Hosea 3

Shan NCL

← Chapter 2 Jump to: Chapter 4 →

1ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “မႂ်းသမ်ႉၵႂႃႇလႄႈႁၵ်ႉပႅင်းမႄႈယိင်းဢၼ်ႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းၸုႁၵ်ႉမၼ်းၼၼ်ႉတႃႉ။ မႂ်းတၵ်းလႆႈႁၵ်ႉပႅင်းၵၼ်တင်းမၼ်းမိူၼ်ၸိူဝ်ႉၼင်ႇဢၼ်ၵဝ်ယင်းတိုၵ်ႉႁၵ်ႉပႅင်းၵူၼ်းၵဝ်မဵဝ်း ဢိသရေး၊ တင်းလၢႆ၊ပိၵ်ႉသမ်ႉၶဝ်ဢွၼ်ၵၼ်ဝၢႆႇၸူးတီႈၽြႃးတၢင်ႇသူႇတၢင်ႇပႃးလႄႈၵျိူၵ်ႈႁၵ်ႉထုၵ်ႇၸႂ်တၢင်းဢၼ်ဢဝ်ၶႅပ်းမၢၵ်ႇၸပိတ်ႉႁႅင်ႈသၢၵ်ႈလူႇတီႈႁုၼ်ႇႁၢင်ႈသၢင်းထုတင်းလၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။

2ၵဝ်ၵေႃႈဢဝ်ငိုၼ်းၶႅပ်းသိပ်းႁႃႈၶႅပ်း၊ဢိၵ်ႇတင်းၶဝ်ႈသၢၼ်မုယေႃးႁႃႈတၢင်သိုဝ်ႉဢဝ်မၼ်းသေလႄႈ၊-

3လၢတ်ႈတီႈမၼ်းလႄႈဝႃႈ၊ “မႂ်းတၵ်းလႆႈပႂ်ႉၵဝ်မိုဝ်ႉဝၼ်းႁိုင်ၼႃႇလူင်လၢင်လႄႈ၊ယင်းဢမ်ႇလႆႈႁဵတ်းမႄႈမွၵ်ႇယႃႈ၊ဢမ်ႇလႆႈယူႇလူၺ်ႈၵၼ်တင်းၽူႈၸၢႆးတၢင်ႇၵေႃႉတၢင်ႇၵူၼ်း။ ၼႂ်းမိုဝ်ႉဝၼ်းၸိူဝ်းၼၼ်ႉၵဝ်ၵေႃႈတၵ်းပႂ်ႉမႂ်းဢေႃႈ။-”

4လွင်ႈမၼ်းၸမ်ႉ၊ၵူၼ်းၵဝ်မဵဝ်း ဢိသရေး၊ တင်းလၢႆယင်းဢမ်ႇမီးၶုၼ်ႁေႃၶမ်း၊ဢမ်ႇမီးၶုၼ်မီးၵွၼ်း၊ဢမ်ႇမီးၶိူင်ႈတၢင်းလူႇ၊ဢမ်ႇမီးသဝ်ၼၢင်းၽီတီႈတၵ်းဝႆႈသႃ၊ဢမ်ႇမီးႁုၼ်ႇႁၢင်ႈသၢင်းထုလႄႈတၵ်းလႆႈယူႇမိုဝ်ႉဝၼ်းႁိုင်ၼႃႇလူင်လၢင်ဢေႃႈ။-

5လိုၼ်းၼၼ်ႉၵူၼ်းမဵဝ်း ဢိသရေး၊ တင်းလၢႆတၵ်းဢွၼ်ၵၼ်ၶိုၼ်းမႃးၸူးတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်၊ဢိၵ်ႇတင်းတီႈၸိူဝ်ႉၶိူဝ်း တႃႇဝိတ်ႈ၊ ၶုၼ်ႁေႃၶမ်းၶဝ်ၼၼ်ႉဢေႃႈ။ မိူဝ်ႈၼၼ်ႉၶဝ်တၵ်းဢွၼ်ၵၼ်ၵူဝ်ႁႄ ထႃႇဝရႃႉၽြႃး၊ လႄႈတၵ်းတေလႆႈႁပ်ႉၶၢမ်ႇဢဝ်ၵျေးၸူးတၢင်းလီမၼ်းၸဝ်ႈၼႂ်းမိုဝ်ႉဝၼ်းလိုၼ်းၼၼ်ႉဢေႃႈ။

← Chapter 2 Jump to: Chapter 4 →