Romans 8

Sena Malawi

← Chapter 7 Jump to: Chapter 9 →

1Natenepo anthu aphatanizana na Khristu Yesu ale chinchino nkhabeve konwa tayu.

2Thangwi mwambo wa Mzimu Wakuchena ule umbatidzesera moyo mukuphatanizana kwathu na Khristu Yesu, wandisudzula pamwambo wa pyakudawa na imfa.

3Pinthu pidachimwana mwambo wa Mose kupichita, thangwi makhaliro akudawika a anthu akubalwa nawo akhasowa mphamvu, penepi Mulungu adapichita. Iye adachitisa kuti kudawa kukonwe muna makhaliro akudawika a anthu akubalwa nawo pakutumiza Mwanache. Iye adadza na umunthu sasawa ninga wa munthu ule makhaliro ache akubalwa nawo ngakudawika, towera akunde pyakudawa.

4Mulungu adachita tenepo kuti pyakulungama pimbafuna mwambo pichitwe na ife monsene mwene, ife ale timbateweza pimbafuna Mzimu Wakuchena, nee pimbafuna makhaliro athu akudawika akubalwa nawo tayu.

5Anthu ale ambateweza pimbalonga makhaliro awo akudawika akubalwa nawo, nzeru zawo zonsene zimbatongwa na pimbafuna makhaliro awo akudawika akubalwa nawo. Alembo ambachita pimbalonga Mzimu Wakuchena, nzeru zawo zonsene zimbatongwa na Mzimu Wakuchena.

6Munthu angatongwa na makhaliro ache akudawika akubalwa nawo mamalisiro ache ndi imfa basi. Mbwenye munthu angatongwa na Mzimu Wakuchena mamalisiro ache ndi moyo na mtendere.

7Tenepo munthu ambasanduka nyamalwa wa Mulungu ngakhala ambatongwa na makhaliro ache akudawika akubalwa nawo; thangwi iye nkhabe vera mwambo wa Mulungu tayu, ndimomwene kuti iye nkhabe kwanisa kuvera mwambowo tayu.

8Ale ambavera makhaliro awo akudawika akubalwa nawo nkhabe kwanisa kuchitisa Mulungu kukomerwa tayu.

9Imwe nkhabe teweza pimbakupangani makhaliro anu akudawika akubalwa nawo tayu, mbwenye mumbateweza pimbakupangani Mzimu Wakuchena ngakhaladi Mzimu wa Mulungu ambakhala muna imwe. Munthu anakhonda khala na Mzimu wa Khristu, iye si wa Khristu tayu.

10Mbwenye Khristu angakhala muna imwe, ndiye kuti mzimu wanu una moyo, thangwi Mulungu akuchitisani kukhala anthu akulungama pamaso pache, podi kwene kuti manungo anu anafa thangwi ya kudawa.

11Ngakhala Mzimu wa Mulungu adalamusa Yesu kuimfa ule ambakhala muna imwe, penepo ule adalamusa Khristu kuimfa anaperekambo moyo kuna manungo anu ambafa ale kudzera muna Mzimu wache ambakhala muna imwe ule.

12Tenepo, abale anga, ife tathema kuteweza pinthu pimbatipanga Mzimu wa Mulungu nee kuteweza pinthu pimbafuna makhaliro athu akudawika akubalwa nawo ale tayu.

13Ngakhala munateweza pinthu pimbafuna makhaliro anu akudawika akubalwa nawo ale, munati mufe. Mbwenye ngakhala Mzimu Wakuchena ambakuphedzani kupha mabasanu akudawikawo, munati mukhale na moyo.

14Ana a Mulungu ngale ambatsogolerwa na Mzimu wa Mulungu.

15Thangwi Mzimu akupasani Mulungu ule, si wakuti akusanduseni mabitchu, penu kukugoswani tayu, mbwenye ambakuchitisani kukhala ana a Mulungu, tenepo na mphamvu za Mzimuyo ife timbalira kuna Mulungu kuti, “Baba, Baba!”

16Mzimu wa Mulungu ambachitira umboni pabodzi na mzimu wathu kuti ndife ana a Mulungu.

17Podi ndife anache, tinati titambire mtsanzayiso umbakoyera iye anthu ache ule, pontho tinatambira pabodzi na Khristu pinthu pyamkoyera Mulungu pile. Ngakhala ife tinaona nyatwa sasawa ninga zidaona Khristu zile, tinati titambirembo demelero yache.

18Ndikunyerezera kuti nyatwa zinaona ife chinchinozi nkhabe kwanisa khala sasawa na pang'ono pene tayu na demelero inafuna dzaoneswa kuna ife ile.

19Pyakulengwa pyonsene pili maso kunjira kudikhira kuti Mulungu aonese anache.

