1 Timothy 2

Shan NCL

← Chapter 1 Jump to: Chapter 3 →

1ပိူဝ်ႈၼႆလႄႈဢွၼ်တၢင်းသေပိူၼ်ႈ၊ၵဝ်တိုၵ်းယူင်းႁႂ်ႈမႂ်းသူးတွင်းလဝ်ႈယွၼ်းယူႇ၊ႁဵတ်းပထၼႃႇယူႇ၊ယွင်ႈယေႃးတၢင်ႇၵျေးၸူးၸဝ်ႈၽြႃးပုၼ်ႈၵူၼ်းတင်းလၢႆ၊-

2ၸႃႉၸဵမ်ၶုၼ်ႁေႃၶမ်း၊ဢိၵ်ႇတင်းၶုၼ်ဢၼ်မီးဢႃႇၼႃႇ၊ၵႃႈမီးတင်းသဵင်ႈတင်းလူင်၊ၼင်ႇႁိုဝ်ႁဝ်းတၵ်းလႆႈယူႇၵတ်းယဵၼ်ၼိမ်လီလႄႈၼပ်ႉယမ်ၽြႃးတြႃး၊ဢိၵ်ႇတင်းလႆႈၵမ်ၵျၢင်ႉၼႂ်းတၢင်းဢၼ်မီးသရေႇၵူႈသမ်ႇၵူႈပိူင်ၼၼ်ႉဢေႃႈ။-

3တၢင်းၵမ်ၵျၢင်ႉၸိူဝ်ႉၼင်ႇၼႆၼၼ်ႉ၊ပဵၼ်ဢၼ်လီဢၼ်ထုၵ်ႇၵႃႈတီႈသိုဝ်ႈၼႃႈတႂ်ႈတႃၽြႃးပဵၼ်ၸဝ်ႈ၊ၸဝ်ႈဢၼ်ၵႄႇၶျွတ်ႈဢဝ်ႁဝ်း၊-

4ၸဝ်ႈဢၼ်မီးဢလူဝ်ႇၶႂ်ႈႁႂ်ႈၵူၼ်းတင်းသဵင်ႈတင်းလူင်ႁွတ်ႈထိုင်တၢင်းဢၼ်ၵႄႇၶျွတ်ႈဢဝ်လႄႈႁုၸႅင်ႈတြႃးဢၼ်မၢၼ်ႇမႅၼ်ႈၼၼ်ႉဢေႃႈ။-

5ၽြႃးပဵၼ်ၸဝ်ႈမီးသူႇလဵဝ်ၵူၺ်းဢေႃႈ။ ၼႂ်းၵႄႈဝူင်ႈၵၢင်ၽြႃးပဵၼ်ၸဝ်ႈတင်းၵူၼ်းႁဝ်းၼႆႉ၊မီးၸဝ်ႈဝူင်ႈၵၢင်ပႃးလဵဝ်ၵူၺ်းဢၼ်ဝႃႈ၊ ၸဝ်ႈယေႇသုၶရိၸ်ႈ၊ ဢၼ်ပဵၼ်ၸႃႇတိၵူၼ်းၼၼ်ႉဢေႃႈ။-

6မၼ်းၸဝ်ႈၼၼ်ႉၶၢမ်ႇၸုၼ်ႉပႅတ်ႈဢသၢၵ်ႈတူဝ်ၸဝ်ႈၵဝ်ႇႁႂ်ႈလႆႈထုတ်ႇဢဝ်မဵဝ်းၵူၼ်းတင်းသဵင်ႈတင်းလူင်ဢေႃႈ။ လွင်ႈတၢင်းၼႆႉပဵၼ်သၢၵ်ႈသေႇဢၼ်ထၢင်ႇသႃးမႃးၼႂ်းၶိင်ႇဢၼ်သၢင်ႇထုၵ်ႇၼၼ်ႉဢေႃႈ။-

7ၵွပ်ႈပိူဝ်ႈၼႆလႄႈၵဝ်လႆႈၶၢမ်ႇတၢင်းဢၼ်ၸဝ်ႈၽြႃးၶၢၼ်းဝႆႉႁႂ်ႈပဵၼ်တမၢၼ်ႇၸဝ်ႈ၊ၼႂ်းဢရႃႇသြႃႇႁေႃးတြႃး၊ႁႂ်ႈလႆႈသင်ႇသွၼ်ပၼ်လွင်ႈတၢင်းယုမ်ႇမၢတ်ႈ၊တင်းတြႃးဢၼ်မၢၼ်ႇမႅၼ်ႈတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။ ၵဝ်ဢမ်ႇပႅတ်ႉလႅၼ်။ ၵဝ်ဝႃႈၵႂၢမ်းဢၼ်မၢၼ်ႇဢေႃႈ။

