mbwenye matongero anu ngokhonda mala.

97Ndimbaufuna pikulu mwambo wanu! Ndimbaunyerezera pikulu mumtima mwanga nsiku zonsene.

98Matongero anu ndimbakhala nawo ndzidzi onsene mbandichitisa kukhala wanzeru kupiringana anyamalwanga.

99Ndimbaavesa pikulu pene kupiringana afunzisi anga onsene, thangwi ndimbanyerezera pikulu mumtima mwanga upangizi wanu.

100Ndina nzeru pyakwanga kupiringana nkhalamba, thangwi ndimbavera pifunziso pyanu.

101Ine ndathunda makhaliro onsene akuipa, thangwi ndikufuna kuvera mafalanu.

102Ine sidakhonde matongero anu tayu, thangwi imwe ene basi ndimwe mfunzisi wanga.

103Mphyakukoma pyakwanga kulawa mafalanu; kutapira kupiringana uchi!

104Ine ndimbaganyali nzeru kubulukira m'pifunziso pyanu, tenepo ndimbazondana na makhaliro onsene akuipa.

105Mafalanu ndi nyale ya kumanyalo kwanga, pontho ndi cheza chakundimwinikira panjira panga.

106Ine ndadumbira mbanditsikimiza kuvera matongero wanu wakulungama.

107Nyatwa zanga, MBUYA, nsakugoswadi; ndichitiseni kukhala na moyo ninga kudumbira kudachita imwe kule.

108Ivani kupemphera kwanga kwakupereka nako takhuta, MBUYA, pontho ndifunziseni matongero anu.

109Ine ndasasanyika ndzidzi onsene kutaya moyo wanga; ine sidaduwalire mwambo wanu tayu.

110Amuna akuipa anditeyera msampha, kwache sidabauke kubuluka kuna pifunziso pyanu tayu.

111Upangizi wanu ndi mfuma yakwenda na kwenda; nkhukomerwa kwa mtimanga.

112Ndapinyerezera kuvera mwambo wanu mpakana nsiku yakufa kwanga.

113Ndimbazondana na anyakukhonda khulupirika monsene mwene kuna imwe, kwache ndimbafuna mwambo wanu.

114Imwe ndimwe pakubisala panga pontho nyakunditchinjirizanga; ndimbaikha chidikhiro changa pana kudumbira kudachita imwe.

115Bulukani pana ine, anthu akudawamwe. Ndinavera matongero a Mulungu wanga.

116Ndipaseni mphamvu ninga mudadumbira imwe, tenepo ndinakhala na moyo; lekani kundichitisa manyadzo pandzidzi una ine na chidikhiro!

117Ndiphateni, tenepo ndinapulumuka, pontho ndzidzi onsene ndinavera mwambo wanu.

118Imwe mumbapasa nkhodolo munthu onsene okhonda vera mwambo wanu; umpheswe wawo ngwapezi.

119Imwe mudayesa anyakudawa onsene ninga shuzhu ya dziko yapansi, natenepo ine ndinafuna upangizi wanu.

120Na thangwi ya imwe ine ndina mantha; ndaphatwa na mantha thangwi ya mwambo wanu.

121Ine ndaphata pinthu pyakulungama pontho pyakuthema; lekani kundipereka m'manja mwa anyakundipondereza!

122Dumbirani kuti nyabasanu, munamphedza; lekani tawirisa kuti anthu akutumbama andipondereze!

123Maso anga atopa na kudikhira kuti mundipulumuse, pontho kuti pidadumbira imwe pile pikwane-kwane.

124Chitani na ine malingana na kundifuna kwanu kokhonda mala, pontho ndifunziseni mwambo wanu.

125Ndine nyabasanu, ndipaseni nzeru zakuvesa pinthu, towera ndidziwe upangizi wanu.

126MBUYA, ndzidzi wanu nguno wakuti muchitepo pinthu, thangwi anthu akuswa mwambo wanu.

127Ine ndimbafuna matongero anu kupiringana golidi, kupiringana golidi chadi-chadi ule.

128Natenepo ndikuteweza pifunziso pyanu; mbandizondana na njira zonsene zakudawika.

129Upangizi wanu mphyakudodomesa; ndimbapivera na mtimanga onsene.

130Kutchululwa kwa mafalanu ambapasa cheza mbadzesa nzeru kuna anthu okhonda dziwa.

131Ndimbafungula mulomo wanga mbandipuma na befu kukhumba matongero anu.

132Zungunukani kuna ine mbamundivere nsisi ninga mumbachitira imwe kuna onsene ambakufunani ale.

133Chitisani manyalo anga kuimira dzololo malingana na kudumbira kwanu; lekani tawirisa kuti pyakuipa pindikunde.

134Ndipulumuseni kuna ambandipondereza ale, towera ndivere pifunziso pyanu.

135Nditsanzayiseni pamaso panu mbamundifunzise mwambo wanu.

136Misozi ikugwa ninga mkulo, thangwi anthu nkhabe vera mwambo wanu tayu.

137Ndimwe wakulungama, MBUYA, na mwambo wanu ene ngwakulungama.