20Mulungu adapinyerezera kuti pyakulengwa pyonsene pidathema kusanduka pyakusowa basa, nee kuti ipyo pidafuna kuti pikhale tenepo tayu, mbwenye Mulungu ndiye adapifuna, kwache pakhali chidikhiro,

21chakuti nsiku ibodzi pyakulengwa pinasudzulwa pa ubitchu wakupichitisa kuti pivunde, pontho pinatambira utumbe wademelero ya ana a Mulungu.

22Thangwi timbapidziwa kuti na ndzidzi uno ene pyakulengwa pyonsene pimbabulira thangwi ya kuva kupha ninga kuva kupha kwa mkazi wamimba pakubala.

23Kwache pimbabulira si pyakulengwa pyokha tayu, ife ale tina Mzimu Wakuchena, ule ndi mtukwa wakutoma wa Mulungu kuna ife, timbabulirambo basi chibwalo-bwalo, ndzidzi unadikhira ife kuti Mulungu atisanduse kukhala anache, pontho kuombola manungo athu onsene.

24Ife tidapulumuswa thangwi ya chidikhiro chathu chenechi, mbwenye ngakhala tinaona na maso pinthu pinadikhira ife, penepo chenechi si chidikhiro chadi-chadi tayu. Mbani munthu ambadikhira kuona chinthu chaona iye kale?

25Mbwenye tingadikhira chinthu chinakhonda ife onacho, timbadikhira mwakupirira.

26Montho-monthomo Mzimu Wakuchena ambadza dzatiphedza, anthu akusowa mphamvufe. Thangwi ife nkhabe kudziwa tayu mudathemera ife kupemphera, Mzimu Wakuchena ambatidembeterera kuna Mulungu mwakubulira, kule mafala nkhabe kwanisa kulonga kwache tayu.

27Tenepo Mulungu ule ambaona pya mumtima mwathu, ambadziwa pyakunyerezera pya Mzimu Wakuchena, thangwi Mzimuyo ambadembetera kuna Mulungu m'mbuto mwa anthu ache malingana na kufuna kwa Mulungu.

28Timbapidziwa kuti papinthu pyonsene pimbachita Mulungu ambapichita kuganyalisa napyo anthu ambamfuna ale, anthu achemera iye malingana na basa inafuna iye kuphata.

29Ale Mulungu akhadaadziwiratu, iye adaapambula kukhala ninga Mwanache, towera Mwanache akhale wautombo pakati pa abale azinji.

30Ale adapambulwa na Mulungu, adaachemera; pontho adachemera iye ale, adaalungamisa pamaso pache mbaapasambo demelero yache.

31Papyonsenepi tinalonga tani? Ngakhala Mulungu ambatiphedza, apo mbani pontho anakwanisa kutikunda?

32Nee Mulungu, thangwi iye hadatimane Mwanache tayu, mbwenye adampereka thangwi ya ife pano tonsene. Mulungu adatipasa Mwanache, apo iye nkhabe kwanisa tayu kutipasa pezi pinthu pyonsene?

33Mbani anafuna dzapokanya anthu akusankhulika a Mulungu? Mulungu makayo ndiye ambalonga kuti iwo ngokhonda dawa.

34Apo mbani anafuna dzalonga kuti iwo akonwa? Nee Khristu Yesu adafa ule tayu, maka-maka adalamuswa kuimfa mbakhala na moyo, pontho ali kumadyo kwa Mulungu. Iye akudembetera kuna Mulungu m'mbuto mwathu.

35Mbani pontho anakwanisa kutilekanisa na kutifuna kwa Khristu? Nyatwa penu, kuva kupha penu, kusanyika penu, njala penu, kutcherenga penu, pyakugoswa na imfa penu?

36Ninga munalongera Malemba kuti, “Ndzidzi onsene tikuona nyatwa za imfa thangwi ya imwepo, tikukwatwa ninga mabira akwenda kachekwa.”

37Nkhabe, kwache papinthu pyonsene pinaona ifepi tinakunda monsene mwene kudzera muna adatifuna ule.

38Ndikupidziwa mwadidi mwene kuti nkhabeve chinthu chinango chinakwanisa kutilekanisa na kutifuna kwache, nee imfa penu moyo, nee angelo penu atongi na anyamphamvu akudzulu, nee pinthu pili leropi penu pyam'tsogolo,

39nee dziko yakudzulu penu dziko yapansi; nkhabeve papinthu pyakulengwa pyonsene chingakwanise kutilekanisa na kutifuna kwa Mulungu tayu, kule nkhwathu kudzera muna Yesu Khristu Mbuyathu.

← Chapter 7 Jump to: Chapter 9 →