8ၼႂ်းၸိူဝ်းၸဝ်ႈၵူႈတီႈၼၼ်ႉၵဝ်ၶႂ်ႈႁႂ်ႈၵူၼ်းၸၢႆးတင်းလၢႆယင်းဢမ်ႇဢွၵ်ႇတေႃးသႃႉ၊ဢမ်ႇတွပ်ႇထဵင်ၵၼ်လႄႈၶႂ်ႈႁႂ်ႈၶဝ်ႁွမ်းမိုဝ်းဢၼ်မူတ်းၸၢင်ႇသေသူးတွင်းတီႈၸဝ်ႈၽြႃးဢေႃႈ။-

9ၼႄးလဵဝ်ၵၼ်၊မႄႈယိင်းၶဝ်ၵေႃႈၵဝ်ၶႂ်ႈႁႂ်ႈၶဝ်ပႂ်ႉဢဵင်ႇသရေႇၼႂ်းတၢင်းဢၼ်ၼုင်ႈၶူဝ်းဢၼ်ထုၵ်ႇတႃၼၼ်ႉဢေႃႈ။ ၶဝ်ဢမ်ႇထုၵ်ႇလီႁၢင်ႈၶိူင်ႈတူဝ်ၸဝ်ႈၵဝ်ႇလူၺ်ႈႁၢင်ႈၽၢင်ၶူၼ်ႁူဝ်ၵူႈမဵဝ်းမဵဝ်း၊လူၺ်ႈၶူဝ်းၶမ်းလႄႈသႅင်ပူးလႄး၊ဢိၵ်ႇတင်းၶူဝ်းလဵင်းဢၼ်ၵႃႈၶၼ်ယႂ်ႇၸိူဝ်းၼၼ်ႉလႄႈ၊-

10ၶဝ်ထုၵ်ႇလီဢဝ်တင်းတၢင်းၵမ်တၢင်းၵျၢင်ႉဢၼ်လီဢၼ်ငၢမ်းဢၼ်ဢၢပ်ႈၵိုင်ႇၵၼ်တင်းမႄႈယိင်းဢၼ်ၼပ်ႉယမ်ၽြႃးတြႃးၼၼ်ႉႁဵတ်းပဵၼ်ၶိူင်ႈၶူဝ်းႁၢင်ႈၶိူင်ႈတူဝ်ၸဝ်ႈၵဝ်ႇဢေႃႈ။-

11ႁႂ်ႈမႄႈယိင်းၶဝ်သွၼ်ဢဝ်တြႃးတဵတ်ႇတဵတ်ႇယဵၼ်ယဵၼ်လူၺ်ႈသၽေႃးဢၼ်ၶၢမ်ႇဢဝ်တၢင်းဢၼ်ဢုပ်ႉပိူင်ႇတႃႉ။-

12ၵဝ်ဢမ်ႇပၼ်ဢၶႂၢင်ႉႁႂ်ႈမႄႈယိင်းသင်ႇသွၼ်ၵူၼ်းၸၢႆးတင်းလၢႆလႄႈမီးဢႃႇၼႃႇၼိူဝ်ၶဝ်။ မႄႈယိင်းၸိုင်၊တၵ်းလႆႈယူႇတဵတ်ႇတဵတ်ႇဢေႃႈ။-

13လွင်ႈမၼ်းၸမ်ႉ၊ၽြႃးပဵၼ်ၸဝ်ႈၽၢၼ်ႇသၢင်း ဢႃႇတမ်ႇ၊ ဢွၼ်တၢင်းယဝ်ႉၸင်ႇၽၢၼ်ႇသၢင်း ဢေးဝႃႉ၊ ဢေႃႈ။-

14လိူဝ်သေၼၼ်ႉ ဢႃႇတမ်ႇ၊ လႆႈၶၢမ်ႇတၢင်းဢၼ်ပႅတ်ႉလႅၼ်ဢမ်ႇၸႂ်ႈ။ မႄႈယိင်းပဵၼ်ၵေႃႉဢၼ်လႆႈၶၢမ်ႇတၢင်းဢၼ်ပႅတ်ႉလႅၼ်လႄႈလိူဝ်ၵႂၢမ်းၽြႃးပဵၼ်ၸဝ်ႈဢေႃႈ။-

15ၼႂ်းဝႃႈၼၼ်သေၵေႃႈမႄႈယိင်းတၵ်းလႆႈၶၢမ်ႇတၢင်းဢၼ်ၵႄႇၶျွတ်ႈဢဝ်ၵွပ်ႈလူၺ်ႈတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်း၊ပေႃးမၼ်းပႂ်ႉထိင်းတူဝ်ၸဝ်ႈၵဝ်ႇလႄႈတႄႇယူႇၼႂ်းတၢင်းယုမ်ႇမၢတ်ႈ၊ၼႂ်းတၢင်းႁၵ်ႉမႅတ်ႈတႃႇ၊ဢိၵ်ႇတင်းၼႂ်းတၢင်းဢၼ်မူတ်းၸၢင်ႇပႃးဢဵင်ႇသရေႇၼၼ်ႉဢေႃႈ။

← Chapter 1 Jump to: Chapter 3 →