138Upangizi wapereka imwe ngwakulungama kuna onsene, pontho wakunyindirika monsene mwene.

139Phinganga ikugaka muna ine ninga moto, thangwi anyamalwanga nkhabe ikha konta mafalanu tayu.

140Kudumbira kudachita imwe nkhwakukhazikika! Ndimbapifuna pyakwanga pene!

141Ndine nyakukhonda funika pontho wakukhondwa, kwache ine nkhabe duwalira pifunziso pyanu tayu.

142Kulungama kwanu kunakhala na kukhala, pontho mwambo wanu ndzidzi onsene ngwakuona.

143Ndaphatwa na nyatwa pontho ndaswipa mtima, mbwenye matongero anu ambadzesa kukomerwa kuna ine.

144Upangizi wanu ndzidzi onsene ngwakulungama; ndipaseni nzeru zakuvesa nazo pinthu, tenepo ndinakhala na moyo.

145Na mtimanga onsene ndikuchemera kuna imwe; nditawireni, MBUYA, tenepo ndinavera mwambo wanu.

146Ndikuchemera kuna imwe; ndipulumuseni, tenepo ndinakoya upangizi wanu.

147Dzuwa mbidzati buluka ndimbachemera kuna imwe kuti mundiphedze; ndimbaikha chidikhiro changa pana kudumbira kwanu.

148Mosiku onsene ndimbakhala m'maso, kunyerezera pikulu mumtima mwanga kudumbira kwanu.

149Na thangwi ya kundifuna kwanu kokhonda mala, ndivesereni, MBUYA; onesani nsisi zanu mbamukoya moyo wanga!

150Anyakundiboneresa akukala mtima akudza chifupi, anthu okhonda na kukoya kwene mwambo wanu.

151Mbwenye imwe muli chifupi na ine, MBUYA, pontho matongero anu onsene ngakukhazikika.

152Kale-kale ndidafunza upangizi wanu; imwe mwauchitisa kuti ukhale wakwenda na kwenda.

153Yang'anani nyatwa zanga mbamundipulumuse, thangwi ine sidaduwalire mwambo wanu tayu.

154Ndikhalireni kunduli pontho mundiombole; ndipaseni moyo ninga mudadumbira imwe kuna ine.

155Anyakudawa nkhabe dzapulumuswa tayu, podi iwo nkhabe vera mwambo wanu tayu.

156Mbwenye kuva kwanu nyambalo, MBUYA, nkhukulu; onesani nsisi zanu mbamundipulumuse!

157Ndina anyamalwa na anyakundipondereza azinji, kwache ine nkhabe chimwana kuvera upangizi wanu tayu.

158Ndingayang'ana anyakundisandukirawa ndimbanyansirwa napyo, thangwi iwo nkhabe koya matongero anu tayu.

159Yang'anani mumbafunira ine pifunziso pyanu, MBUYA. Kundifuna kwanu kokhonda mala nkhabe sanduka tayu, natenepo ndipulumusenimbo ine.

160Mafalanu onsene ngakuona, pontho matongero anu akulungama ngokhonda mala.

161Amuna amphamvu andisosa akusowa na thangwi ene, mbwenye ine ndimbalemedza mafalanu.

162Ndakomerwa pyakwanga thangwi ya kudumbira kudachita imwe, kukomerwa ninga kwa munthu angagumana mfuma.

163Ndimbazonda na kunyansirwa na pyakunama, mbwenye ndimbafuna mwambo wanu.

164Kanomwe pansiku ndimbakukuzani, thangwi ya matongero wanu wakulungama.

165Ale ambafuna mwambo wanu ana mtendere pikulu, pontho nkhabe chinango chinakwanisa kuagwegwedusa tayu.

166Ndimbadikhira imwe kuti mundipulumuse, MBUYA, pontho ndimbachita pimbanditonga imwe.

167Ndimbavera upangizi wanu; thangwi ndimbapifuna na mtimanga onsene.

168Ndimbavera pifunziso pyanu na upangizi wanu; imwe mumbaona pyonsene pimbachita ine.

169Chiliro changa kufuna chiphedzo mbachifike kuna imwe, MBUYA! Ndipaseni nzeru zakuvesa pinthu malingana na kudumbira kudachita imwe.

170Ivani kupemphera kwanga mbamundipulumuse malingana na kudumbira kudachita imwe.

171Ndzidzi onsene ndinakukuzani, thangwi mumbandifunzisa mwambo wanu.

172Lulume yanga inaimba pya mafalanu, thangwi matongero anu ngakulungama

173Sasanyikani ndzidzi onsene kundiphedza, thangwi ndimbateweza pifunziso pyanu.

174Ndatchuwadi kwene kundipulumusa kwanu, MBUYA! M'mwambo mwanu ndimbagumanamodi kukomerwa!

175Ndipaseni moyo, towera ndikukuzeni; matongero anu andiphedze.

176Ndimbatsalakatika ninga bira wakutayika; tenepo idzani mundisake ine nyabasanu, thangwi ine sidaduwalire matongero anu tayu.